અનિલ અંબાણી પરિવાર પર CBIનો ગાળિયો: પુત્ર જય અનમોલ સામે 228 કરોડની છેતરપિંડીનો કેસ દાખલ, જાણો સમગ્ર મામલો

Anmol Ambani CBI: ઉદ્યોગપતિ અનિલ અંબાણીના પરિવારની મુશ્કેલીઓ ફરી એકવાર વધી છે. કેન્દ્રીય તપાસ બ્યુરો (CBI) એ અનિલ અંબાણીના પુત્ર જય અનમોલ અંબાણી અને અન્ય લોકો સામે 228.06 કરોડની કથિત બેંક છેતરપિંડીનો કેસ નોંધ્યો છે. આ કેસ યુનિયન બેંક ઓફ ઈન્ડિયા દ્વારા દાખલ કરવામાં આવેલી ફરિયાદના આધારે કરવામાં આવ્યો છે. બેંકનો આરોપ છે કે અનમોલ અંબાણીના સમૂહની કંપનીએ લોન લીધી પરંતુ તેને ચૂકવવામાં નિષ્ફળ રહી, જેના કારણે બેંકને મોટું આર્થિક નુકસાન થયું.

શું છે 450 કરોડની લોનનો મામલો?

યુનિયન બેંક ઓફ ઈન્ડિયાની ફરિયાદ મુજબ, રિલાયન્સ હોમ ફાઇનાન્સ લિમિટેડ (RHFL)એ બેંકની મુંબઈ શાખામાંથી પોતાના વ્યવસાયિક કાર્યો માટે 450 કરોડની ક્રેડિટ લિમિટ (લોન સુવિધા) મેળવી હતી. આ લોન આપતી વખતે બેંકે કેટલીક શરતો પણ મૂકી હતી, જેમાં નીચે મુજબની બાબતોનો સમાવેશ થાય છે:

* નાણાકીય શિસ્ત જાળવવી.

*તમામ વેચાણની આવકને બેંક ખાતા દ્વારા જ વહેવડાવવી.

*લોન ડિફોલ્ટ અને ભંડોળનો દુરુપયોગ

ફરિયાદમાં જણાવાયું છે કે કંપની સમયસર હપ્તા ભરવામાં નિષ્ફળ રહી, જેના કારણે 30 સપ્ટેમ્બર 2019ના રોજ આ ખાતાને NPA (Non-Performing Asset) જાહેર કરવામાં આવ્યું. ત્યારબાદ, બેંકની વિનંતી પર ગ્રાન્ટ થોર્નટન નામની ફર્મ દ્વારા 1 એપ્રિલ 2016 થી 30 જૂન 2019 સુધીના સમયગાળા માટે ફોરેન્સિક ઓડિટ કરવામાં આવ્યું.

આ ઓડિટમાં ચોંકાવનારા તથ્યો સામે આવ્યા. તપાસમાં જાણવા મળ્યું કે લોન તરીકે લેવામાં આવેલા ભંડોળનો ખોટી રીતે ઉપયોગ કરવામાં આવ્યો હતો. ફંડને જે મૂળ વ્યવસાયિક હેતુ માટે લેવામાં આવ્યું હતું, તેના બદલે અન્ય કાર્યોમાં વાપરવામાં આવ્યું હતું, જેને "ફંડ ડાયવર્ઝન" કહેવાય છે.

બેંકનો છેતરપિંડીનો સ્પષ્ટ આરોપ

બેંકનું સ્પષ્ટપણે કહેવું છે કે કંપનીના તત્કાલીન પ્રમોટર/ડિરેક્ટર એવા આરોપીઓએ એકબીજા સાથે મળીને ખાતાઓમાં હેરાફેરી કરી હતી અને ભંડોળની છેતરપિંડી કરી હતી. તેમણે બેંક દ્વારા આપવામાં આવેલા નાણાંનો દુરુપયોગ કર્યો અને પૈસાને અન્ય જગ્યાએ વાળી દીધા, જેના કારણે બેંકને કુલ 228 કરોડનું નુકસાન થયું. હાલમાં CBIએ આ મામલે વિગતવાર તપાસ શરૂ કરી દીધી છે અને ભવિષ્યમાં આ કેસમાં વધુ મોટા ખુલાસા થવાની શક્યતા છે.

આ પણ વાંચો- ભારતમાં AI ક્રાંતિ: માઈક્રોસોફ્ટ 1.5 લાખ કરોડનું રોકાણ કરશે, સત્ય નડેલા અને PM મોદી વચ્ચે થઈ મહત્વની બેઠક