મ્યુચ્યુઅલ ફંડમાં છેતરપિંડી શોધવા માટે આંતરિક સિસ્ટમ બનાવવાનું કામ અંતિમ તબક્કામાં: સેબી

સ્ટોક માર્કેટ રેગ્યુલેટર સેબીનું કહેવું છે કે ભારતીય મ્યુચ્યુઅલ ફંડ ઉદ્યોગ ફ્રન્ટ-રનિંગ, ઇનસાઇડર ટ્રેઇનિંગ વગેરે જેવી છેતરપિંડીઓને શોધવા માટે આંતરિક સિસ્ટમ બનાવવાના અંતિમ તબક્કામાં છે. સેબીના ચેરપર્સન માધાબી પુરી બુચે જણાવ્યું હતું કે, 'મ્યુચ્યુઅલ ફંડ ઉદ્યોગ (એસોસિએશન ઓફ મ્યુચ્યુઅલ ફંડ્સ ઓફ ઈન્ડિયા) આ પ્રસ્તાવને પૂર્ણ કરવાના અંતિમ તબક્કામાં છે. આ એક જટિલ પ્રક્રિયા છે, તેથી તે સમય લે છે.

બુચે જણાવ્યું હતું કે પ્રથમ તબક્કામાં મોટા ફંડ હાઉસોએ પહેલા તેનો અમલ કરવો પડશે. તેમણે કહ્યું કે રૂપિયા 10,000 કરોડ અને તેનાથી વધુ કદના ફંડ હાઉસ માટે, સેબી દ્વારા ફાઇનલ ગાઇડલાઇન જારી કર્યાના 3 મહિનાની અંદર તેનો અમલ કરવામાં આવશે. તે 6 મહિનામાં બાકીના ફંડ હાઉસમાં લાગુ કરવામાં આવશે. સેબીએ એપ્રિલમાં મ્યુચ્યુઅલ ફંડના નિયમોમાં ફેરફાર કરવાનો નિર્ણય લીધો હતો. આ હેઠળ, ફ્રન્ટ રનિંગ, ઇનસાઇડર ટ્રેડિંગ વગેરે જેવી અનિયમિતતાઓને ટાળવા માટે માળખાકીય સિસ્ટમ બનાવવી જરૂરી છે.

સામાન્ય રીતે, જ્યારે શેરબજારમાં ફ્રન્ટ રનિંગ જેવી ઘટનાઓ બને છે, ત્યારે સેબી ડેટા અને વલણોનો ઉપયોગ કરીને તપાસ શરૂ કરે છે, જે સંભવિત છેતરપિંડી શોધવા તરફ દોરી જાય છે. જો કે, છેલ્લા એક વર્ષથી સેબીનો અભિપ્રાય છે કે ફંડ હાઉસીસ પાસે બજારની હેરાફેરી શોધવા અને અટકાવવા માટે આંતરિક સિસ્ટમ હોવી જોઈએ.

એસોસિયેશન ઓફ મ્યુચ્યુઅલ ફંડ્સ ઓફ ઈન્ડિયા હવે આંતરિક સિસ્ટમો પર સર્વસંમતિ બનાવવા માટે મ્યુચ્યુઅલ ફંડ ઉદ્યોગ સાથે કામ કરી રહ્યું છે. આ અંગેનો રિપોર્ટ સેબીને સુપરત કર્યા બાદ માર્કેટ રેગ્યુલેટર આ અંગે અંતિમ માર્ગદર્શિકા જારી કરશે.