શેરબજારમાં ફરી વેચવાલી: વિદેશી રોકાણકારોએ નવેમ્બરમાં 3,765 કરોડ ખેંચ્યા, આ વર્ષનો કુલ ઉપાડ 1.43 લાખ કરોડને પાર

વિદેશી પોર્ટફોલિયો રોકાણકારો ફરી એકવાર ભારતીય શેરબજારમાં વેચવાલ બન્યા છે. ઓક્ટોબરમાં થોડા સમય માટે રોકાણ કર્યા બાદ, નવેમ્બર મહિનામાં FPIs એ ભારતીય શેરબજારમાંથી નેટ 3,765 કરોડના શેર વેચીને પૈસા પાછા ખેંચ્યા છે. આ આંકડા સાથે, આ વર્ષે અત્યાર સુધીમાં ઇક્વિટી બજારમાંથી FPIsનો કુલ ઉપાડ 1.43 લાખ કરોડને પણ વટાવી ગયો છે, જે ભારતીય બજાર માટે ચિંતાનો વિષય બન્યો છે.

ઓક્ટોબરમાં રોકાણ, ત્યારબાદ ફરી ઉપાડ

ડિપોઝિટરીના આંકડા મુજબ, આ પહેલાં ઓક્ટોબર મહિનામાં FPIs એ ભારતીય શેરબજારમાં 14,610 કરોડનું રોકાણ કર્યું હતું. જોકે, જુલાઈ, ઓગસ્ટ અને સપ્ટેમ્બર મહિનામાં પણ તેમણે નોંધપાત્ર ઉપાડ કર્યો હતો. સપ્ટેમ્બરમાં 23,885 કરોડ, ઓગસ્ટમાં 34,990 કરોડ અને જુલાઈમાં 17,700 કરોડનો ઉપાડ FPIs દ્વારા નોંધાયો હતો. નવેમ્બર મહિનામાં થયેલા આ ઉપાડ પાછળ વૈશ્વિક અને સ્થાનિક બંને પ્રકારના પરિબળોએ ભૂમિકા ભજવી છે.

વૈશ્વિક પરિબળો અને જોખમથી બચવાનું વલણ

નિષ્ણાંતો એ આ વિશે વાત કરતા જણાવ્યું કે, "વૈશ્વિક મોરચે, યુએસ ફેડરલ રિઝર્વ દ્વારા વ્યાજ દરોમાં ઘટાડાના વલણ અંગેની અનિશ્ચિતતા, ડોલરમાં મજબૂતી અને ઉભરતા બજારોમાં રોકાણનું ઓછું જોખમ લેવાની વૃત્તિને કારણે વિદેશી રોકાણકારોએ સાવચેતીભર્યું વલણ અપનાવ્યું છે. આ ઉપરાંત, ભૂ-રાજકીય તણાવ અને ક્રૂડ ઓઇલની કિંમતોમાં થતી વધઘટ પણ FPIsની રોકાણની ભાવનાને અસર કરી રહી છે."

નવેમ્બરમાં આ ઉપાડ પાછળનું મુખ્ય કારણ વૈશ્વિક સ્તરે જોખમથી બચવાની ભાવના અને ટેકનોલોજી શેરોમાં જોવા મળતી ભારે અનિશ્ચિતતા છે. આ ઉપરાંત, ઉપભોક્તા સેવાઓ અને આરોગ્ય સેવા ક્ષેત્રના શેરોમાં પણ તેની અસર જોવા મળી છે.

આગળ શું?

પ્રવાહના વલણમાં પરિવર્તનનો નથી કોઈ સ્પષ્ટ સંકેત જિયોજીત ઇન્વેસ્ટમેન્ટ્સના મુખ્ય રોકાણ વ્યૂહરચનાકાર વી. કે. વિજયકુમારનું માનવું છે કે, FPIs ના પ્રવાહના વલણમાં પરિવર્તનનો હજુ કોઈ સ્પષ્ટ પુરાવો દેખાઈ રહ્યો નથી. તેમણે કહ્યું કે, FPIs કેટલાક દિવસો ખરીદદાર હતા અને કેટલાક દિવસો વેચવાલ. આ એક સંકેત છે કે પરિસ્થિતિ બદલાતા તેમના પ્રવાહનું વલણ પણ બદલાઈ શકે છે.

આ વર્ષે અત્યાર સુધીમાં, FPIs એ બોન્ડ અથવા ડેટ માર્કેટમાં સામાન્ય શ્રેણી હેઠળ 8,114 કરોડનું રોકાણ કર્યું છે. જોકે, આ જ સમયગાળા દરમિયાન, સ્વૈચ્છિક પ્રતિધારણ માર્ગ દ્વારા તેમણે 5,053 કરોડ પાછા ખેંચ્યા છે. આમ, ભારતીય શેરબજારમાં FPIsની વર્તમાન વેચવાલી વૈશ્વિક અનિશ્ચિતતાઓ અને બદલાતી આર્થિક પરિસ્થિતિનું પ્રતિબિંબ છે. રોકાણકારોએ આગામી સમયમાં બજારની ગતિવિધિઓ પર ચાંપતી નજર રાખવી જરૂરી બનશે.

આ પણ વાંચો-China- India WTO: ચીને ભારતની PLI સ્કીમ સામે WTOમાં કરી ફરિયાદ, EV અને બેટરી ક્ષેત્રે વેપાર નિયમોના ભંગનો આરોપ