બિહારમાં શપથ ગ્રહણ પહેલાં રાજકીય ધમધમાટ: નીતિશ કુમાર જ બનશે મુખ્યમંત્રી, NDA લગાવશે અંતિમ મહોર

Bihar Government Formation: બિહાર વિધાનસભા ચૂંટણીમાં NDA ગઠબંધનને સ્પષ્ટ બહુમતી મળ્યા બાદ હવે નવી સરકાર બનાવવાની કવાયત વેગવંતી બની છે. રાજકીય સૂત્રો અનુસાર, મુખ્યમંત્રી નીતિશ કુમારનો શપથ ગ્રહણ સમારોહ આગામી 20 નવેમ્બરના રોજ પટનાના ઐતિહાસિક ગાંધી મેદાનમાં યોજાશે, જેની તૈયારીઓ પૂરજોશમાં ચાલી રહી છે. આ ભવ્ય સમારોહમાં વડાપ્રધાન નરેન્દ્ર મોદી, અનેક કેન્દ્રીય મંત્રીઓ અને વિવિધ રાજ્યોના મુખ્યમંત્રીઓ પણ હાજરી આપશે. એવી પણ માહિતી છે કે નીતિશ કુમાર તેમની સાથે એક નાયબ મુખ્યમંત્રી અને લગભગ 20 જેટલા મંત્રીઓ સાથે શપથ લેશે. આ બધાની વચ્ચે, નીતિશ કુમાર આજે મુખ્યમંત્રી પદેથી રાજીનામું આપી શકે છે.

બિહારમાં નવી સરકારની રચના પહેલાં બુધવારનો દિવસ રાજકીય રીતે ખૂબ જ મહત્વનો રહેશે. સૌથી પહેલા સવારે 11 વાગ્યે મુખ્યમંત્રી આવાસ પર જનતા દળ યુનાઈટેડ (JDU)ના વિધાયક દળની બેઠક મળશે, જેમાં નીતિશ કુમારને ઔપચારિક રીતે નેતા તરીકે પસંદ કરવામાં આવશે. ત્યારપછી સવારે 11:30 વાગ્યે ભારતીય જનતા પાર્ટી (BJP)ના પ્રદેશ કાર્યાલય ખાતે તેમના વિધાયક દળની બેઠક યોજાશે, જેમાં તેઓ પોતાના નેતાની પસંદગી કરશે. આ બન્ને બેઠકો બાદ બપોરે 3:30 વાગ્યે વિધાનસભાના સેન્ટ્રલ હોલમાં NDAના તમામ 5 ઘટક દળોના ધારાસભ્યો એકઠા થશે અને નીતિશ કુમારને સર્વાનુમતે ગઠબંધનના નેતા તરીકે જાહેર કરશે. આ સમગ્ર પ્રક્રિયા પૂર્ણ થયા બાદ નીતિશ કુમાર રાજ્યપાલ આરિફ મોહમ્મદ ખાનને મળીને વર્તમાન સરકારના મુખ્યમંત્રી પદેથી રાજીનામું આપશે અને નવી સરકાર રચવાનો દાવો રજૂ કરશે. સાથે જ તેઓ તમામ સહયોગી દળોનો સમર્થન પત્ર પણ રાજ્યપાલને સોંપશે, જેથી નવા મંત્રીમંડળની રચનાનો માર્ગ મોકળો થઈ શકે.

નવા મંત્રીમંડળની રચનામાં જાતિ અને ક્ષેત્રના સમીકરણોને સાધવાનો પૂરો પ્રયાસ કરવામાં આવશે. જે રીતે ટિકિટ વહેંચણી અને પ્રચારમાં તમામ 5 સહયોગી દળોની ભૂમિકા હતી, તે જ રીતે મંત્રીમંડળમાં પણ દરેક પક્ષને સ્થાન મળશે. ચૂંટણીમાં સૌથી મોટી પાર્ટી તરીકે ઉભરી આવેલી ભાજપને સૌથી વધુ મંત્રીપદ મળે તેવી પૂરી સંભાવના છે. આ ઉપરાંત, પાર્ટી વિધાનસભા અધ્યક્ષ અને બે નાયબ મુખ્યમંત્રી પદ માટે પણ પોતાના નેતાઓની પસંદગી કરી શકે છે. આ પદો પર સામાજિક સમીકરણો જાળવવા માટે એક ખાસ ફોર્મ્યુલા પર વિચાર ચાલી રહ્યો છે. જો વિધાનસભા અધ્યક્ષ ઉચ્ચ જાતિમાંથી હશે, તો બંને નાયબ મુખ્યમંત્રી OBC/EBC અથવા દલિત સમુદાયમાંથી બનાવવામાં આવી શકે છે. અને જો અધ્યક્ષ OBC/EBC કે દલિત સમાજમાંથી હશે, તો એક નાયબ મુખ્યમંત્રી ઉચ્ચ જાતિમાંથી અને બીજા OBC/દલિત વર્ગમાંથી હોઈ શકે છે. આ સાથે જ, એક મહિલાને નાયબ મુખ્યમંત્રી બનાવવાની શક્યતા પર પણ ગંભીરતાથી વિચારણા થઈ રહી છે. મંત્રીમંડળમાં પ્રાદેશિક પ્રતિનિધિત્વનું પણ ખાસ ધ્યાન રાખવામાં આવશે.

આ પણ વાંચો- મુંબઈમાં હવે ટ્રાફિક જામ ભૂલી જાઓ! દેશની પ્રથમ પોડ ટેક્સીને મળી લીલી ઝંડી, જાણો ક્યાંથી ક્યાં સુધી દોડશે