ભાડે રહો છો? તો જાણી લો આ નવા નિયમ, હવે મકાન માલિકની મનમાની નહીં ચાલે! સરકારે બદલ્યા ભાડા કરારના નિયમો

Rent Agreement Rules 2025: જો તમે ભાડાના મકાનમાં રહો છો અથવા ભવિષ્યમાં રહેવાનું વિચારી રહ્યા છો, તો તમારા માટે એક મોટા અને રાહતના સમાચાર છે. કેન્દ્ર સરકારે મકાન માલિકો અને ભાડુઆતો વચ્ચે લાંબા સમયથી ચાલતા વિવાદોને સમાપ્ત કરવા માટે 'રેન્ટ એગ્રીમેન્ટ નિયમ 2025' લાગુ કરી દીધા છે. આ નવા નિયમોનો મુખ્ય હેતુ ભાડા કરારની પ્રક્રિયાને વધુ પારદર્શક, સરળ અને સુરક્ષિત બનાવવાનો છે.

મકાન માલિકો દ્વારા મનફાવે તેમ ભાડું વધારવું, વધુ પડતી સિક્યોરિટી ડિપોઝિટની માંગણી કરવી અને ભાડુઆતોને નાની-નાની વાતમાં પરેશાન કરવા જેવી સમસ્યાઓ હવે ભૂતકાળ બની જશે. આ નિયમો ખાસ કરીને અમદાવાદ, રાજકોટ, સુરત, બેંગલુરુ, મુંબઈ, પુણે અને હૈદરાબાદ જેવા મોટા શહેરોમાં રહેતા લાખો ભાડુઆતો માટે આશીર્વાદરૂપ સાબિત થશે. ચાલો, વિગતવાર જાણીએ કે આ નવા નિયમોમાં તમારા માટે શું ખાસ છે.

ભાડા કરાર 2025ના મુખ્ય નિયમો જે તમારે જાણવા જ જોઈએ

ફરજિયાત રજિસ્ટ્રેશન: દરેક ભાડા કરાર પર સહી કર્યાના 60 દિવસની અંદર ડિજિટલ સ્ટેમ્પ લગાવીને ઓનલાઈન રજિસ્ટર્ડ કરાવવો ફરજિયાત છે. રજિસ્ટ્રેશન ન કરાવવા પર રાજ્યના નિયમો મુજબ 5,000થી શરૂ કરીને વધુ દંડ લાગી શકે છે.

ભાડું વધારવાનો નિયમ: મકાન માલિક 12 મહિના પૂરા થયા પછી જ ભાડું વધારી શકશે. ભાડું વધારતા પહેલા, તેમણે ઓછામાં ઓછા 90 દિવસ અગાઉ ભાડુઆતને લેખિતમાં નોટિસ આપવી પડશે.

મકાન ખાલી કરાવવાનો નિયમ: હવે મકાન માલિક પોતાની મરજીથી ભાડુઆતને ઘર ખાલી કરાવી શકશે નહીં. માત્ર રેન્ટ ટ્રિબ્યુનલ (ભાડાપંચ)ના આદેશ પર અને કાયદાકીય કારણોસર જ મકાન ખાલી કરાવી શકાશે.

રિપેરિંગની જવાબદારી: જો ભાડુઆત દ્વારા મકાનમાં જરૂરી રિપેરિંગની જાણ કરવામાં આવે, તો મકાન માલિકે 30 દિવસની અંદર તે કામ કરાવવું પડશે. જો તેઓ આમ ન કરે, તો ભાડુઆત રિપેરિંગનો ખર્ચ ભાડામાંથી કાપી શકશે.

મકાન માલિકની મુલાકાત: મકાન માલિકે ભાડાના ઘરમાં તપાસ કે અન્ય કોઈ કારણસર આવતા પહેલા ઓછામાં ઓછા 24 કલાક અગાઉ લેખિત નોટિસ આપવી પડશે.

ઝડપી વિવાદ નિરાકરણ: મકાન માલિક અને ભાડુઆત વચ્ચેના કોઈપણ વિવાદનો ઉકેલ રેન્ટ ટ્રિબ્યુનલે 60 દિવસની અંદર લાવવો પડશે.

પોલીસ વેરિફિકેશન: ભાડુઆતોએ ભાડાની પ્રોપર્ટીમાં રહેતા પહેલા પોલીસ વેરિફિકેશન કરાવવું ફરજિયાત રહેશે.

ગેરકાયદેસર કૃત્યો પર પ્રતિબંધ: ભાડુઆતને બળજબરીથી કાઢવા, ધમકાવવા અથવા વીજળી-પાણીનું કનેક્શન કાપવું એ હવે સજાપાત્ર ગુનો ગણાશે.

TDS અને પેમેન્ટના નવા નિયમો

* જો માસિક ભાડું 5,000 કરતાં વધુ હોય, તો તેનું પેમેન્ટ ડિજિટલ માધ્યમથી કરવું પડશે જેથી વ્યવહાર પારદર્શક રહે.

* જેમનું માસિક ભાડું 50,000 કરતાં વધુ છે, તેમના પર હવે આવકવેરાની કલમ 194-IB હેઠળ TDS લાગુ થશે.

આ નિયમોથી કોને શું ફાયદો થશે?

ભાડુઆતો માટે: હવે ઓછી ડિપોઝિટ આપવી પડશે, મનસ્વી ભાડા વધારાથી છુટકારો મળશે અને કાયદાકીય સુરક્ષા મળશે. વિવાદોનું નિરાકરણ પણ ઝડપથી થશે.

મકાન માલિકો માટે: તેમને કાયદાકીય માળખું મળશે, જેનાથી કોર્ટ-કચેરીના ધક્કા ઓછા થશે. ભાડાની ચુકવણી અને ડોક્યુમેન્ટેશનમાં પારદર્શિતા આવશે.

સરકારનું માનવું છે કે આ નિયમોથી દેશમાં ખાલી પડેલા મકાનો ભાડે ચઢશે અને ભાડા બજારમાં તેજી આવશે, જે એક સ્વસ્થ અને વિશ્વાસ આધારિત સિસ્ટમનું નિર્માણ કરશે.

આ પણ વાંચો-રોકાણકારો સાવધાન! આ 5 શેરમાં લાગી લોઅર સર્કિટ, મહિનામાં જ 56% સુધી ડૂબ્યા, તમારું રોકાણ તો નથી ને?