ફાસ્ટેગ વગરના વાહન ચાલકોને ટોલબુથ પર ડબલ દંડમાંથી રાહત, ડિજીટલ પેમેન્ટ કરશો તો લાગશે ઓછો ચાર્જ, જાણો સંપૂર્ણ વિગતો

UPI Payment Fastag: કેન્દ્ર સરકારે દેશભરના વાહન ચાલકો માટે એક મહત્વપૂર્ણ નિર્ણય લીધો છે, જે ટોલ પ્લાઝા પર ડિજિટલ પેમેન્ટને વધુ પ્રોત્સાહન આપશે. સડક પરિવહન અને રાજમાર્ગ મંત્રાલયે નવો નિયમ જાહેર કર્યો છે, જે મુજબ નેશનલ હાઈવે પર ફાસ્ટેગ વગરના વાહનો માટે ટોલ ટેક્સની ચૂકવણીની રીતમાં ફેરફાર કરવામાં આવશે. આ નિયમ 15 નવેમ્બર, 2025થી લાગુ થશે.

નવા નિયમ મુજબ, જો કોઈ વાહન ચાલક ફાસ્ટેગ વગર નેશનલ હાઈવે પરથી પસાર થાય અને રોકડમાં ટોલ ટેક્સની ચૂકવણી કરે, તો તેને બમણો ટોલ ટેક્સ ચૂકવવો પડશે. ઉદાહરણ તરીકે, જો ફાસ્ટેગથી ટોલ ટેક્સ 100 રૂપિયા હોય, તો રોકડ ચૂકવણીમાં 200 રૂપિયા ચૂકવવા પડશે. પરંતુ, જો ચાલક UPI કે અન્ય ડિજિટલ પેમેન્ટ પદ્ધતિનો ઉપયોગ કરે, તો તેને માત્ર 125 રૂપિયા (1.25 ગણો) ટોલ ટેક્સ ચૂકવવો પડશે. આનાથી UPI વાપરનાર નોન-ફાસ્ટેગ યુઝર્સને 75 રૂપિયા સુધીની બચત થશે.

હાલના નિયમોમાં, ફાસ્ટેગ વગરના વાહનોને રોકડ કે UPI ચૂકવણી માટે બમણો ટોલ ટેક્સ ચૂકવવો પડે છે. નવો નિયમ ડિજિટલ પેમેન્ટને પ્રોત્સાહન આપવા અને રોકડ ચૂકવણી ઘટાડવાના ઉદ્દેશ્ય સાથે લાવવામાં આવ્યો છે. આ પગલું ડિજિટલ ઈન્ડિયાના વિઝનને મજબૂત કરશે અને ટોલ પ્લાઝા પર ઝડપી અને સરળ ચૂકવણી પ્રક્રિયાને પ્રોત્સાહન આપશે.

આ નવો નિયમ ખાસ કરીને નોન-ફાસ્ટેગ યુઝર્સ માટે મોટી રાહત લઈને આવ્યો છે, જેઓ હવે UPI દ્વારા ઓછા ટોલ ટેક્સનો લાભ લઈ શકશે. સરકારનો આ નિર્ણય ડિજિટલ ટ્રાન્ઝેક્શનને વેગ આપવા સાથે ટોલ પ્લાઝા પર રોકડનો ઉપયોગ ઘટાડવામાં પણ મદદ કરશે.