GST 2.0ના પરિણામથી સરકાર ખુશખુશાલ: આ વર્ષે 20 લાખ કરોડની ઇલેક્ટ્રોનિક ખપતની આશા

GST Reforms: GST સુધારાઓએ ભારતના બજારોમાં નવી ઉર્જા ભરી છે. આ વર્ષે નવરાત્રિના તહેવારો દરમિયાન ખરીદીમાં જોવા મળેલો ઉછાળો GSTની નવી નીતિઓનું પરિણામ છે. કેન્દ્રીય નાણાં મંત્રી નિર્મલા સીતારમણ, વાણિજ્ય મંત્રી પીયૂષ ગોયલ અને ઇલેક્ટ્રોનિક્સ તથા આઇટી મંત્રી અશ્વિની વૈષ્ણવે શનિવારે એક સંયુક્ત પત્રકાર પરિષદમાં આ વાતનો ઉલ્લેખ કર્યો. તેમણે જણાવ્યું કે 22 સપ્ટેમ્બરથી લાગુ થયેલા GST સુધારાઓએ ગ્રાહકોની માંગમાં વધારો કર્યો છે, જેનાથી ઓટોમોબાઇલ, ઇલેક્ટ્રોનિક્સ અને FMCG જેવા ક્ષેત્રોમાં નોંધપાત્ર વૃદ્ધિ જોવા મળી છે.

નાણાં મંત્રી નિર્મલા સીતારમણે કહ્યું, "GST સુધારા નવરાત્રિના પ્રથમ દિવસે શરૂ થયા હતા, અને ભારતના લોકોએ તેને હૃદયથી સ્વીકાર્યા છે." તેમણે વધુમાં જણાવ્યું કે સરકારે 54 આવશ્યક વસ્તુઓની નજીકથી દેખરેખ રાખી, અને દરેક વસ્તુ પર ટેક્સનો લાભ ગ્રાહકો સુધી પહોંચ્યો છે. સપ્ટેમ્બરના છેલ્લા 9 દિવસોમાં ખરીદીમાં ભારે વધારો જોવા મળ્યો. આ દરમિયાન યાત્રી વાહનોનું વેચાણ 3.72 લાખ યુનિટ, દ્વિચક્રી વાહનોનું વેચાણ 21.60 લાખ યુનિટ અને ત્રિચક્રી વાહનોના વેચાણમાં 5.5 ટકાનો વધારો નોંધાયો.

ટીવી અને એસીના વેચાણમાં ઉછાળો

નિર્મલા સીતારમણે જણાવ્યું કે ટેક્સ દરોમાં ઘટાડાને કારણે ટેલિવિઝનનું વેચાણ 30-35 ટકા વધ્યું, જ્યારે એર કંડિશનરનું વેચાણ બમણું થયું. એલજી ઇન્ડિયાએ પ્રથમ દિવસે જ રેકોર્ડબ્રેક વેચાણ નોંધાવ્યું. નવરાત્રિ દરમિયાન FMCG ક્ષેત્રની વેચાણમાં પણ વધારો થયો.

વાણિજ્ય મંત્રી પીયૂષ ગોયલે જણાવ્યું કે આ સુધારા લગભગ દોઢ વર્ષથી વડાપ્રધાનના માર્ગદર્શન હેઠળ તૈયાર થઈ રહ્યા હતા. તેમણે કહ્યું, "3 સપ્ટેમ્બરે નાણાં મંત્રીએ જાહેર કરેલા આ સુધારાઓએ બજારો, ઉદ્યોગો અને સામાન્ય જનતામાં નવો ઉત્સાહ ભર્યો છે." આ સુધારાઓએ ભારતને વૈશ્વિક સ્તરે સૌથી ઝડપથી વિકસતી અર્થવ્યવસ્થાઓમાંનું એક બનાવ્યું છે. આઇએમએફે ભારતના જીડીપી વૃદ્ધિનો અંદાજ 6.6 ટકા સુધી સુધાર્યો છે.

ઇલેક્ટ્રોનિક્સમાં રેકોર્ડબ્રેક વેચાણ

ઇલેક્ટ્રોનિક્સ અને આઇટી મંત્રી અશ્વિની વૈષ્ણવે જણાવ્યું કે નવરાત્રિ દરમિયાન ઇલેક્ટ્રોનિક્સનું વેચાણ ગયા વર્ષની સરખામણીએ 20-25 ટકા વધ્યું. ટીવી, વોશિંગ મશીન અને સ્માર્ટફોન જેવી શ્રેણીઓમાં માંગમાં વધારો થયો, જેનાથી ઉત્પાદન ક્ષેત્રને બળ મળ્યું. આ ક્ષેત્રે 25 લાખ લોકોને સીધો રોજગાર આપ્યો છે. તેમણે વધુમાં કહ્યું, GST સુધારાઓને કારણે આ વર્ષે 20 લાખ કરોડ રૂપિયાની વધારાની ઇલેક્ટ્રોનિક ખપતની અપેક્ષા છે.

આ પણ વાંચો-India First Electric Highway: ભારતનો પ્રથમ ઇલેક્ટ્રિક હાઇવે, મુંબઈ-પુણે માર્ગે નવો ઇતિહાસ