LPG Price Hike: 1 ઓક્ટોબરથી LPG સિલિન્ડરના ભાવમાં વધારો: જાણો નવા રેટ અને અસર

LPG Price Hike: ઓઇલ માર્કેટિંગ કંપનીઓએ ઓક્ટોબર મહિનાની શરૂઆતમાં કોમર્શિયલ ગેસ સિલિન્ડરના ભાવમાં વધારો કરીને ઉદ્યોગોને આંચકો આપ્યો છે. 19 કિલોગ્રામના કોમર્શિયલ LPG સિલિન્ડરના ભાવમાં 15થી 16 રૂપિયાનો વધારો કરવામાં આવ્યો છે. ઇન્ડિયન ઓઇલની સત્તાવાર વેબસાઇટ અનુસાર, દિલ્હીમાં આ સિલિન્ડરની કિંમત 1580 રૂપિયાથી વધીને 1595 રૂપિયા થઈ છે. કોલકાતામાં 16 રૂપિયાના વધારા સાથે આ સિલિન્ડર હવે 1700 રૂપિયામાં ઉપલબ્ધ છે.

મુંબઈમાં 19 કિલોગ્રામના સિલિન્ડરની કિંમત 16 રૂપિયા વધીને 1547 રૂપિયા થઈ છે, જ્યારે ચેન્નાઈમાં આ જ સિલિન્ડર 16 રૂપિયા મોંઘું થઈને 1754 રૂપિયામાં મળી રહ્યું છે. આ ભાવવધારો 1 ઓક્ટોબર 2025થી લાગુ થયો છે.

ઘરેલું LPG સિલિન્ડરના ભાવમાં કોઈ ફેરફાર નહીં

સામાન્ય ગ્રાહકો માટે સારા સમાચાર છે કે 14.2 કિલોગ્રામના ઘરેલું LPG સિલિન્ડરના ભાવમાં કોઈ ફેરફાર કરવામાં આવ્યો નથી. હાલના દરો અનુસાર, આ સિલિન્ડર દિલ્હીમાં 853.00 રૂપિયા, કોલકાતામાં 879.00 રૂપિયા, મુંબઈમાં 852.50 રૂપિયા અને ચેન્નાઈમાં 868.50 રૂપિયામાં ઉપલબ્ધ છે. આનાથી ઘરેલું ગેસનો ઉપયોગ કરતા પરિવારોને રાહત મળી છે.

LPG સિલિન્ડરની સાથે ઓઇલ કંપનીઓએ એવિએશન ટર્બાઇન ફ્યુઅલ (ATF)ના ભાવમાં પણ વધારો કર્યો છે. ATFની કિંમતમાં સરેરાશ 3,052.5 રૂપિયા પ્રતિ કિલોલીટરનો વધારો થયો છે. નવા દરો અનુસાર, દિલ્હીમાં એટીએફની કિંમત 93,766.02 રૂપિયા પ્રતિ કિલોલીટર, મુંબઈમાં 87,714.39 રૂપિયા પ્રતિ કિલોલીટર, કોલકાતામાં 96,816.58 રૂપિયા પ્રતિ કિલોલીટર અને ચેન્નાઈમાં 97,302.14 રૂપિયા પ્રતિ કિલોલીટર છે.

ATFના ભાવમાં વધારો એવિએશન સેક્ટર માટે ચિંતાનો વિષય બની રહ્યો છે, કારણ કે ઇંધણનો ખર્ચ એરલાઇન્સના કુલ ઓપરેશનલ ખર્ચનો 30%થી 40% હિસ્સો ધરાવે છે. આ વધારો એવા સમયે થયો છે જ્યારે એરલાઇન્સ આગામી રજાઓની સીઝનમાં મુસાફરીની માંગમાં વધારાની તૈયારી કરી રહી છે.

શું હશે અસર?

કોમર્શિયલ LPGના ભાવમાં વધારાથી હોટેલ, રેસ્ટોરન્ટ અને અન્ય વ્યવસાયો પર ખર્ચનો બોજ વધશે, જેની અસર ગ્રાહકોના ખિસ્સા પર પણ પડી શકે છે. બીજી તરફ, એટીએફના ભાવમાં વધારાથી એરલાઇન્સના ટિકિટના ભાવમાં વધારો થઈ શકે છે, જે મુસાફરો માટે ચિંતાનો વિષય છે.

આ ભાવવધારો આર્થિક પરિસ્થિતિ અને બજારની માંગ-પુરવઠાની સ્થિતિને ધ્યાનમાં રાખીને કરવામાં આવ્યો છે. ગ્રાહકો અને ઉદ્યોગો આ નવા દરોની અસરને અનુભવવા માટે તૈયાર રહેવું જોઈએ.

આ પણ વાંચો- RBI MPC Decision Today: RBIએ રેપો રેટમાં નથી કર્યો કોઈ ફેરફાર, જાણો ગવર્નર સંજય મલ્હોત્રાની મહત્વની જાહેરાતો