UPI transaction limit: UPI લિમિટ કેમ ઓછી છે? જાણો તમારો મિત્ર કેમ તમારાથી વધુ પૈસા મોકલી શકે છે

UPI transaction limit: આજકાલ નાનામાં નાની ચુકવણીથી લઈને મોટા ટ્રાન્ઝેક્શન માટે લોકો UPIનો ઉપયોગ કરે છે. પરંતુ ઘણીવાર એવું બને છે કે તમે તમારા મિત્ર જેટલા પૈસા ટ્રાન્સફર નથી કરી શકતા. શું તમે ક્યારેય વિચાર્યું છે કે બધા UPI વાપરતા હોવા છતાં દરેકની ટ્રાન્ઝેક્શન લિમિટ અલગ-અલગ કેમ હોય છે? આની પાછળ કોઈ એક નહીં, પરંતુ અનેક કારણો જવાબદાર છે. ચાલો, આ ગૂંચવણને સરળ શબ્દોમાં સમજીએ.

UPI લિમિટનો મુખ્ય નિયમ શું છે?

સૌથી પહેલા એ જાણવું જરૂરી છે કે ભારતમાં UPI સિસ્ટમનું સંચાલન કરતી સંસ્થા નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ એક ટ્રાન્ઝેક્શનમાં વધુમાં વધુ 1,00,000ની લિમિટ નક્કી કરી છે. જોકે, આ એક ઉપલી મર્યાદા છે. આનો અર્થ એ નથી કે દરેક વ્યક્તિ એક લાખ રૂપિયા મોકલી શકે છે. બેન્કો અને એપ્સ પોતાની પોલિસી મુજબ આ લિમિટને ઓછી કરી શકે છે.

તમારી અને બીજાની લિમિટમાં તફાવત કેમ છે?

1. બેન્કની પોતાની પોલિસી

દરેક બેન્કની રિસ્ક મેનેજમેન્ટ પોલિસી અલગ-અલગ હોય છે. ઓનલાઈન ફ્રોડ અને સ્કેમથી ગ્રાહકોને બચાવવા માટે કેટલીક બેન્કો જાણીજોઈને પોતાની ટ્રાન્ઝેક્શન લિમિટ ઓછી રાખે છે. ઉદાહરણ તરીકે, SBI તેના ગ્રાહકોને દૈનિક 1,00,000 સુધીની ટ્રાન્ઝેક્શન લિમિટ આપે છે, જ્યારે કોઈ નાની કે સહકારી બેન્ક આ લિમિટ માત્ર 25,000 પણ રાખી શકે છે.

2. નવા અને જૂના યુઝર્સનો ભેદ

જો તમે UPI પર નવા છો, તો સુરક્ષાના કારણોસર તમારી લિમિટ શરૂઆતના 24 કલાક માટે માત્ર 5,000 સુધીની જ હોઈ શકે છે. આ નિયમ એ સુનિશ્ચિત કરવા માટે છે કે કોઈ સ્કેમર દ્વારા તમારું એકાઉન્ટ ખોટી રીતે એક્ટિવેટ નથી કરાયું ને. એકવાર 24 કલાક પૂરા થઈ જાય પછી તમારી લિમિટ આપોઆપ વધી જાય છે. જૂના યુઝર્સને આ નિયમ લાગુ પડતો નથી.

3. ટ્રાન્ઝેક્શનનો પ્રકાર

તમે કોને પૈસા મોકલી રહ્યા છો તેના પર પણ લિમિટ નિર્ભર કરે છે. સામાન્ય રીતે, એક વ્યક્તિથી બીજી વ્યક્તિને પૈસા મોકલવા કરતાં કોઈ દુકાનદાર કે વેપારીને (મર્ચન્ટ) પેમેન્ટ કરવાની લિમિટ વધુ હોઈ શકે છે. બિઝનેસ UPI એકાઉન્ટ ધરાવતા યુઝર્સ માટે પૈસા મેળવવાની અને મોકલવાની લિમિટ ઘણી વધારે હોય છે.

4. ખાસ કેટેગરી માટે વધુ છૂટ

NPCI દ્વારા અમુક ખાસ ક્ષેત્રો માટે UPI લિમિટમાં છૂટછાટ આપવામાં આવી છે. જો તમે હોસ્પિટલના બિલની ચુકવણી કરી રહ્યા છો અથવા શૈક્ષણિક સંસ્થામાં ફી ભરી રહ્યા છો, તો તમે એક જ વારમાં 5,00,000 સુધીનું ટ્રાન્ઝેક્શન કરી શકો છો.

5. તમે કઈ એપ વાપરો છો?

Google Pay, PhonePe, અને Paytm જેવી એપ્લિકેશન્સ પણ પોતાની ટ્રાન્ઝેક્શન લિમિટ સેટ કરી શકે છે, જે તમારી બેન્કની લિમિટ કરતાં પણ ઓછી હોઈ શકે છે. ઉદાહરણ તરીકે, બની શકે કે તમારી બેન્કની લિમિટ 1,00,000 હોય, પણ કોઈ ચોક્કસ એપ તમને એક દિવસમાં માત્ર 10 જ ટ્રાન્ઝેક્શન કરવા દે અથવા કુલ 50,000 જ મોકલવાની પરવાનગી આપે.

ટૂંકમાં, તમારી UPI લિમિટ માત્ર એક પરિબળ પર નહીં, પરંતુ NPCI, તમારી બેન્ક, તમે વાપરતા હો તે એપ અને તમારા એકાઉન્ટની હિસ્ટ્રી જેવા અનેક પાસાઓ પર નિર્ભર કરે છે. આથી, જો તમારી લિમિટ કોઈ મિત્ર કરતાં ઓછી હોય તો તેમાં ચિંતા કરવાની કોઈ વાત નથી, કારણ કે આ એક સામાન્ય પ્રક્રિયાનો ભાગ છે.

આ પણ વાંચો- શેરબજારમાં રોકાણકારોનો ફરી ભરોસો: ઓક્ટોબરમાં રેકોર્ડ 30 લાખ નવા ડીમેટ ખાતા ખૂલ્યા!