Union Budget 2023: નાણાકીય વર્ષ 2022-23માં જીડીપી વૃદ્ધિ 7% રહી શકે છે, સ્ટૅટેસ્ટિક મિનિસ્ટ્રીનું અનુમાન

કેન્દ્રીય બજેટ 2023: આ નાણાકીય વર્ષ (2022-23)માં ભારતની જીડીપી વૃદ્ધિ 7 ટકા રહેવાનું અનુમાન છે. સ્ટૅટેસ્ટિક મંત્રાલયે આ અનુમાન વ્યક્ત કર્યું છે. નાણાકીય વર્ષ 2021-22માં જીડીપી ગ્રોથ 8.7 ટકા હતો. મંત્રાલયે કહ્યું છે કે આ નાણાકીય વર્ષમાં ભારતની નજીવી જીડીપી વૃદ્ધિ 15.4 ટકા રહેવાની ધારણા છે. ગયા નાણાકીય વર્ષમાં તે 19.5 ટકા હતો. આ નાણાકીય વર્ષમાં ગ્રોસ વેલ્યુ એડેડ 6.7 ટકા રહેવાનું અનુમાન છે. ગયા નાણાકીય વર્ષમાં તે 8.1 ટકા હતો. મંત્રાલયે કહ્યું છે કે, "આ નાણાકીય વર્ષમાં રિયલ જીડીપી રૂ. 157.60 લાખ કરોડ રહેવાની અપેક્ષા છે. નાણાકીય વર્ષ 2021-22 દરમિયાન જીડીપીનું પ્રોવિઝનલ અનુમાન રૂ. 147.36 લાખ કરોડ છે."

મેન્યુફેક્ચરિંગ સેક્ટરની વૃદ્ધિમાં ઘટાડો થવાની ધારણા
મંત્રાલયે કહ્યું છે કે આ નાણાકીય વર્ષમાં રિયલ જીડીપી વૃદ્ધિ 7 ટકા રહી શકે છે. જીવીએના સંદર્ભમાં, સર્વિસ સેક્ટરની વૃદ્ધિ 13.7 ટકા રહેવાની ધારણા છે. ગયા નાણાકીય વર્ષમાં તે 11.1 ટકા હતો. જોકે, મેન્યુફેક્ચરિંગ સેક્ટર આઉટપુટની વૃદ્ધિમાં ઘટાડો થવાની ધારણા છે. આ નાણાકીય વર્ષમાં તે ઘટીને 1.6 ટકા થવાની ધારણા છે. ગયા નાણાકીય વર્ષમાં તે 9.9 ટકા હતો.

નેટ નેશનલ ઇનકમ ગ્રોથ 6.6 ટકા રહેવાનું અનુમાન
આ નાણાકીય વર્ષમાં પ્રાઇવેટ કંજમ્પશનની વૃદ્ધિ 7.7 ટકા રહેવાની ધારણા છે. ગયા નાણાકીય વર્ષમાં તે 7.9 ટકા હતો. આ નાણાકીય વર્ષમાં ગ્રોસ ફિક્સ્ડ મૂડી નિર્માણની વૃદ્ધિ 11.5 ટકા રહેવાની ધારણા છે. ગયા નાણાકીય વર્ષમાં તે 15.8 ટકા હતો. આ નાણાકીય વર્ષમાં કુલ રાષ્ટ્રીય આવક અને ચોખ્ખી રાષ્ટ્રીય આવકની વૃદ્ધિ 6.6 ટકા રહેવાનું અનુમાન છે. ગયા નાણાકીય વર્ષમાં તે 8.8 ટકા હતો. આ નાણાકીય વર્ષમાં માથાદીઠ આવકમાં વૃદ્ધિ 5.8 ટકા રહેવાનો અનુમાન છે. ગયા નાણાકીય વર્ષમાં આ વૃદ્ધિ 7.6 ટકા હતી.

અમેરિકા અને યુરોપમાં મંદીનો તોળાતો ખતરો
આ નાણાકીય વર્ષમાં 7 ટકાની જીડીપી વૃદ્ધિ ખૂબ સારી માનવામાં આવશે. વિશ્વમાં અમેરિકા, ઈંગ્લેન્ડ અને યુરોપ જેવા દેશો મંદીના ભયનો સામનો કરી રહ્યા છે. આવી સ્થિતિમાં ભારતીય અર્થવ્યવસ્થા ઝડપી ગતિએ આગળ વધી રહી છે. કેન્દ્રીય બજેટ 2023 પહેલા વૃદ્ધિનો આ અનુમાન પણ સરકાર માટે સારા સમાચાર છે. એવું માનવામાં આવે છે કે કેન્દ્રીય બજેટ 2023માં સરકારનું ધ્યાન આર્થિક વૃદ્ધિની ગતિ વધારવાના ઉપાયો પર રહેશે.

નાણાકીય વર્ષ 2020-2021 માં, કોરોના રોગચાળાને કારણે જીડીપીમાં ઘટાડો થયો હતો. ત્યારબાદ લોકડાઉનને કારણે આર્થિક ગતિવિધિઓ ઠપ થઈ ગઈ હતી. જેની સીધી અસર અર્થવ્યવસ્થા પર પડી હતી.