Union Budget 2023: મેડિકલ ડિવાઈસ માટે 80% આયાત પર નિર્ભર છે ભારત, શું બદલાશે બજેટ ?

Union Budget 2023: સરકારે મેડિકલ ટેક્નોલોજી ઉદ્યોગ માટે ભૂતકાળમાં ઘણું કર્યું છે. દેશમાં ઘણા મેડિકલ પાર્ક બનાવવામાં આવ્યા હતા. આ ક્ષેત્ર માટે PLI યોજના શરૂ કરવામાં આવી હતી. કંપ્લાયંસ  બોજ ઘટાડવા માટે પણ અનેક પગલાં લેવામાં આવ્યા છે. મેડિકલ ટેક્નોલોજી એસોસિએશન ઓફ ઈન્ડિયા (MTaI) એ કહ્યું કે આગામી સામાન્ય બજેટમાં સરકાર તેની માંગણીઓ સ્વીકારીને આ ઉદ્યોગ માટેનો માર્ગ સરળ બનાવી શકે છે. ગયા વર્ષે જ, મેડટેક ઉદ્યોગે ભારતના નિયમનકારી મિકેનિઝમને વિશ્વમાં સર્વશ્રેષ્ઠ બનાવવાના હેતુથી ઘણા સુધારાઓ જોયા હતા.

મેડટેક બોડીએ એક નિવેદનમાં જણાવ્યું હતું કે, ફાર્માસ્યુટિકલ્સ વિભાગ દ્વારા રજૂ કરવામાં આવેલી PLI જેવી યોજનાઓ તેમજ દેશભરમાં મેડિકલ પાર્કની સ્થાપના મોદી સરકારની દેશના મેડિકલ ડિવાઇસ સેક્ટરને આગળ લઈ જવાનો ઈરાદો દર્શાવે છે. FDI આકર્ષવા માટે ઘણું કામ કરવામાં આવ્યું છે.

80 ટકા આયાત પર નિર્ભર છે ભારત

MTaIના ચેરમેન અને ડાયરેક્ટર જનરલ પવન ચૌધરીએ જણાવ્યું હતું કે, “સરકારી ડેટા અનુસાર, ભારત ગુણવત્તાયુક્ત સેવાઓની વધતી જતી માંગને પહોંચી વળવા લગભગ 80 ટકા તબીબી ઉપકરણોની આયાત કરે છે. તદુપરાંત, ભારતમાં તબીબી ઉપકરણો પર લાદવામાં આવતી ડ્યુટી અને કર વિશ્વ અને પડોશી દેશો કરતાં પણ વધુ છે. આ સરકારના લક્ષ્યની વિરુદ્ધ છે. અમે સામાન્ય બજેટ 2023માં આમાં સુધારો કરવાની આશા રાખીએ છીએ.

સેક્ટર માટે અલગ બજેટની જરૂર

તેમણે કહ્યું કે, મેડિકલ ડિવાઈસ સેક્ટરને પ્રોત્સાહન આપવા માટે તેના પ્રમોશન અને માર્કેટિંગ માટે અલગ બજેટ ફાળવવું જોઈએ. મેડટેક બોડીના જણાવ્યા અનુસાર, તબીબી ઉપકરણો પરની ઊંચી કસ્ટમ ડ્યુટીને 2.5 ટકાના સ્તરે લાવવાની જરૂર છે.

એસોસિએશને દાવો કર્યો હતો કે ભારતમાં તબીબી ઉપકરણોની કિંમત પર કસ્ટમ ડ્યુટીની નકારાત્મક અસર પડે છે.