Budget Session 2024: ગુજરાત વિધાનસભામાં રજૂ થશે વર્ષ 2024-25નું અંદાજપત્ર, અત્યાર સુધીનું સૌથી મોટું બજેટ હોવાનો અંદાજ, જાણો શું હશે ખાસ

Budget Session 2024: આવતીકાલે ગુજરાતના નાણામંત્રી કનુભાઇ દેસાઇ વર્ષ 2024-25 માટેનું પૂર્ણ કદનું અંદાજપત્ર રજૂ કરશે. અંદાજે સવા ત્રણ લાખ કરોડનું બજેટનું કદ રહેશે. સૌથી નોંધનીય બાબત એ છે કે, સત્ર દરમિયાન થનારી તમામ કામગીરી પેપરલેસ એટલે કે ડિજિટલ માધ્યમથી જ થશે. તમામ સભ્યોના ટેબલ પર જ ટેબલેટ રહેશે. રાજ્ય સરકાર દ્વારા ચાર જેટલા વિધેયક લાવવાનું હાલ નક્કી કરાયું છે. જેમાં મહેસૂલ વિભાગનું ગુજરાત ગણોત વહીવટ અને ખેતીની જમીન કાયદા સુધારા વિધેયક, શહેરી વિકાસ વિભાગનું હોટલ-લોજિંગ રેન્ટ કંટ્રોલ સુધારા વિધેયક, સહકારી મંડળીઓ માટેનું સહકાર વિભાગનું અને વીજશુલ્કને લગતું નાણાં વિભાગનું વિધેયક રજૂ કરાશે.

રાજ્યના એક મંત્રીએ જણાવ્યું હતું કે ગુજરાત વિધાનસભાનું બજેટ સત્ર આગામી વર્ષ માટે રાજ્ય સરકારના વિઝન અને આગામી 25 વર્ષનો રોડ મેપ પ્રતિબિંબિત કરશે.

સંસદીય બાબતોના પ્રધાને જણાવ્યું હતું કે, અયોધ્યામાં ભગવાન રામ મંદિરના અભિષેક સમારોહને ધ્યાનમાં રાખીને વડા પ્રધાન નરેન્દ્ર મોદીની પ્રશંસા કરતો ઠરાવ 5 ફેબ્રુઆરીએ લાવવામાં આવશે. તેમણે કહ્યું કે ધારાસભ્યોની રજૂઆતને ધ્યાનમાં રાખીને, અગાઉની જાહેરાત મુજબ, શનિવારે વિધાનસભાની કોઈ બેઠક યોજવામાં આવશે નહીં.

વિપક્ષ કોંગ્રેસે વિવિધ મુદ્દે સરકારને ઘેરવાનો નિર્ણય લીધો છે. ગુજરાત કોંગ્રેસના પ્રવક્તા મનીષ દોશીએ દાવો કર્યો હતો કે, "ભાજપ સરકારના ઉંચા દાવાઓ છતાં, રાજ્યમાં હજુ પણ બેરોજગારી પ્રવર્તે છે અને જાન્યુઆરીમાં યોજાયેલી વાઈબ્રન્ટ ગુજરાત સમિટ જેવી ઈવેન્ટ્સથી માત્ર ઉદ્યોગપતિઓને જ ફાયદો થયો હતો, આપણા યુવાનોને નહીં." "કોંગ્રેસના ધારાસભ્યો વડોદરામાં બોટ પલટી જવાની ઘટનામાં 12 વિદ્યાર્થીઓ અને બે શિક્ષકોના મૃત્યુનો મુદ્દો પણ ઉઠાવશે.

આ પણ વાંચો-Health Care: જો તમને અંગૂઠામાં આ લક્ષણો દેખાય તો સાવધાન! ડાયાબિટીસ સહિત અનેક રોગોની હોઇ શકે છે નિશાની