એપલનો AI પર મોટો દાવ: ભારતીય મૂળના અમર સુબ્રમણ્યા બન્યા નવા વાઇસ પ્રેસિડેન્ટ, જાણો કોણ છે આ દિગ્ગજ

Apple AI: ટેકનોલોજીની દુનિયામાં હંમેશા આગળ રહેતી કંપની એપલે આર્ટિફિશિયલ ઇન્ટેલિજન્સ (AI) ક્ષેત્રે એક મોટી જાહેરાત કરી છે. કંપનીએ ભારતીય મૂળના અને AI જગતના જાણીતા નિષ્ણાત અમર સુબ્રમણ્યાને પોતાના નવા AI વાઇસ પ્રેસિડેન્ટ તરીકે નિયુક્ત કર્યા છે. આ નિર્ણય એવા સમયે આવ્યો છે જ્યારે એપલ તેના AI પ્રોજેક્ટ્સને નવી દિશા આપવા માટે સતત પ્રયત્નશીલ છે. આ સાથે કંપનીએ એ પણ સ્પષ્ટ કર્યું છે કે હાલના AI એક્ઝિક્યુટિવ, જોન ગિઆનાન્ડ્રીઆ વર્ષ 2026માં કંપનીમાંથી નિવૃત્ત થશે.

જાણો કોણ છે અમર સુબ્રમણ્યા?

અમર સુબ્રમણ્યા ટેક જગત માટે કોઈ નવું નામ નથી. એપલમાં જોડાતા પહેલા, તેઓ તાજેતરમાં માઇક્રોસોફ્ટમાં AIના કોર્પોરેટ વાઇસ પ્રેસિડેન્ટ તરીકે કંપનીની AI વ્યૂહરચનાને મજબૂત કરવાનું કામ કરી રહ્યા હતા. અહીં તેમણે માઇક્રોસોફ્ટના એઝ્યોર ક્લાઉડ (Azure Cloud) અને કોપરનિકસ મોડલ્સના એકીકરણમાં મહત્વપૂર્ણ ભૂમિકા ભજવી હતી.

આ પહેલા, અમર સુબ્રમણ્યાએ ગૂગલમાં 16 વર્ષનો લાંબો સમય વિતાવ્યો હતો, જ્યાં તેઓ ગૂગલના મહત્વાકાંક્ષી પ્રોજેક્ટ ‘જેમિની’ના એન્જિનિયરિંગ હેડ હતા. તેમણે ગૂગલમાં સર્ચ, નેચરલ લેંગ્વેજ પ્રોસેસિંગ (NLP) અને મલ્ટિમોડલ AIના વિકાસમાં પણ યોગદાન આપ્યું હતું, જે આજે ગૂગલ આસિસ્ટન્ટ જેવી સેવાઓનો પાયો છે. આ વર્ષની શરૂઆતમાં જ તેમણે ગૂગલ છોડીને માઇક્રોસોફ્ટમાં જોડાયા હતા.

એપલે એક પ્રેસ રિલીઝમાં જણાવ્યું છે કે અમર સુબ્રમણ્યા સીધા જ ક્રેગ ફેડેરિઘીને રિપોર્ટ કરશે. તેમની જવાબદારીઓમાં એપલના ફાઉન્ડેશન મોડલ્સ, મશીન લર્નિંગ (ML) રિસર્ચ, અને AI સેફ્ટી જેવા મહત્વપૂર્ણ ક્ષેત્રોનું નેતૃત્વ શામેલ હશે.

એપલના CEO ટિમ કુકે જણાવ્યું કે, "અમર સુબ્રમણ્યાના જોડાવાથી અમારી લીડરશિપ ટીમ વધુ મજબૂત બની છે. ક્રેગ ફેડેરિઘી અમારા AI પ્રયાસોને આગળ વધારવામાં મુખ્ય ભૂમિકા ભજવી રહ્યા છે, જેમાં આવતા વર્ષે યુઝર્સ માટે વધુ પર્સનલ ‘સિરી’ (Siri) લાવવાનો પ્રોજેક્ટ પણ સામેલ છે."

એપલના AI નેતૃત્વમાં ફેરફાર

છેલ્લા કેટલાક સમયથી એપલ તેની AI લીડરશિપ ટીમમાં ફેરફાર કરી રહ્યું છે. જોન ગિઆનાન્ડ્રીઆ, જેમને 2018માં ગૂગલમાંથી એપલમાં લાવવામાં આવ્યા હતા, તેમની નિયુક્તિને તે સમયે એપલ માટે મોટી સફળતા માનવામાં આવી હતી. જોકે, ત્યારથી કંપનીને AI ક્ષેત્રે, ખાસ કરીને ‘સિરી’ના નવા AI-કેન્દ્રિત વર્ઝનને લોન્ચ કરવામાં નિષ્ફળતા મળી છે. ઘણા વર્ષો સુધી સિરી પ્રોજેક્ટની દેખરેખ રાખનાર જોન ગિઆનાન્ડ્રીઆએ આ વિલંબની જવાબદારી સ્વીકારી હતી.

બ્લૂમબર્ગના એક રિપોર્ટ મુજબ, એપલના CEO ટિમ કુકે AI ચીફ જોન ગિઆનાન્ડ્રીઆની પ્રોડક્ટ ડેવલપમેન્ટને સફળતાપૂર્વક પાર પાડવાની ક્ષમતા પર વિશ્વાસ ગુમાવી દીધો હતો અને સિરીની જવાબદારી અન્ય અધિકારીઓને સોંપી દીધી હતી. જોકે, એક નિવેદનમાં ટિમ કુકે જોનના યોગદાન બદલ આભાર માન્યો હતો.

હવે અમર સુબ્રમણ્યાના નેતૃત્વ હેઠળ એપલ AIની દુનિયામાં એક નવી શરૂઆત કરવા માટે તૈયાર છે.

આ પણ વાંચો- 2027 સુધીમાં ક્રૂડ ઓઈલ 30 ડોલર સુધી ઘટી શકે, JP મોર્ગનની ચોંકાવનારી આગાહી, ભારતને કઈ રીતે થશે અસર?