India-US relations: ટ્રમ્પની વિદેશ નીતિ પર જયશંકરના પ્રહાર, અમેરિકા-ભારત સંબંધોમાં તણાવ

India-US relations: અમેરિકાના રાષ્ટ્રપતિ ડોનાલ્ડ ટ્રમ્પની વિદેશ નીતિ પર ભારતના વિદેશ મંત્રી એસ. જયશંકરે તીખી ટીકા કરી છે. દિલ્હીમાં એક કાર્યક્રમમાં બોલતા જયશંકરે કહ્યું કે, ટ્રમ્પની વિદેશ નીતિ અભૂતપૂર્વ છે અને તે પરંપરાગત રાજનૈતિક રીત-રિવાજોથી સાવ અલગ છે. તેમણે ઉમેર્યું કે, "આજ સુધી કોઈ અમેરિકી રાષ્ટ્રપતિએ વિદેશ નીતિને આટલી જાહેરમાં નથી ચલાવી. આ ફેરફાર ફક્ત ભારત સુધી મર્યાદિત નથી, પરંતુ તે ટ્રમ્પનો વિશ્વના અન્ય દેશો સાથેનો વ્યવહાર પણ બદલાયેલો છે."

જયશંકરે ટ્રમ્પ દ્વારા ભારતીય વસ્તુઓ પર લગાવવામાં આવેલા 50% ટેરિફને "અન્યાયી" ગણાવ્યા, જેમાં ભારતની રશિયન ક્રૂડ ઓઇલની ખરીદીને લીધે 25% વધારાનો શુલ્ક પણ સામેલ છે. તેમણે સ્પષ્ટ કહ્યું કે, ભારત અને અમેરિકા વચ્ચેની વેપાર વાટાઘાટો ચાલુ છે, પરંતુ ભારત પોતાના ખેડૂતો અને નાના ઉત્પાદકોના હિતોનું રક્ષણ કરવામાં કોઈ સમજૂતી નહીં કરે. "અમારી પાસે કેટલીક રેડ લાઇન છે, જે મુખ્યત્વે અમારા ખેડૂતો અને નાના ઉત્પાદકોના હિતોને લગતી છે. અમે આ બાબતે ખૂબ જ દૃઢ છીએ," એમ જયશંકરે જણાવ્યું.

આ ઉપરાંત જયશંકરે ટ્રમ્પ વહીવટના તે આરોપોનો પણ જવાબ આપ્યો, જેમાં ભારત પર રશિયાથી સસ્તું તેલ ખરીદીને યુરોપ અને અન્ય સ્થળોએ રિફાઇન્ડ પેટ્રોલિયમ પ્રોડક્ટ્સ વધુ ભાવે વેચવાનો આરોપ લગાવવામાં આવ્યો હતો. તેમણે આ આરોપોને "હાસ્યાસ્પદ" ગણાવતા કહ્યું, "વેપારની હિમાયત કરનાર અમેરિકી વહીવટના લોકો બીજા દેશો પર વેપાર કરવાનો આરોપ લગાવે એ આશ્ચર્યજનક છે."

ભારત અને અમેરિકા વચ્ચેના વેપાર સંબંધોમાં આવેલા તણાવ છતાં, જયશંકરે જણાવ્યું કે વાટાઘાટો બંધ થઈ નથી. "અમે બંને દેશો વચ્ચે વાતચીત ચાલુ રાખીશું. આ કોઈ બાળકોની મિત્રતા નથી કે 'કટ્ટી' થઈ જાય," એમ તેમણે ઉમેર્યું. આ ઘટનાઓ દર્શાવે છે કે ભારત-અમેરિકા સંબંધો હાલમાં એક નાજુક તબક્કામાંથી પસાર થઈ રહ્યા છે, પરંતુ ભારત પોતાની રાષ્ટ્રીય નીતિઓ અને હિતોને પ્રાથમિકતા આપીને આગળ વધવા માટે પ્રતિબદ્ધ છે.