નિતિન ગડકરીનો વિવાદો પર કડક જવાબ: ‘મારા દિમાગની કિંમત દર મહિને 200 કરોડ, હું કોઈ દલાલ નથી!’

કેન્દ્રીય મંત્રી નિતિન ગડકરીએ ઇથેનોલ નીતિ અંગે ઉઠેલા વિવાદો પર વિરોધીઓને કડક જવાબ આપ્યો છે. નાગપુરમાં એગ્રીકોઝ વેલ્ફેર સોસાયટીના એક કાર્યક્રમમાં બોલતાં તેમણે કહ્યું, “મારા દિમાગની કિંમત દર મહિને 200 કરોડ છે. મારી પાસે પૈસાની કોઈ કમી નથી, અને હું ક્યારેય નીચે નહીં પડું.” તેમણે સ્પષ્ટ કર્યું કે તેમનું ધ્યેય ખેડૂતોના હિત માટે કામ કરવાનું છે, નહીં કે વ્યક્તિગત નફો કમાવવાનું.

ગડકરીએ કહ્યું, “લોકોને લડાવીને ફાયદો ઉઠાવનારા રાજકારણીઓથી હું અલગ છું. હું દલાલ નથી, હું ઈમાનદારીથી કમાવું છું.” તેમણે વિદર્ભમાં 10,000 ખેડૂતોની આત્મહત્યાને શરમજનક ગણાવી અને કહ્યું કે જ્યાં સુધી ખેડૂતો સમૃદ્ધ નહીં થાય, ત્યાં સુધી તેમના પ્રયાસો ચાલુ રહેશે.

પુત્રના બિઝનેસની રસપ્રદ સ્ટોરી

ગડકરીએ તેમના પુત્રના બિઝનેસનો ઉલ્લેખ કરતાં જણાવ્યું કે તે ફક્ત આઈડિયા આપે છે, બાકીનું કામ તેનો પુત્ર સંભાળે છે. તેમના પુત્રએ ઇમ્પોર્ટ-એક્સપોર્ટના બિઝનેસમાં પગ મૂક્યો છે. તેમણે ઈરાનથી 800 કન્ટેનર સફરજનનો ઓર્ડર મેળવ્યો અને ભારતમાંથી 100 કન્ટેનર કેળાંની નિકાસ કરી. આ ઉપરાંત, ગોવાથી 300 કન્ટેનર માછલીઓ સર્બિયા મોકલી.

ખેતીમાં નવી તકો

ગડકરીએ ખેતીના ક્ષેત્રમાં બિઝનેસની તકો પર ભાર મૂકતાં કહ્યું કે આવા પ્રયાસો ખેડૂતોની આવક વધારી શકે છે. તેમણે ઉદાહરણો આપીને સમજાવ્યું કે કેવી રીતે નવીન આઈડિયા અને બિઝનેસ મોડેલ ખેતીને નફાકારક બનાવી શકે છે.

આ નિવેદનો દ્વારા ગડકરીએ એક તરફ ઇથેનોલ નીતિના વિવાદને ખોટો ઠેરવ્યો, તો બીજી તરફ ખેડૂતોના કલ્યાણ પ્રત્યેની તેમની પ્રતિબદ્ધતા પર ભાર મૂક્યો.

આ પણ વાંચો- Indian Economy: ટેરિફની ટેન્શન વચ્ચે શશિ થરૂરનો ટૂરિઝમ ફોર્મ્યુલા, જાણો સંપૂર્ણ ડિટેલ્સ