PNBએ રચ્યો ઇતિહાસ! ભારતીય કેપ્ટન હરમનપ્રીત કૌર બન્યા બેંકના પ્રથમ મહિલા બ્રાન્ડ એમ્બેસેડર

પબ્લિક સેક્ટરની અગ્રણી બેંક, પંજાબ નેશનલ બેંક (PNB) એ એક ઐતિહાસિક જાહેરાત કરી છે. ભારતીય મહિલા ક્રિકેટ ટીમની વર્લ્ડ કપ વિજેતા કેપ્ટન હરમનપ્રીત કૌરને બેંકના પ્રથમ મહિલા બ્રાન્ડ એમ્બેસેડર તરીકે નિયુક્ત કરવામાં આવ્યા છે. બેંકની બ્રાન્ડ ટ્રાન્સફોર્મેશન યાત્રામાં આ એક ખૂબ જ મહત્વપૂર્ણ પગલું માનવામાં આવે છે.

આ જાહેરાત દિલ્હી સ્થિત બેંકના કોર્પોરેટ ઓફિસમાં 'બેંકિંગ ઓન ચેમ્પિયન્સ' થીમ હેઠળ આયોજિત એક ભવ્ય સમારોહમાં કરવામાં આવી હતી. આ કાર્યક્રમમાં મુખ્ય મહેમાન તરીકે નાણાકીય સેવાઓના સચિવ એમ. નાગરાજુ, હરમનપ્રીત કૌર પોતે, તેમજ PNBના MD અને CEO અશોક ચંદ્રા સહિત બેંકની સિનિયર લીડરશિપ હાજર રહી હતી.

આ ખાસ પ્રસંગે હરમનપ્રીત કૌરને તેમના નામ અને જર્સી નંબર સાથેની એક ફ્રેમ કરેલી PNB જર્સી અને એક કસ્ટમ બેટ ભેટમાં આપવામાં આવ્યું હતું.

હરમનપ્રીત કૌરે લોન્ચ કર્યા PNB ના 4 નવા ધમાકેદાર પ્રોડક્ટ્સ

* PNB RuPay મેટલ ક્રેડિટ કાર્ડ Luxura

* PNB One 2.0 (એપનું નવું વર્ઝન)

* Digi Surya Ghar (સૂર્ય ઘર યોજના માટે ડિજિટલ પ્લેટફોર્મ)

* IIBX પોર્ટલ પર PNB ની ઓનબોર્ડિંગ (ગોલ્ડ ટ્રેડિંગ માટે)

PNB સાથે હરમનપ્રીતનો જૂનો અને ખાસ સંબંધ

આ પ્રસંગે પોતાની ખુશી વ્યક્ત કરતાં હરમનપ્રીત કૌરે જણાવ્યું કે, "આ મારા માટે ગૌરવની ક્ષણ છે. હું 18 વર્ષની ઉંમરથી PNB સાથે જોડાયેલી છું. મારું પહેલું બેંક ખાતું PNB ની મોગા બ્રાન્ચમાં ખોલવામાં આવ્યું હતું. આજે આ જ બેંકના બ્રાન્ડ એમ્બેસેડર તરીકે ઊભા રહેવું એ એક સન્માનની વાત છે." તેમણે વધુમાં કહ્યું કે, "PNB એ પેઢીઓથી ભારતીયોના નાણાકીય સપના પૂરા કર્યા છે અને ખાસ કરીને મહિલાઓ અને યુવા પ્રતિભાઓને સશક્ત બનાવવાની તેમની પ્રતિબદ્ધતા પ્રશંસનીય છે." આ સાથે જ, હરમનપ્રીત કૌર PNB ના નવા 'મેટલ ક્રેડિટ કાર્ડ લક્ઝુરા'ના પ્રથમ ગ્રાહક પણ બન્યા.

PNB પરિવારે હરમનપ્રીતનું સ્વાગત કર્યું

PNBના MD અને CEO અશોક ચંદ્રાએ જણાવ્યું કે, “અમને ભારતીય ક્રિકેટ કેપ્ટન અને વર્લ્ડ કપ વિજેતા હરમનપ્રીત કૌરનું PNB પરિવારમાં સ્વાગત કરતાં ખૂબ જ આનંદ થાય છે. PNB ના ઇતિહાસમાં આ પ્રથમ વખત છે કે કોઈ મહિલા અમારી બ્રાન્ડ એમ્બેસેડર બની છે. તેમનું નેતૃત્વ, હિંમત અને શ્રેષ્ઠતા માટેનો પ્રયાસ અમારા બેંકના મૂલ્યો સાથે સંપૂર્ણ રીતે મેળ ખાય છે.” આ ભાગીદારી સાથે, PNB નો ઉદ્દેશ્ય દેશભરના યુવાનો અને ખાસ કરીને મહિલાઓને પ્રેરણા આપવાનો છે, જે દર્શાવે છે કે યોગ્ય સમર્થન અને દ્રષ્ટિથી કોઈપણ લક્ષ્ય હાંસલ કરી શકાય છે.

આ પણ વાંચો- મોબાઈલ ચોરી અને ફ્રોડ રોકવા સરકારનો માસ્ટરસ્ટ્રોક! હવે દરેક નવા સ્માર્ટફોનમાં આ સરકારી એપ