UPIએ તોડ્યા બધા રેકોર્ડ! નવેમ્બરમાં થયું 24.58 લાખ કરોડનું ઐતિહાસિક પેમેન્ટ, જાણો સંપૂર્ણ વિગત

UPI Transaction: ભારતમાં ડિજિટલ પેમેન્ટની દુનિયામાં UPI સતત નવી ઊંચાઈઓ સર કરી રહ્યું છે. નવેમ્બર 2025માં ફરી એકવાર UPI ટ્રાન્ઝેક્શને તેના જૂના તમામ રેકોર્ડ તોડી નાખ્યા છે. નેશનલ પેમેન્ટ્સ કોર્પોરેશન ઓફ ઈન્ડિયા (NPCI) દ્વારા જાહેર કરાયેલા આંકડા મુજબ, આ મહિને લોકોએ UPI દ્વારા કુલ 24.58 લાખ કરોડનું જંગી પેમેન્ટ કર્યું છે.

આંકડા શું કહે છે?

NPCIના ડેટા અનુસાર, 28 નવેમ્બર, 2025 સુધીમાં UPI દ્વારા 19 અબજથી પણ વધુ ટ્રાન્ઝેક્શન નોંધાયા હતા. આ આંકડા દર્શાવે છે કે ભારતીયો હવે રોકડ વ્યવહારને બદલે ડિજિટલ પેમેન્ટ તરફ કેટલી ઝડપથી આગળ વધી રહ્યા છે.

ગત વર્ષની સરખામણીમાં જબરદસ્ત ઉછાળો

નવેમ્બર 2024: આ મહિનામાં UPI દ્વારા કુલ 15.48 અબજ ટ્રાન્ઝેક્શન થયા હતા, જેનું કુલ મૂલ્ય 21.55 લાખ કરોડ હતું.

નવેમ્બર 2025: આ વર્ષે ટ્રાન્ઝેક્શનની સંખ્યામાં લગભગ 23% નો વધારો થયો છે, જ્યારે ટ્રાન્ઝેક્શનના કુલ મૂલ્યમાં લગભગ 14% નો વધારો જોવા મળ્યો છે.

છેલ્લા બે વર્ષના આંકડા જોવામાં આવે તો UPI ટ્રાન્ઝેક્શનની સંખ્યામાં લગભગ 70% અને તેના મૂલ્યમાં 41% નો નોંધપાત્ર વધારો થયો છે.

રોજબરોજના વ્યવહારોમાં પણ વધારો

માત્ર માસિક જ નહીં, પરંતુ દૈનિક વ્યવહારોમાં પણ મોટો વધારો જોવા મળ્યો છે.

નાણાકીય વર્ષ 2024-25: આ સમયગાળામાં દરરોજ સરેરાશ 51.60 કરોડ ટ્રાન્ઝેક્શન થતા હતા, જેનું સરેરાશ મૂલ્ય 71,839 કરોડ હતું.

નાણાકીય વર્ષ 2025-26: અત્યાર સુધીમાં, દૈનિક ટ્રાન્ઝેક્શનની સરેરાશ વધીને 68.96 કરોડ થઈ ગઈ છે અને તેનું દૈનિક મૂલ્ય 91,324 કરોડ પર પહોંચી ગયું છે.

આ આંકડા સ્પષ્ટપણે દર્શાવે છે કે નાના-મોટા દરેક પ્રકારના પેમેન્ટ માટે લોકોનો UPI પર વિશ્વાસ દિવસેને દિવસે વધી રહ્યો છે, જે ભારતના ડિજિટલ અર્થતંત્રને વધુ મજબૂત બનાવી રહ્યું છે.

આ પણ વાંચો- PNBએ રચ્યો ઇતિહાસ! ભારતીય કેપ્ટન હરમનપ્રીત કૌર બન્યા બેંકના પ્રથમ મહિલા બ્રાન્ડ એમ્બેસેડર