SCO Summit: એક મંચ પર PM મોદી, જિનપિંગ, પુતિન અને શહબાઝ શરીફ... SCO નેતાઓનું ગ્રુપ ફોટો સેશન

SCO Summit: વડાપ્રધાન નરેન્દ્ર મોદીએ 31 ઓગસ્ટ 2025ના રોજ ચીનના તિયાનજિનમાં યોજાયેલી શાંઘાઈ કોઓપરેશન ઓર્ગેનાઇઝેશન (SCO) સમિટમાં ભાગ લીધો. આ પ્રસંગે ચીનના રાષ્ટ્રપ્રમુખ શી જિનપિંગે તેમનું ઔપચારિક સ્વાગત કર્યું. સમિટ દરમિયાન મોદી, જિનપિંગ, રશિયાના રાષ્ટ્રપ્રમુખ વ્લાદિમીર પુતિન અને પાકિસ્તાનના વડાપ્રધાન શહબાઝ શરીફ સહિતના નેતાઓ એક મંચ પર જોવા મળ્યા, જ્યાં ગ્રુપ ફોટો સેશન યોજાયું.

હોંગચી કારથી ખાસ આતિથ્ય

ચીન સરકારે વડાપ્રધાન મોદીને સમિટ દરમિયાન ખાસ 'હોંગચી' કાર આપી, જે ચીનની પ્રતિષ્ઠિત લક્ઝરી બ્રાન્ડ છે. આ કારનો ઉપયોગ જિનપિંગ પોતે સત્તાવાર પ્રવાસોમાં કરે છે. 'હોંગચી'નો અર્થ 'લાલ ધ્વજ' થાય છે, જે ચીનની 'મેડ ઇન ચાઇના' ઓળખનું પ્રતીક છે. 2019માં ભારતના મહાબલીપુરમમાં યોજાયેલી સમિટમાં પણ જિનપિંગે 'હોંગચી L5' કારનો ઉપયોગ કર્યો હતો.

સમિટ પહેલા મોદી અને જિનપિંગ વચ્ચે થયેલી બેઠકમાં ચીનના રાષ્ટ્રપ્રમુખે ભારત-ચીન સંબંધો પર ભાર મૂક્યો. તેમણે કહ્યું, "ભારત અને ચીન હરીફ નથી, પરંતુ સાથી છે. મિત્ર બનવું એ બંને દેશો માટે યોગ્ય વિકલ્પ છે." જિનપિંગે ઉમેર્યું કે, બંને દેશોએ સરહદ વિવાદને સંબંધોની ઓળખ ન બનવા દેવી જોઈએ અને લાંબા ગાળાના દ્રષ્ટિકોણથી સંબંધોને મજબૂત કરવા જોઈએ. તેમણે બંને દેશોને વ્યૂહાત્મક સંવાદ વધારવા અને ગ્લોબલ સાઉથની એકતા માટે સહયોગ કરવા હાંકલ કરી.

75મી વર્ષગાંઠનું મહત્વ

આ વર્ષ ભારત અને ચીન વચ્ચે રાજદ્વારી સંબંધોની 75મી વર્ષગાંઠનું છે. જિનપિંગે કહ્યું, "આપણે સારા પડોશી અને વિશ્વસનીય ભાગીદાર બનવું જોઈએ. ડ્રેગન અને હાથીએ સાથે મળીને વિકાસની તકો ઝડપવી જોઈએ." આ બેઠક દ્વિપક્ષીય સંબંધોને નવી દિશા આપવા માટે મહત્વની ગણાય છે.

SCO સમિટે વૈશ્વિક સ્તરે સહયોગ અને સ્થિરતા માટે નેતાઓને એક મંચ પૂરું પાડ્યું, જેમાં ભારત-ચીન સંબંધોની ભાવિ દિશા પર ખાસ ધ્યાન કેન્દ્રિત રહ્યું.

આ પણ વાંચો- India-Australia Housing Project: ભારત ઓસ્ટ્રેલિયામાં બનાવશે 10 લાખ ઘર! બંને દેશ વચ્ચે ચાલી રહી છે મોટી ડીલની ચર્ચા