ખુલી ગયું રહસ્ય! પુતિન અને PM મોદીની કારમાં થયેલી ગુપ્ત વાતચીતનો ખુલાસો, જાણો શું થઈ હતી વાત

Putin Modi car conversation: ચીનમાં યોજાયેલા SCO શિખર સંમેલન દરમિયાન ભારતના વડાપ્રધાન નરેન્દ્ર મોદી અને રશિયાના રાષ્ટ્રપતિ વ્લાદિમીર પુતિનની કારમાં સાથેની મુલાકાતે વિશ્વભરમાં ચર્ચા જગાવી હતી. બંને નેતાઓએ લગભગ 50 મિનિટ સુધી એકબીજા સાથે વાતચીત કરી, પરંતુ આ ચર્ચાનો વિષય શું હતો તે અંગે કોઈ સ્પષ્ટતા નહોતી. હવે રશિયન રાષ્ટ્રપતિ પુતિને આ ગુપ્ત વાતચીતનું રહસ્ય ખોલ્યું છે.

પુતિન અને મોદીની વાતચીતનો વિષય

રશિયન સમાચાર એજન્સી TASSના અહેવાલ મુજબ, ચીનમાં એક પ્રેસ કોન્ફરન્સ દરમિયાન પુતિને જણાવ્યું, "આ કોઈ રહસ્ય નથી. મેં PM મોદીને અલાસ્કામાં અમેરિકી રાષ્ટ્રપતિ ડોનાલ્ડ ટ્રમ્પ સાથે થયેલી મીટિંગ વિશે વાત કરી." આ મીટિંગ યુક્રેન યુદ્ધના મુદ્દે ઓગસ્ટમાં યોજાઈ હતી, અને પુતિને આ જ ચર્ચાની વિગતો મોદી સાથે શેર કરી.

ક્રેમલિનનું નિવેદન

મોસ્કોના નિષ્ણાતોના જણાવ્યા અનુસાર, પુતિનની લિમોઝીનને એવી રીતે ડિઝાઇન કરવામાં આવી છે કે તેમાં થતી વાતચીત સંપૂર્ણપણે સુરક્ષિત રહે. આ જ કારણે બંને નેતાઓએ કદાચ અત્યંત સંવેદનશીલ દ્વિપક્ષીય મુદ્દાઓ પર ચર્ચા કરી હશે. નિષ્ણાતોનું માનવું છે કે આ વાતચીત એવા વિષયો પર હતી જે "બીજા કોઈના કાન સુધી ન પહોંચવી જોઈએ."

ફોન પર પણ થઈ હતી ચર્ચા

અલાસ્કામાં ટ્રમ્પ સાથેની મીટિંગ બાદ પુતિન અને મોદી વચ્ચે ફોન પર પણ વાતચીત થઈ હતી. આ દરમિયાન પુતિને મોદીને અલાસ્કા મીટિંગની માહિતી આપી હતી. PM મોદીએ સોશિયલ મીડિયા પર પોસ્ટ કરીને કહ્યું હતું, "મારા મિત્ર રાષ્ટ્રપતિ પુતિનને ફોન કોલ અને અલાસ્કા મીટિંગની માહિતી શેર કરવા બદલ આભાર."

આ ઘટનાએ ભારત-રશિયા સંબંધોની મજબૂતી અને બંને નેતાઓ વચ્ચેના વિશ્વાસને ફરી એકવાર દર્શાવ્યું છે. SCO સમિટ દરમિયાન થયેલી આ ચર્ચા ભવિષ્યમાં બંને દેશોના સંબંધોને નવી દિશા આપી શકે છે.

આ પણ વાંચો- શિલ્પા શેટ્ટી અને રાજ કુંદ્રા વિરુદ્ધ લુકઆઉટ નોટિસ, 60 કરોડની છેતરપિંડીનો આરોપ