AIની મદદથી નાગપુર પોલીસે 36 કલાકમાં હિટ એન્ડ રન કેસ ઉકેલ્યો, ટ્રક ડ્રાઇવર ઝડપાયો

AI ટેક્નોલોજીનો ઉપયોગ હવે માત્ર બિઝનેસ કે ટેક ક્ષેત્રે જ નહીં, પરંતુ ક્રાઇમ ઇન્વેસ્ટિગેશનમાં પણ થઈ રહ્યો છે. નાગપુર પોલીસે તાજેતરમાં એક હિટ એન્ડ રન કેસમાં AIની મદદથી માત્ર 36 કલાકમાં ટ્રક ડ્રાઇવરને ઝડપી લઈ નવો ઇતિહાસ રચ્યો છે. આ ઘટનાએ સમગ્ર દેશમાં ચર્ચા જગાવી છે, અને AI આધારિત MARVEL સિસ્ટમને પોલીસિંગનું ભવિષ્ય ગણાવવામાં આવી રહ્યું છે.

શું હતો કેસ?

9 ઓગસ્ટના રોજ નાગપુરમાં એક ટ્રકે બાઇક પર સવાર દંપતીને ટક્કર મારી હતી. આ દુર્ઘટનામાં પત્નીનું મોત થયું, જ્યારે પતિ ગંભીર રીતે ઘાયલ થયો. આ ઘટનાનો એક વીડિયો વાયરલ થયો, જેમાં ઘાયલ પતિ પોતાની પત્નીના મૃતદેહને બાઇક પર બાંધીને મધ્ય પ્રદેશના પોતાના ગામે લઈ જવાનો પ્રયાસ કરતો જોવા મળ્યો. આ દ્રશ્યએ લોકોનું હૃદય હચમચાવી દીધું.

પોલીસે જ્યારે ઘાયલ પતિ સાથે વાત કરી, ત્યારે તે ફક્ત એટલું જ કહી શક્યો કે ટ્રક પર લાલ નિશાન હતા. ટ્રકની સાઇઝ કે કંપની વિશે તે કોઈ માહિતી ન આપી શક્યો.

નાગપુર ગ્રામીણના પોલીસ અધિક્ષક હર્ષ પોદ્દારના જણાવ્યા મુજબ, આટલી ઓછી માહિતી સાથે આરોપીને શોધવું અશક્ય જેવું હતું. પરંતુ પોલીસે હાર ન માની અને AI ટેક્નોલોજીનો ઉપયોગ કર્યો. ઘટનાસ્થળની આસપાસના ત્રણ ટોલ નાકાઓના CCTV ફૂટેજ એકત્ર કરવામાં આવ્યા. આ ફૂટેજને બે અલગ-અલગ AI એલ્ગોરિધમ દ્વારા તપાસવામાં આવ્યા, જે કમ્પ્યુટર વિઝન ટેક્નોલોજી પર આધારિત હતા.

પ્રથમ એલ્ગોરિધમે ફૂટેજમાં લાલ નિશાનવાળા ટ્રકો શોધી કાઢ્યા. ત્યારબાદ બીજા એલ્ગોરિધમે આ ટ્રકોની એવરેજ સ્પીડનું વિશ્લેષણ કરીને નક્કી કર્યું કે કયો ટ્રક હાદસામાં સામેલ હોઈ શકે. આ માહિતીના આધારે નાગપુર ગ્રામીણ પોલીસે ગ્વાલિયર-કાનપુર હાઇવે પરથી ટ્રક અને તેના ડ્રાઇવરને 36 કલાકમાં ઝડપી લીધો.

દેશનું પ્રથમ AI આધારિત પોલીસ સિસ્ટમ

મહારાષ્ટ્ર પોલીસે આ કેસમાં MARVEL (Maharashtra Richard and Vigilance for Enhanced Law Enforcement) નામના AI સિસ્ટમનો ઉપયોગ કર્યો, જે દેશનું પ્રથમ રાજ્ય-સ્તરીય AI આધારિત પોલીસ સિસ્ટમ છે. આ સિસ્ટમનો હેતુ પોલીસ અને સરકારી વિભાગોમાં AIનો ઉપયોગ વધારવાનો છે, જેથી બાહ્ય સ્ત્રોતો પર નિર્ભરતા ઘટે અને સરકારી ડેટાનું ઝડપી વિશ્લેષણ થઈ શકે.

12-15 મિનિટમાં CCTV ફૂટેજનું વિશ્લેષણ

પોલીસ અધિકારીઓના જણાવ્યા મુજબ, અગાઉ આવા કેસોમાં ડેટા વિશ્લેષણ માટે અનુભવી અધિકારીઓની જરૂર પડતી, જેમાં ભૂલની શક્યતા રહેતી. આવા કેસો ઉકેલવામાં અઠવાડિયાં કે મહિનાઓ લાગી શકતા. પરંતુ AI અને ફાસ્ટ પ્રોસેસરની મદદથી 12 કલાકના CCTV ફૂટેજનું વિશ્લેષણ માત્ર 12-15 મિનિટમાં થઈ ગયું. આ ટેક્નોલોજીએ નાગપુર પોલીસને ઝડપી અને સચોટ રીતે કેસ ઉકેલવામાં મદદ કરી.

ભવિષ્ય માટે આશાસ્પદ શરૂઆત

આ ઘટનાએ સાબિત કર્યું છે કે AI ટેક્નોલોજી પોલીસિંગના ક્ષેત્રે ગેમ-ચેન્જર બની શકે છે. MARVEL સિસ્ટમની સફળતા દેશની અન્ય પોલીસ માટે પ્રેરણાદાયી છે. આવી ટેક્નોલોજીનો ઉપયોગ ભવિષ્યમાં ક્રાઇમ રેટ ઘટાડવા અને ઝડપી ન્યાય પૂરો પાડવામાં મદદરૂપ થઈ શકે છે.

આ પણ વાંચો- GST Registration: રજિસ્ટ્રેશન હવે માત્ર 3 દિવસમાં! રિફંડમાં પણ ઝડપી પ્રક્રિયા