AMC ચૂંટણી 2026: OBC બેઠકો 19થી વધીને 52, સામાન્ય 76થી ઘટીને 59 – મહિલાઓ 96 બેઠકો પર લડશે, મૂરતિયાઓમાં થનગનાટ!

AMC Election 2026: અમદાવાદ મ્યુનિસિપલ કોર્પોરેશન (AMC)ની આગામી સામાન્ય ચૂંટણી ફેબ્રુઆરી 2026માં યોજાશે. રાજ્ય ચૂંટણી પંચે 28 ઓક્ટોબરે બેઠકોની નવી ફાળવણી જાહેર કરી છે, જેમાં મોટા ફેરફારો જોવા મળ્યા છે. કુલ 192 બેઠકોમાં OBC માટે 27 ટકા અનામતને કારણે બેઠકો 19થી વધીને 52 થશે, જ્યારે સામાન્ય શ્રેણીની બેઠકો 76થી ઘટીને 59 થશે. આ ફેરફારથી રાજકીય પક્ષોમાં હલચલ વધી છે.

અનામતનું નવું માળખું

મહિલા અનામત: 50 ટકા અનામતને કારણે 96 બેઠકો મહિલાઓ માટે અનામત રહેશે.

અનુસૂચિત જાતિ (SC): 20 બેઠકો યથાવત. આમાંથી 10 બેઠકો SC મહિલાઓ માટે અનામત.

OBC: 52 બેઠકો (27 ટકા અનામત).

સામાન્ય: 59 બેઠકો.

કુલ અનામત બેઠકો 133 થશે, જેમાં OBCનો મોટો હિસ્સો છે.

વોર્ડ વાઇઝ OBC અનામત

શહેરમાં 48 વોર્ડ છે. ચાંદખેડા વોર્ડ સિવાયના 47 વોર્ડમાં દરેકમાં ઓછામાં ઓછી 1 OBC બેઠક અનામત રહેશે. 5 વોર્ડમાં 2-2 OBC બેઠકો રહેશે: ચાંદલોડિયા, કુબેરનગર, નવરંગપુરા, જમાલપુર અને મણિનગર.

OBC મહિલા અનામત વોર્ડ (26 વોર્ડ)

ચાંદલોડિયા, રાણીપ, નવા વાડજ, થલતેજ, નારણપુરા, સરદારનગર, સૈજપુર, કુબેરનગર, નવરંગપુરા, જોધપુર, દરિયાપુર, વિરાટનગર, બાપુનગર, ખાડીયા, જમાલપુર, વાસણા, સરખેજ, મકતમપુરા, દાણીલીમડા, મણિનગર, ગોમતીપુર, અમરાઈવાડી, ઓઢવ, ઈન્દ્રપુરી, ભાઈપુરા, રામોલ-હાથીજણ.

OBC પુરુષ અનામત વોર્ડ (26 વોર્ડ)

ગોતા, ચાંદલોડીયા, સાબરમતી, ઘાટલોડીયા, સરદાર પટેલ સ્ટેડિયમ વોર્ડ, નરોડા, કુબેરનગર, અસારવા, શાહીબાગ, શાહપુર, નવરંગપુરા, બોડકદેવ, ઈન્ડિયા કોલોની, ઠક્કરબાપાનગર, નિકોલ, સરસપુર, જમાલપુર, પાલડી, વેજલપુર, બહેરામપુરા, મણિનગર, વસ્ત્રાલ, ખોખરા, લાંભા, વટવા.

SC અનામત વોર્ડ, SC મહિલા (10 બેઠકો)

સાબરમતી, ઘાટલોડિયા, સરદાર પટેલ સ્ટેડિયમ વોર્ડ, શાહીબાગ, બોડકદેવ, ઈન્ડિયા કોલોની, સરસપુર-રખિયાલ, બહેરામપુરા, વસ્ત્રાલ, વટવા.

SC પુરુષ (10 બેઠકો)

ચાંદખેડા, થલતેજ, નારણપુરા, સૈજપુર, ખાડિયા, મકતમપુરા, દાણીલીમડા, ગોમતીપુર, અમરાઈવાડી, ભાઈપુરા. દખેડા વોર્ડમાં SC માટે 1 પુરુષ અને 1 મહિલા બેઠક અનામત છે. વાસણા વોર્ડમાં 1 SC પુરુષ બેઠક અનામત છે.

ચાંદખેડા વોર્ડમાં OBC અનામત નહીં

ચાંદખેડા વોર્ડમાં પહેલેથી SC (1 પુરુષ, 1 મહિલા) અને ST (1 મહિલા) બેઠકો અનામત હોવાથી અહીં OBC અનામત લાગુ થશે નહીં.

રાજકીય હલચલ

ભાજપ, કોંગ્રેસ અને MIMના કોર્પોરેટરોમાં ટિકિટ માટે દોડધામ શરૂ થઈ ગઈ છે. ભાજપની ‘નો રીપીટ થિયરી’ હેઠળ 3 કે તેથી વધુ ટર્મવાળા કોર્પોરેટરોની ટિકિટ કપાશે. બેઠકોના રોટેશનથી પણ કચવાટ વધ્યો છે. ચૂંટણીમાં 2011ની વસ્તી ગણતરી (56.64 લાખ) આધારે વોર્ડ દીઠ સરેરાશ 1.18 લાખ વસ્તી ગણાશે. નવા અનામત નિયમો પક્ષો માટે મોટો પડકાર બનશે.