Lok Sabha Election 2024: લોકસભા ચૂંટણી માટે ભાજપની ફૂલ તૈયારી, આગામી સપ્તાહે જાહેર થઈ શકે છે ઉમેદવારોની પ્રથમ યાદી

Lok Sabha Election 2024: આગામી લોકસભા ચૂંટણીની જાહેરાત થોડા દિવસો બાદ થઈ શકે છે. સૂત્રોનું માનીએ તો આગામી મહિનાના મધ્યમાં લોકસભા ચૂંટણીની તારીખોની જાહેરાત થઈ શકે છે. આવી સ્થિતિમાં ભાજપ આવતા સપ્તાહે ગુરુવારે પોતાના ઉમેદવારોની પ્રથમ યાદી જાહેર કરી શકે છે. એનડીટીવીએ સૂત્રોના હવાલાથી જણાવ્યું છે કે પીએમ નરેન્દ્ર મોદી અને કેન્દ્રીય ગૃહ પ્રધાન અમિત શાહ જેવા દિગ્ગજ બીજેપી નેતાઓના નામ ભાજપની પ્રથમ યાદીમાં હોઈ શકે છે.

ભાજપ પોતાની પ્રથમ યાદીમાં લગભગ 100 ઉમેદવારોના નામની જાહેરાત કરી શકે છે. પીએમ નરેન્દ્ર મોદી ઉત્તર પ્રદેશના વારાણસીથી સાંસદ છે, જ્યારે કેન્દ્રીય ગૃહ પ્રધાન અમિત શાહ ગુજરાતના ગાંધીનગરથી સાંસદ છે. આગામી સપ્તાહે ગુરુવારે ભાજપની કેન્દ્રીય ચૂંટણી સમિતિની બેઠક યોજાવાની છે, જેમાં ઉમેદવારોના નામ પર ચર્ચા થવાની છે. આવી સ્થિતિમાં, આ બેઠક પછી ભાજપ તે જ દિવસે તેના ઉમેદવારોની પ્રથમ યાદી જાહેર કરી શકે છે. ભાજપનો દાવો છે કે આ લોકસભા ચૂંટણીમાં એનડીએને 400થી વધુ બેઠકો મળશે, જ્યારે ભાજપે 370 બેઠકો જીતવાનું લક્ષ્ય રાખ્યું છે.

ચૂંટણી પંચના અધિકારીઓ હાલમાં વિવિધ રાજ્યોની મુલાકાત લઈને સામાન્ય ચૂંટણીની તૈયારીઓનું નિરીક્ષણ કરી રહ્યા છે. તાજેતરમાં, પશ્ચિમ બંગાળ, બિહાર જેવા રાજ્યોની મુલાકાત લેવામાં આવી છે, જ્યારે ઉત્તર પ્રદેશ, જમ્મુ અને કાશ્મીર વગેરેની મુલાકાત લેવાની બાકી છે. સૂત્રોનું કહેવું છે કે જ્યારે રાજ્યના પ્રવાસો પૂરા થઈ જશે ત્યારે આગામી મહિને 13 માર્ચ પછી ગમે ત્યારે લોકસભા ચૂંટણીની તારીખોની જાહેરાત થઈ શકે છે. છેલ્લી 2019 લોકસભા ચૂંટણીની વાત કરીએ તો, 11 એપ્રિલથી 19 મે સુધી સાત તબક્કામાં મતદાન થયું હતું, જ્યારે પરિણામો 23 મેના રોજ જાહેર કરવામાં આવ્યા હતા.

આ પણ વાંચો - Sudarshan setu: સ્ટીલ અને કોંક્રીટની તાકાત, સૌર ઉર્જાનો સ્ત્રોત અને ગીતાની પ્રેરણા... સિવિલ એન્જિનિયરિંગનું પાવરફૂલ પ્રતિક છે સુદર્શન બ્રિજ