ગુજરાત સરકારનું મોટું મંત્રીમંડળ: 26 મંત્રીઓ સાથે CM ભૂપેન્દ્ર પટેલની ટીમમાં મોટો ફેરબદલ, આજે શપથવિધિ

Big Cabinet of Gujarat Government: ગુજરાતના રાજકીય આકાશમાં આજે એક મોટો વળાંક આવવાની તૈયારી છે. મુખ્યમંત્રી ભૂપેન્દ્ર પટેલના નેતૃત્વ હેઠળની ભાજપ સરકારમાં મોટા પાયે ફેરબદલ કરવામાં આવી રહ્યું છે. આજે તારીખ 16 ઓક્ટોબર 2025ના રોજ સવારે 11:30 વાગ્યે ગાંધીનગર સ્થિત મહાત્મા મંદિર ખાતે નવા મંત્રીમંડળની શપથવિધિ યોજાઈ રહી છે.

મંચ પર 26 ખુરશીઓ: વિશાળ મંત્રીમંડળનો સંકેત

શપથવિધિના સ્થળ પર કરવામાં આવેલી વ્યવસ્થા એ જ સ્પષ્ટ સંદેશો આપી રહી છે કે આ વખતે મંત્રીમંડળ નોંધપાત્ર રીતે મોટું બનવાનું છે. મહાત્મા મંદિરના સ્ટેજ પર કુલ 26 ખુરશીઓ ગોઠવવામાં આવી છે, જે દર્શાવે છે કે મુખ્યમંત્રી સહિત 26 સભ્યોનું નવું મંત્રીમંડળ બનવાની તૈયારી છે. અગાઉના મંત્રીમંડળમાં મુખ્યમંત્રી સહિત માત્ર 17 મંત્રીઓ હતા, જે હવે લગભગ 9 નવા ચહેરાઓના સમાવેશ સાથે વધીને 26 થવાનું છે. ગુજરાત વિધાનસભામાં કુલ 182 સભ્યો છે અને બંધારણીય જોગવાઈ મુજબ મુખ્યમંત્રી સહિત મહત્તમ 27 મંત્રીઓ રાખી શકાય છે. આ રીતે આ વખતનું મંત્રીમંડળ બંધારણીય મર્યાદાની લગભગ નજીક જ પહોંચી રહ્યું છે.

તમામ મંત્રીઓએ આપ્યા રાજીનામા

રાજ્યપાલ લેવડાવશે શપથ, BJP હાઈકમાન્ડની હાજરી

આજે બપોરે યોજાનારી આ શપથવિધિમાં ગુજરાતના રાજ્યપાલ આચાર્ય દેવવ્રત નવા મંત્રીઓને હોદ્દા અને ગુપ્તતાના શપથ લેવડાવશે. આ મહત્વપૂર્ણ કાર્યક્રમમાં ભાજપના રાષ્ટ્રીય પ્રમુખ જે.પી. નડ્ડા અને ગુજરાત ભાજપ ના પ્રદેશ પ્રમુખ જગદીશ વિશ્વકર્મા પણ હાજર રહેવાના છે. આ ઉપરાંત ભાજપના તમામ ધારાસભ્યો પણ આ સમારોહમાં ઉપસ્થિત રહેશે. પાર્ટી હાઈકમાન્ડની હાજરી એ સ્પષ્ટ દર્શાવે છે કે આ ફેરબદલ માત્ર રાજ્ય સ્તરનો નિર્ણય નથી, પરંતુ દિલ્હીમાં બેઠેલા ટોચનું નેતૃત્વના માર્ગદર્શન હેઠળ લેવાયેલો સ્ટ્રેટેજીનો ભાગ છે.

નવા અને જૂના ચહેરાઓનું સંતુલન

સૂત્રોના જણાવ્યા અનુસાર આ નવા મંત્રીમંડળમાં જૂના અનુભવી મંત્રીઓને તેમની જગ્યા જાળવી રાખવામાં આવી શકે છે, સાથે જ લગભગ 10 જેટલા નવા ચહેરાઓને તક મળવાની શક્યતા છે. નવા મંત્રીઓમાં કોંગ્રેસમાંથી ભાજપમાં જોડાયેલા કેટલાક ધારાસભ્યોનો પણ સમાવેશ થઈ શકે છે. આ કવાયત દ્વારા પાર્ટી એ એક તરફ અનુભવી નેતાઓની કુશળતાનો લાભ લેવા અને બીજી તરફ યુવા અને નવા નેતાઓને તક આપવા વચ્ચે સંતુલન સાધવાનો પ્રયાસ કરી રહી છે.

Deputy CMની ચર્ચા પણ જોરશોરથી

રાજકીય વર્તુળોમાં નાયબ મુખ્યમંત્રીની નિમણૂક અંગે પણ ચર્ચાઓ ચાલી રહી છે. જોકે આ સંદર્ભે હજુ સુધી કોઈ સત્તાવાર જાહેરાત કરવામાં આવી નથી. જો નાયબ મુખ્યમંત્રી બનાવવામાં આવે તો તે ગુજરાત સરકારના માળખામાં એક મહત્વપૂર્ણ ફેરફાર ગણાશે.કહેવાય છે કે જે ધારાસભ્યોને મંત્રી બનાવવાનું નક્કી થયું છે તેમને ફોન દ્વારા પહેલેથી જ ઇન્ફોર્મ કરી દેવામાં આવ્યા છે અને તેઓને આજની શપથવિધિમાં ઉપસ્થિત રહેવા માટે કહેવામાં આવ્યું છે.

આ પણ વાંચો- PMAY-Urban 2.0માં મોટો નિર્ણય: કેન્દ્રે 1.41 લાખ નવા ઘરોને આપી મંજૂરી, ગુજરાત સહિત 14 રાજ્યોને ફાયદો