‘કાશ્મીરનો ગુસ્સો લાલ કિલ્લા પર દેખાયો’, મહેબૂબા મુફ્તીના વિવાદિત નિવેદનથી ગરમાયું રાજકારણ, BJPએ સાધ્યું નિશાન

Mehbooba Mufti on Lal Qila Blast: PDP પ્રમુખ અને જમ્મુ-કાશ્મીરના પૂર્વ મુખ્યમંત્રી મહેબૂબા મુફ્તીએ લાલ કિલ્લા પાસે થયેલા વિસ્ફોટને કાશ્મીરની અશાંતિ સાથે જોડીને એક નવો રાજકીય વિવાદ ઊભો કર્યો છે. તેમના આ નિવેદન બાદ ભાજપે તેમના પર આકરા પ્રહાર કર્યા છે અને આતંકવાદને યોગ્ય ઠેરવવાનો આરોપ લગાવ્યો છે.

મહેબૂબા મુફ્તીએ કેન્દ્ર સરકારની નીતિઓ પર સવાલ ઉઠાવતા કહ્યું કે લાલ કિલ્લા પાસે થયેલો બ્લાસ્ટ દેશમાં વધતી અસુરક્ષા અને જમ્મુ-કાશ્મીરમાં કેન્દ્ર સરકારની નિષ્ફળતા દર્શાવે છે. જોકે, ભાજપે મુફ્તીના આ નિવેદનની સખત નિંદા કરી છે અને તેમના પર હુમલાખોરો માટે બહાના બનાવવાનો આરોપ મૂક્યો છે.

ભાજપનો પલટવાર

ભાજપના પ્રવક્તા પ્રદીપ ભંડારીએ સોશિયલ મીડિયા પ્લેટફોર્મ X  પર મહેબૂબા મુફ્તી પર નિશાન સાધ્યું. તેમણે પોતાની પોસ્ટમાં લખ્યું, “આતંકવાદી બુરહાન વાનીનું સમર્થન કરનારા મુફ્તી હવે લાલ કિલ્લા વિસ્ફોટના આતંકવાદીઓને યોગ્ય ઠેરવી રહ્યા છે. તેઓ કહે છે કે 'આતંકવાદ માટે હિંદુ-મુસ્લિમ અને નફરત જવાબદાર છે.'"

મહેબૂબા મુફ્તીએ શું કહ્યું હતું?

મહેબૂબા મુફ્તીએ કેન્દ્ર સરકાર પર પ્રહાર કરતાં કહ્યું, "તમે (કેન્દ્ર સરકાર) દુનિયાને જણાવ્યું કે કાશ્મીરમાં બધું બરાબર છે, પરંતુ કાશ્મીરની સમસ્યાઓ હવે લાલ કિલ્લા સામે ગુંજી રહી છે. તમે જમ્મુ-કાશ્મીરને સુરક્ષિત બનાવવાનું વચન આપ્યું હતું, પરંતુ તે વચન પૂરું કરવાને બદલે, તમારી નીતિઓએ દિલ્હીને અસુરક્ષિત બનાવી દીધું છે."

તેમણે વધુમાં કહ્યું, "મને ખબર નથી કે કેન્દ્ર સરકારમાં કેટલા લોકો સાચા રાષ્ટ્રવાદી છે. જો એક ભણેલો-ગણેલો યુવાન, એક ડૉક્ટર, પોતાના શરીર પર RDX બાંધીને પોતાને અને અન્યને મારી નાખે, તો તેનો અર્થ એ છે કે દેશમાં કોઈ સુરક્ષા નથી. તમે હિંદુ-મુસ્લિમની રાજનીતિ કરીને વોટ તો મેળવી શકો છો, પરંતુ દેશ કઈ દિશામાં જઈ રહ્યો છે?"

મુફ્તીએ આરોપ લગાવ્યો કે વિભાજનકારી રાજનીતિ રાષ્ટ્રીય સુરક્ષા પર હાવી થઈ ગઈ છે. તેમણે કહ્યું, "મને નથી ખબર કે દિલ્હીના લોકો આ સમજે છે કે નહીં, અથવા તેઓ વિચારે છે કે જેટલું વધુ હિંદુ-મુસ્લિમ વિભાજન થશે, જેટલો વધુ રક્તપાત થશે અને દેશમાં જેટલું વધુ ધ્રુવીકરણ થશે, તેટલા વધુ વોટ તેમને મળશે? મને લાગે છે કે તેમણે ફરીથી વિચારવું જોઈએ. દેશ ખુરશી કરતાં ઘણો મોટો છે."

તેમણે એમ પણ ઉમેર્યું કે "ક્યાંક ને ક્યાંક, આ ઝેરી વાતાવરણ પણ કાશ્મીરના યુવાનોને ખતરનાક માર્ગ પર ધકેલવા માટે જવાબદાર છે."

આ પણ વાંચો-ભાજપનો અત્યાર સુધીનો સૌથી મોટો રેકોર્ડ, 2014ને પણ પાછળ છોડ્યું, હવે 1800 ધારાસભ્યોનું લક્ષ્ય!