Ayushman Bharat Yojana: 600થી વધુ પ્રાઇવેટ હોસ્પિટલોએ આયુષ્માન ભારત યોજનામાંથી હાથ પાછા ખેંચ્યા, યાદીમાં ગુજરાત ટોચ પર

Ayushman Bharat Yojana: પ્રાઇવેટ હોસ્પિટલોનું કહેવું છે કે યોજના હેઠળ નક્કી કરેલા ઓછા દરો અને ચુકવણીમાં થતી વિલંબ તેમના માટે કામગીરીને મુશ્કેલ બનાવી રહ્યા છે. ભારત સરકારની મહત્વાકાંક્ષી આરોગ્ય યોજના, આયુષ્માન ભારત-પ્રધાનમંત્રી જન આરોગ્ય યોજના (AB-PMJAY)ને લઈને મોટા સમાચાર સામે આવ્યા છે. સરકારી આંકડાઓ મુજબ, આ યોજના શરૂ થયા બાદથી અત્યાર સુધીમાં 600થી વધુ પ્રાઇવેટ હોસ્પિટલોએ સ્વેચ્છાએ તેમાંથી બહાર નીકળવાનો નિર્ણય લીધો છે.

ગુજરાતમાં સૌથી વધુ હોસ્પિટલો બહાર નીકળી

આયુષ્માન ભારત યોજનામાંથી બહાર નીકળનારી પ્રાઇવેટ હોસ્પિટલોમાં ગુજરાત રાજ્યની સંખ્યા સૌથી વધુ છે. અહીં 233 હોસ્પિટલોએ યોજનામાંથી ખસી જવાનું પસંદ કર્યું છે. તે પછી કેરળમાં 146 અને મહારાષ્ટ્રમાં 83 હોસ્પિટલોએ પણ આવું જ પગલું ભર્યું છે. આરોગ્ય અને પરિવાર કલ્યાણ રાજ્ય મંત્રી પ્રતાપરાવ જાધવે રાજ્યસભામાં આપેલી માહિતી મુજબ, કુલ 609 પ્રાઇવેટ હોસ્પિટલો અત્યાર સુધી આ યોજનામાંથી બહાર થઈ ચૂકી છે. આ સ્થિતિ એ યોજના માટે ચિંતાનો વિષય બની ગઈ છે, જેનો ઉદ્દેશ દેશના 10 કરોડ પરિવારો અથવા લગભગ 50 કરોડ લોકોને આરોગ્ય સુરક્ષા પૂરી પાડવાનો છે.

પ્રાઇવેટ હોસ્પિટલોની ફરિયાદો

છત્તીસગઢ અને ગુજરાત જેવા રાજ્યોમાં કેટલાક સારવાર પેકેજ ફક્ત સરકારી હોસ્પિટલો માટે રિઝર્વ હોવા અને સરકારી હોસ્પિટલોમાંથી કોઈ રેફરલ ન મળવાના કારણે પણ પ્રાઇવેટ હોસ્પિટલો બહાર નીકળી રહી છે. મંત્રી જાધવે જણાવ્યું કે રાષ્ટ્રીય આરોગ્ય પ્રાધિકરણ (NHA)એ રાજ્યની હોસ્પિટલો માટે 15 દિવસમાં અને રાજ્યની બહારની હોસ્પિટલો માટે 30 દિવસમાં ક્લેમની ચુકવણી કરવાના નિર્દેશો જાહેર કર્યા છે.

યોજનાનો ઉદ્દેશ્ય અને હાલની સ્થિતિ

આયુષ્માન ભારત યોજના 23 સપ્ટેમ્બર, 2018ના રોજ પ્રધાનમંત્રી નરેન્દ્ર મોદીએ ઝારખંડના રાંચીમાં શરૂ કરી હતી. આ યોજના ગરીબ અને નબળા પરિવારોને દર વર્ષે 5 લાખ રૂપિયા સુધીનું મફત આરોગ્ય વીમો પૂરું પાડે છે. શરૂઆતમાં આ યોજનામાં 10.74 કરોડ ગરીબ પરિવારો સામેલ હતા, જે 2011ની સામાજિક આર્થિક અને જાતિ ગણતરી (SECC) મુજબ ભારતની વસ્તીના નીચલા 40 ટકા હતા. જાન્યુઆરી 2022માં લાભાર્થીઓનો આધાર સુધારીને 55.0 કરોડ વ્યક્તિઓ અથવા 12.34 કરોડ પરિવારો સુધી કરાયો. 2024માં 37 લાખ આશા અને આંગણવાડી કાર્યકરો તેમજ તેમના પરિવારોને મફત આરોગ્ય સેવાના લાભ માટે સામેલ કરાયા, અને વર્ષના અંતે 70 વર્ષથી વધુ ઉંમરના 6 કરોડ વરિષ્ઠ નાગરિકોને પણ આમાં ઉમેરવાની જાહેરાત થઈ.

સરકારનો જવાબ

સરકારનું કહેવું છે કે તે આ સમસ્યાને ઉકેલવા પગલાં લઈ રહી છે. હરિયાણામાં આયુષ્માન ભારતના સંયુક્ત સીઈઓ અંકિતા અધિકારીએ જણાવ્યું કે ભંડોળ છોડવાની પ્રક્રિયા શરૂ થઈ ગઈ છે અને એક સપ્તાહમાં સ્થિતિ સંભાળી લેવાશે. કેન્દ્ર સરકારે પ્રાઇવેટ હોસ્પિટલોની ફરિયાદોને ગંભીરતાથી લઈને પેકેજ દરોની સમીક્ષા અને ચુકવણી પ્રક્રિયાને ઝડપી બનાવવાની વાત કરી છે.

આગળના પડકારો

આ યોજનાએ અત્યાર સુધી કરોડો દર્દીઓને લાભ આપ્યો છે અને લગભગ 36 કરોડ લોકોને આયુષ્માન કાર્ડ જારી થયા છે, પરંતુ પ્રાઇવેટ હોસ્પિટલોનું બહાર નીકળવું તેના ભવિષ્ય માટે જોખમ બની શકે છે. નિષ્ણાતો માને છે કે જો ચુકવણી પ્રણાલીમાં સુધારો નહીં થાય તો વધુ હોસ્પિટલો બહાર નીકળી શકે છે, જેનું સૌથી વધુ નુકસાન ગરીબ અને જરૂરિયાતમંદ દર્દીઓને થશે.

આ પણ વાંચો- દીકરા માટે... એલન મસ્કની દીકરીએ લગાવ્યા ગંભીર આરોપ, પિતા પ્રત્યે આટલી નફરત કેમ?