બિહારમાં રાજકીય ભૂકંપ: NDA જીત્યું, પણ નીતિશ કુમારના 10મી વખત CM બનવા પર ભાજપના નિવેદનથી સસ્પેન્સ!

Bihar Election Result: બિહાર વિધાનસભા ચૂંટણીના પરિણામોએ સ્પષ્ટ કરી દીધું છે કે જનતાએ ફરી એકવાર એનડીએ (NDA) પર વિશ્વાસ મૂક્યો છે. 200થી વધુ બેઠકો પર બઢત સાથે એનડીએ ગઠબંધન ભવ્ય વિજય તરફ આગળ વધી રહ્યું છે, જેના કારણે ભાજપ અને જેડીયુના કાર્યકરોમાં ભારે ઉત્સાહનો માહોલ છે. જોકે, આ ભવ્ય જીતની સાથે જ એક મોટો પ્રશ્ન પણ ઉભો થયો છે - બિહારનો આગામી મુખ્યમંત્રી કોણ બનશે? આમ તો ચૂંટણી નીતિશ કુમારના નેતૃત્વમાં લડાઈ હતી, પરંતુ હવે ભાજપના એક નિવેદને આખી પરિસ્થિતિને રોચક બનાવી દીધી છે.

નીતિશ કુમારના નામ પર સસ્પેન્સ કેમ?

ચૂંટણી પ્રચાર દરમિયાન ભાજપના નેતાઓ સ્પષ્ટપણે કહેતા હતા કે એનડીએ જીતશે તો મુખ્યમંત્રી નીતિશ કુમાર જ બનશે. પરંતુ, હવે પરિણામો આવ્યા બાદ ભાજપના મહાસચિવ વિનોદ તાવડેના એક નિવેદને રાજકીય ગલિયારામાં હલચલ મચાવી દીધી છે. તેમણે જણાવ્યું કે, "અમે બિહારની ચૂંટણી નીતિશ કુમારના નેતૃત્વમાં લડી છે, પરંતુ મુખ્યમંત્રી કોણ બનશે તેનો અંતિમ નિર્ણય ગઠબંધનના પાંચેય પક્ષો સાથે મળીને લેશે." આ નિવેદન સૂચવે છે કે નીતિશ કુમારનું 10મી વખત મુખ્યમંત્રી બનવું હવે નક્કી નથી અને તેના પર ચર્ચા થઈ શકે છે. એનડીએ ગઠબંધનમાં ભાજપ (BJP) અને જેડીયુ (JDU) ઉપરાંત જીતન રામ માંઝીની પાર્ટી 'હમ' (HAM), ઉપેન્દ્ર કુશવાહાની 'આરએમએલ' (RML) અને ચિરાગ પાસવાનની 'એલજેપીઆર' (LJP-R) પણ સામેલ છે.

ચૂંટણી પરિણામોમાં NDA નો દબદબો

ચૂંટણી પંચના બપોરે સાડા ત્રણ વાગ્યા સુધીના આંકડાઓ મુજબ, બિહારમાં NDAની સુનામી જોવા મળી રહી છે. બેઠકો પર આગળ ચાલી રહેલા પક્ષોની સ્થિતિ આ મુજબ છે...

* BJP (ભારતીય જનતા પાર્ટી): 94 બેઠકો પર આગળ

* નીતિશ કુમારની પાર્ટી (JDU): 84 બેઠકો પર બઢત

* RJD (રાષ્ટ્રીય જનતા દળ): 25 બેઠકો પર આગળ

* ચિરાગ પાસવાનની પાર્ટી (LJP-R): 19 બેઠકો પર આગળ

* AIMIM: 6 બેઠકો પર આગળ

* હમ (HAM): 5 બેઠકો પર આગળ

* ઉપેન્દ્ર કુશવાહાની પાર્ટી (RML): 4 બેઠકો પર આગળ

* અન્ય: 6 બેઠકો પર આગળ

આ ચૂંટણીમાં ભાજપે બિહારમાં પોતાનું સર્વશ્રેષ્ઠ પ્રદર્શન કર્યું છે. 94 બેઠકો પર બઢત સાથે ભાજપે પોતાનો જ જૂનો રેકોર્ડ તોડી નાખ્યો છે. આ પહેલા, વર્ષ 2010ની વિધાનસભા ચૂંટણીમાં ભાજપે 91 બેઠકો જીતી હતી. આ શાનદાર પ્રદર્શનને કારણે ગઠબંધનમાં ભાજપ એક મોટા ભાઈની ભૂમિકામાં આવી ગયું છે, અને આ જ કારણ છે કે મુખ્યમંત્રી પદ માટે તેમનો દાવો વધુ મજબૂત બની શકે છે. હવે જોવાનું એ રહેશે કે ગઠબંધનની બેઠકમાં નીતિશ કુમારના નામ પર સર્વસંમતિ સધાય છે કે પછી કોઈ નવું નામ સામે આવે છે.

આ પણ વાંચો - અમદાવાદ પ્લેન ક્રેશ: પાયલટની ભૂલ નહોતી? સરકારે કર્યો સૌથી મોટો ખુલાસો, સુપ્રીમ કોર્ટના નિવેદનથી કેસમાં નવો વળાંક