રાહુલ ગાંધી: ગુજરાત કોંગ્રેસના સિનિયર નેતાઓ પર ઉઠાવ્યા સવાલ, જિલ્લા પ્રમુખોની પસંદગી પ્રક્રિયા પર કરી ટિપ્પણી

કોંગ્રેસના નેતા અને લોકસભામાં વિપક્ષના નેતા રાહુલ ગાંધીનો એક વીડિયો સોશિયલ મીડિયા પર વાયરલ થયો છે, જેમાં તેમણે ગુજરાત કોંગ્રેસના સિનિયર નેતાઓની કામગીરી અને જિલ્લા પ્રમુખોની પસંદગી પ્રક્રિયા પર સવાલ ઉઠાવ્યા છે. આ વીડિયોમાં રાહુલ ગાંધીએ પાર્ટીના આંતરિક સંગઠન અને નેતૃત્વની પસંદગી પ્રક્રિયા પર ખુલીને પોતાનો અભિપ્રાય વ્યક્ત કર્યો, જેના કારણે ગુજરાત કોંગ્રેસમાં ચર્ચાઓનો દોર શરૂ થયો છે.

જિલ્લા પ્રમુખોની પસંદગી પ્રક્રિયા પર ફોકસ

રાહુલ ગાંધીએ પોતાના સંબોધનમાં જણાવ્યું કે, ગુજરાતમાં કોંગ્રેસના જિલ્લા પ્રમુખોની પસંદગી માટે નવી પ્રક્રિયા શરૂ કરવામાં આવી છે. આ પ્રક્રિયા હેઠળ, દિલ્હીથી AICC અને PCCના ઓબ્ઝર્વર્સ મોકલવામાં આવ્યા હતા, જેમણે સ્થાનિક કાર્યકર્તાઓ, નેતાઓ અને સિનિયર નેતાઓ સાથે ચર્ચા કરીને જિલ્લા પ્રમુખોના નામની યાદી તૈયાર કરી. આ યાદી દિલ્હી મોકલવામાં આવી, જેના આધારે આગળનો નિર્ણય લેવામાં આવશે.

રાહુલે કહ્યું, “અમે ગુજરાતમાં પાર્ટીને મજબૂત કરવા માટે સંગઠન સૃજન અભિયાન શરૂ કર્યું છે. આ પાયલટ પ્રોજેક્ટ ગુજરાતથી શરૂ થયો છે, કારણ કે આ રાજ્ય અમારા માટે સૌથી મહત્વનું છે. અમે ઈચ્છીએ છીએ કે આ પ્રક્રિયા પારદર્શી અને મેરિટ આધારિત હોય.”

રાહુલ ગાંધીએ જૂની અને નવી યાદીની તુલના કરતાં કહ્યું, “જૂની યાદીમાં સિનિયર નેતાઓના આસિસ્ટન્ટના નામ હતા, જ્યારે નવી યાદીમાં ગુજરાતની ભાવિ લીડરશિપના નામ છે. આ બંને યાદીઓમાં આસમાન-જમીનનો તફાવત છે.” તેમણે ભારપૂર્વક જણાવ્યું કે, પાર્ટી હવે મેરિટ અને પર્ફોર્મન્સના આધારે નિર્ણયો લેશે. “જો તમે સારું કામ કરશો, તો તમને સ્થાન મળશે. અમે કોઈને કેન્સલ નથી કરવાના, પરંતુ જે લોકો સારું કામ નહીં કરે, તેમના માટે નિર્ણય લેવામાં આવશે,” રાહુલે કહ્યું. આ નિવેદન બાદ સભામાં હાસ્યનું મોજું ફરી વળ્યું, પરંતુ તેની પાછળનો સંદેશ ગંભીર હતો.

સિનિયર નેતાઓ પર ટિપ્પણી, આંતરિક કલહના સંકેત

રાહુલ ગાંધીની આ ટિપ્પણીઓથી ગુજરાત કોંગ્રેસમાં આંતરિક કલહની ચર્ચાઓએ જોર પકડ્યું છે. સોશિયલ મીડિયા પર વાયરલ થયેલા આ વીડિયોમાં રાહુલે સિનિયર નેતાઓની કામગીરી પર સવાલ ઉઠાવ્યા, જેના કારણે પાર્ટીની અંદરની ગતિશીલતા પર ફરી એકવાર પ્રકાશ પડ્યો. ગુજરાતમાં કોંગ્રેસ દાયકાઓથી સત્તાથી દૂર છે, અને રાહુલનું આ વલણ દર્શાવે છે કે પાર્ટી હવે નવા અને સક્રિય નેતૃત્વને પ્રોત્સાહન આપવા માંગે છે.

અગાઉ, રાહુલ ગાંધીએ ગુજરાતની મુલાકાત દરમિયાન કાર્યકર્તાઓને સ્પષ્ટ શબ્દોમાં કહ્યું હતું, “જો તમારા દિલમાં કોંગ્રેસ હોય, તો જ સંગઠન સાથે જોડાયેલા રહો. રાજનીતિ કે કાવાદાવ માટે નહીં.” આ નિવેદનથી પણ પાર્ટીના આંતરિક સુધારાની તેમની નીતિ સ્પષ્ટ થાય છે.

મધ્યપ્રદેશમાં પણ સંગઠન મજબૂતીનો પ્રયાસ

ગુજરાત બાદ હવે રાહુલ ગાંધી મધ્યપ્રદેશમાં આગામી વિધાનસભા ચૂંટણીને ધ્યાનમાં રાખીને પાર્ટીના સંગઠનને મજબૂત કરવાના અભિયાનમાં વ્યસ્ત છે. તેમનું ફોકસ પાર્ટીના ગ્રાસરૂટ લેવલ પર કામ કરતા કાર્યકર્તાઓ અને નેતાઓને સશક્ત બનાવવા પર છે. ગુજરાતમાં શરૂ થયેલો આ પાયલટ પ્રોજેક્ટ અન્ય રાજ્યોમાં પણ લાગુ કરવાની યોજના છે, જેનો હેતુ કોંગ્રેસને રાજકીય રીતે વધુ સ્પર્ધાત્મક બનાવવાનો છે.

આ પણ વાંચો- પંજાબ પોલીસે ઝડપ્યો બીજો પાકિસ્તાની જાસૂસ: યૂટ્યૂબર જસબીર સિંહની ધરપકડ, પહલગામ હુમલા બાદ તપાસ તેજ