ઉપરાષ્ટ્રપતિની રેસમાં રામનાથ ઠાકુરનું નામ: જેપી નડ્ડા સાથે મુલાકાતથી રાજકીય ચર્ચાઓ ગરમ

Vice Presidential Election 2025: ભારતના ઉપરાષ્ટ્રપતિ જગદીપ ધનખડે આરોગ્યના કારણોસર અચાનક રાજીનામું આપી દેતાં નવા ઉપરાષ્ટ્રપતિની ચૂંટણી માટે ચૂંટણી પંચે તૈયારીઓ શરૂ કરી દીધી છે. આ દરમિયાન ભાજપના રાષ્ટ્રીય અધ્યક્ષ જેપી નડ્ડાએ જેડીયુના નેતા અને કેન્દ્રીય મંત્રી રામનાથ ઠાકુર સાથે મુલાકાત કરી, જેનાથી રાજકીય ગલિયારાઓમાં ચર્ચાઓ તેજ થઈ ગઈ છે. રામનાથ ઠાકુરનું નામ ઉપરાષ્ટ્રપતિની રેસમાં આગળ આવ્યું છે. આવો, જાણીએ કોણ છે રામનાથ ઠાકુર અને શા માટે તેમનું નામ ચર્ચામાં છે.

કોણ છે રામનાથ ઠાકુર?

રામનાથ ઠાકુર બિહારના દિગ્ગજ નેતા અને પૂર્વ મુખ્યમંત્રી કર્પૂરી ઠાકુરના પુત્ર છે. તેઓ હાલમાં જેડીયુ ક્વોટામાંથી રાજ્યસભાના સાંસદ છે અને કેન્દ્ર સરકારમાં કૃષિ અને ખેડૂત કલ્યાણ રાજ્યમંત્રી તરીકે સેવા આપે છે. 2005થી 2010 દરમિયાન તેઓ નીતિશ કુમારની એનડીએ સરકારમાં બિહારના મંત્રી રહ્યા હતા. આ ઉપરાંત, તેઓ નીતિશ કુમારની સરકારમાં કેબિનેટ મંત્રી પણ રહી ચૂક્યા છે. તેમના પિતા કર્પૂરી ઠાકુરને મરણોત્તર ભારત રત્નથી સન્માનિત કરવામાં આવ્યા છે, જે બિહારમાં તેમની મજબૂત રાજકીય વિરાસત દર્શાવે છે.

શા માટે ચર્ચામાં છે રામનાથ ઠાકુરનું નામ?

જેપી નડ્ડા સાથે મુલાકાતનું કારણ

બુધવારે દિલ્હીમાં ભાજપના રાષ્ટ્રીય અધ્યક્ષ જેપી નડ્ડાએ રામનાથ ઠાકુરના નિવાસસ્થાને જઈને તેમની સાથે મુલાકાત કરી હતી. આ મુલાકાતે ઉપરાષ્ટ્રપતિની ચૂંટણીને લઈને અટકળોને વેગ આપ્યો છે. જોકે, ભાજપના સૂત્રોનું કહેવું છે કે આ મુલાકાત બિહારમાં ચાલી રહેલા વોટર લિસ્ટ રિવિઝન (SIR)ના મુદ્દે હતી. આમ છતાં મુલાકાતની ટાઇમિંગ અને રામનાથ ઠાકુરની રાજકીય પ્રોફાઇલને જોતાં એવું માનવામાં આવે છે કે આ મુલાકાતના રાજકીય મહત્વ હોઈ શકે છે.

એનડીએની રણનીતિ

એનડીએ ગઠબંધન પાસે લોકસભા અને રાજ્યસભામાં 422 સાંસદોનું બહુમત છે, જે ઉપરાષ્ટ્રપતિની ચૂંટણી માટે જરૂરી 394 મતો કરતાં ઘણું વધારે છે. આવી સ્થિતિમાં, રામનાથ ઠાકુર જેવા નેતાને ઉમેદવાર બનાવવાથી એનડીએને બિહારમાં આગામી ચૂંટણીઓમાં રાજકીય ફાયદો મળી શકે છે. રામનાથ ઠાકુરની ઉમેદવારીથી જેડીયુ અને નીતિશ કુમાર પણ સંતુષ્ટ રહેશે, જે ગઠબંધનને વધુ મજબૂત બનાવશે.

આ પણ વાંચો- મુંબઈ-અમદાવાદ બુલેટ ટ્રેન: પહેલી બુલેટ ટ્રેન ક્યારે દોડશે? રેલ્વે મંત્રીએ સંસદમાં આપી જાણકારી