ઉપરાષ્ટ્રપતિ ચૂંટણી 2025: વિપક્ષના ઉમેદવાર બી.સુદર્શન રેડ્ડીએ દાખલ કર્યું નોમિનેશન, NDAની જીત લગભગ નિશ્ચિત

Vice Presidential Election 2025: ઇન્ડિયા ગઠબંધનના ઉપરાષ્ટ્રપતિ પદના ઉમેદવાર અને સુપ્રીમ કોર્ટના ભૂતપૂર્વ ન્યાયાધીશ બી સુદર્શન રેડ્ડીએ ગુરુવારે, 21 ઓગસ્ટ 2025ના રોજ પોતાનું નોમિનેશન દાખલ કર્યું. નોમિનેશન દરમિયાન કોંગ્રેસ અધ્યક્ષ મલ્લિકાર્જુન ખરગે, કોંગ્રેસ સંસદીય દળના અધ્યક્ષ સોનિયા ગાંધી, લોકસભામાં વિપક્ષના નેતા રાહુલ ગાંધી, શરદ પવાર, DMK સાંસદ તિરુચિ શિવા, શિવસેના (UBT)ના સાંસદ સંજય રાઉત સહિત ગઠબંધનના અન્ય નેતાઓ હાજર રહ્યા. રેડ્ડીના નોમિનેશન પત્રના 4 સેટ દાખલ કરવામાં આવ્યા, જેમાં 160 સાંસદોએ પ્રસ્તાવક અને અનુમોદક તરીકે હસ્તાક્ષર કર્યા, જેમાં સોનિયા ગાંધીનો પણ સમાવેશ થાય છે. ઉપરાષ્ટ્રપતિ ચૂંટણી 9 સપ્ટેમ્બર, 2025ના રોજ યોજાશે.

બી સુદર્શન રેડ્ડીનું સન્માન

નોમિનેશન પહેલાં બુધવારે, ઇન્ડિયા ગઠબંધન દ્વારા સંસદ ભવનના સેન્ટ્રલ હોલમાં બી સુદર્શન રેડ્ડીના સન્માનમાં એક કાર્યક્રમનું આયોજન કરવામાં આવ્યું હતું. આ કાર્યક્રમમાં મલ્લિકાર્જુન ખરગે, સોનિયા ગાંધી, રાહુલ ગાંધી, શરદ પવાર અને સંજય રાઉત જેવા નેતાઓએ હાજરી આપી અને રેડ્ડીનું સન્માન કર્યું. રેડ્ડી, જે ગોવાના લોકાયુક્ત રહી ચૂક્યા છે અને હૈદરાબાદના આંતરરાષ્ટ્રીય મધ્યસ્થતા કેન્દ્રના ટ્રસ્ટી બોર્ડના સભ્ય છે, તેમની કાયદાકીય સેવાઓ માટે જાણીતા છે.

NDA ઉમેદવારનું નોમિનેશન

બીજી તરફ, NDAના ઉપરાષ્ટ્રપતિ પદના ઉમેદવાર સીપી રાધાકૃષ્ણને બુધવારે, 20 ઓગસ્ટ 2025ના રોજ પોતાનું નોમિનેશન દાખલ કર્યું. આ દરમિયાન વડાપ્રધાન નરેન્દ્ર મોદી, ગૃહમંત્રી અમિત શાહ, સંરક્ષણ મંત્રી રાજનાથ સિંહ, BJP અધ્યક્ષ જેપી નડ્ડા અને કેન્દ્રીય મંત્રી નીતિન ગડકરી હાજર રહ્યા. રાધાકૃષ્ણને 4 સેટમાં નોમિનેશન દાખલ કર્યું, જેમાં દરેક સેટ પર 20 પ્રસ્તાવકો અને 20 અનુમોદકોના હસ્તાક્ષર છે, જેમાં વડાપ્રધાન મોદી મુખ્ય પ્રસ્તાવક હતા.

ચૂંટણીનું ગણિત

ઉપરાષ્ટ્રપતિ ચૂંટણી માટે નિર્વાચક મંડળમાં કુલ 782 સાંસદો છે, જેમાં 542 લોકસભાના અને 240 રાજ્યસભાના સાંસદોનો સમાવેશ થાય છે. NDA પાસે 422 સાંસદોનું સમર્થન છે, જ્યારે ઇન્ડિયા ગઠબંધન પાસે 312 સાંસદો છે. જીત માટે 391 સાંસદોનું સમર્થન જરૂરી છે. આ ગણિત પ્રમાણે NDA ઉમેદવાર સીપી રાધાકૃષ્ણનની જીત લગભગ નિશ્ચિત માનવામાં આવે છે. હવે બધાનું ધ્યાન જીતના માર્જિન પર છે.

આ પણ વાંચો- ભારતના પૂર્વ ઉપરાષ્ટ્રપતિ જગદીપ ધનખડ ક્યાં છે? રાહુલ ગાંધીના સરકાર પર પ્રહાર