‘મુસ્લિમોના હિતોને નુકસાન નહીં થવા દઈએ’, વકફ બિલ પર એનડીએ સહયોગી ટીડીપીનું નિવેદન

તેલુગુ દેશમ પાર્ટી (ટીડીપી) કેન્દ્રમાં નેશનલ ડેમોક્રેટિક એલાયન્સ (એનડીએ) સરકારમાં મહત્વપૂર્ણ સહયોગી છે. ટીડીપીના આંધ્ર પ્રદેશ એકમના ઉપાધ્યક્ષ નવાબ જાને કહ્યું કે વકફ સુધારા બિલને પસાર થતા રોકવા માટે બધાએ સાથે આવવું જોઈએ. નવાબ જાને નવી દિલ્હીના ઈન્દિરા ગાંધી ઈન્ડોર સ્ટેડિયમમાં જમિયત ઉલેમા-એ-હિંદ દ્વારા આયોજિત 'સંવિધાન બચાવો પરિષદ'ને સંબોધિત કરી હતી. તેમણે કહ્યું કે આંધ્રપ્રદેશના મુખ્યમંત્રી અને ટીડીપીના વડા ચંદ્રાબાબુ નાયડુ એવા વ્યક્તિ છે જે મુસ્લિમોના હિતોને નુકસાન પહોંચાડતું કોઈ બિલ પાસ થવા દેશે નહીં.

ટીડીપી નેતાએ દાવો કર્યો હતો કે વકફ સંશોધન બિલને સંયુક્ત સંસદીય સમિતિ (જેપીસી)ને મોકલવાનું પણ નાયડુના કારણે શક્ય બન્યું છે. હાલમાં તેમણે આ બિલને પસાર થતું અટકાવ્યું છે. તેમણે એવો પણ દાવો કર્યો હતો કે નાયડુએ થોડા દિવસો પહેલા નિવેદન આપ્યું હતું કે તે મુસ્લિમ સંસ્થા હોય, હિન્દુ સંસ્થા હોય કે ખ્રિસ્તી સંસ્થા હોય, તેમાં એક જ ધર્મના લોકો હોવા જોઈએ.

નવાબ જાને કહ્યું, 'અમે બધુ સહન કરીશું, પરંતુ દેશની એકતાને નુકસાન પહોંચાડવાના કોઈપણ પ્રયાસને સહન નહીં કરીએ.' ભારતીય જનતા પાર્ટી પાસે લોકસભામાં બહુમતી નથી. સરકારને ટીડીપી અને જનતા દળ (યુ) સહિત અન્ય પક્ષોનું સમર્થન છે. તે જ સમયે, જમિયત ઉલેમા-એ-હિંદે ચંદ્રબાબુ નાયડુ અને જનતા દળ (યુનાઇટેડ)ના નીતિશ કુમારને આ મામલે મુસ્લિમોની ભાવનાઓ પર ધ્યાન આપવાનો અનુરોધ કર્યો હતો. એવું કહેવામાં આવ્યું હતું કે એનડીએમાં જે પક્ષો પોતાને બિનસાંપ્રદાયિક કહે છે તેઓએ આ ખતરનાક બિલને સમર્થન આપવાથી દૂર રહેવું જોઈએ.

આ પણ વાંચો-કેન્દ્ર સરકારે વિકિપીડિયાને મોકલી નોટિસ, જાણો કારણ