Women Reservation: કોંગ્રેસની માંગ- કાયદો તાત્કાલિક લાગુ કરવામાં આવે, સુપ્રીમ કોર્ટે બે અઠવાડિયામાં કેન્દ્ર પાસેથી માંગ્યો જવાબ

Women Reservation: સંસદ અને વિધાનસભાઓમાં મહિલાઓને અનામત આપવાનો પ્રસ્તાવ ધરાવતું બિલ કાયદો બની ગયું છે, પરંતુ હાલમાં આ કાયદો દેશમાં લાગુ કરવામાં આવ્યો નથી. સુપ્રીમ કોર્ટમાં અરજી દાખલ કરીને કાયદાને તાત્કાલિક લાગુ કરવાની માંગ કરવામાં આવી છે. આ અરજી પર ટૂંકી સુનાવણી બાદ સુપ્રીમ કોર્ટે કેન્દ્ર સરકાર પાસેથી 14 દિવસમાં જવાબ માંગ્યો છે. કોર્ટે કહ્યું કે દેશભરમાં કાયદાના અમલને લઈને સરકારનું વલણ જાણવું જરૂરી છે. કોર્ટે કહ્યું કે આ મામલે ત્રણ અઠવાડિયા પછી સુનાવણી થશે.

અગાઉ, અરજદાર જયા ઠાકુર તરફથી હાજર રહેલા વરિષ્ઠ વકીલ વિકાસ સિંહે કહ્યું હતું કે અદાલતે નિર્દેશો જારી કરવા જોઈએ કે સામાન્ય ચૂંટણી પહેલા કાયદો લાગુ કરવામાં આવે. દલીલો સાંભળ્યા પછી, કોર્ટે સ્પષ્ટ કર્યું કે તે કેસમાં આ તબક્કે કોઈ આદેશ આપી શકે નહીં. બે જજની ડિવિઝન બેન્ચે અરજદારને સરકારના જવાબની રાહ જોવા કહ્યું. જસ્ટિસ સંજીવ ખન્ના અને જસ્ટિસ દીપાંકર દત્તાની બેંચમાં સરકાર વતી એડવોકેટ કનુ અગ્રવાલ હાજર થયા હતા. તેમણે કહ્યું કે તેમને જવાબ દાખલ કરવા માટે થોડો સમય જોઈએ છે. કોર્ટે બે સપ્તાહમાં જવાબ દાખલ કરવા જણાવ્યું હતું.