અમિતાભ બચ્ચનને બોલિવુડના શહેનશાહ કહેવામાં આવે છે. અમિતાભ બચ્ચને ફિલ્મી કરિયરની શરૂઆત 1969માં ફિલ્મ 'સાત હિન્દુસ્તાની'થી કરી હતી. જોકે, ઈન્ડસ્ટ્રીમાં તેમની ઓળખ એંગ્રી યંગ મેન તરીકેની બની હતી. દીવાર, ઝંઝીર, ડોન અને શોલે જેવી ફિલ્મોમાં કામ કરીને તેમણે મોટા પડદા પર ધમાલ મચાવી હતી. સાથે જ ફેન્સના દિલમાં જગ્યા બનાવી હતી. આજે 80ની ઉંમરે પણ અમિતાભ બચ્ચન ફિલ્મો અને ટીવીમાં કામ કરી રહ્યા છે. આ દરમિયાન બિગ બીની સંપત્તિને લઈને અહેવાલ આવ્યા છે. અમિતાભ બચ્ચને પોતાનો પ્રતીક્ષા નામનો બંગલો દીકરી શ્વેતાના નામે કરી દીધો છે.
અમિતાભ બચ્ચને તેમનો બંગલો 'પ્રતીક્ષા' દીકરી શ્વેતાના નામે કર્યો, અહીં જ થયા હતા અભિષેક-ઐશ્વર્યાના લગ્ન
Amitabh Bachchan Gifts Bungalow to Shweta Bachchan: અમિતાભ બચ્ચને હાલમાં જ પોતાનો ફેમસ બંગલો પ્રતીક્ષા દીકરી શ્વેતા બચ્ચન નંદાના નામે કરી દીધો છે. લગભગ છ દશકના કરિયરમાં અમિતાભ બચ્ચને કરોડોની સંપત્તિ એકત્ર કરી છે. થોડા વર્ષો પહેલા મહાનાયક અમિતાભ બચ્ચને ગેમ શો 'કૌન બનેગા કરોડપતિ'માં જણાવ્યું હતું કે, તેમના મૃત્યુ પછી સંપત્તિનું શું થશે.
અપડેટેડ 12:13:28 PM Nov 25, 2023 પર
મુંબઈના જૂહુ વિસ્તારમાં આવેલો બંગલો અમિતાભ બચ્ચન અને જયા બચ્ચને તેમની દીકરી શ્વેતા બચ્ચન નંદાને ભેટમાં આપી દીધો છે. ગિફ્ટ ડીડ થકી બંગલાની ઓવનરશીપ શ્વેતાના નામે ટ્રાન્સફર કરી દેવાઈ હતી. કુલ 16,840 સ્ક્વેર ફૂટમાં ફેલાયેલા બંગલાની ડીડ 8 નવેમ્બરે ટ્રાન્સફર થઈ હતી અને તેના બીજા દિવસે રજિસ્ટ્રેશન કરવામાં આવ્યું હતું.
બચ્ચન પરિવારે બંને ગિફ્ટ ડીડ પેટે કુલ 50.65 લાખ રૂપિયા સ્ટેમ્પ ડ્યૂટી ચૂકવી હતી, તેવી માહિતી Zapkey.comને પ્રાપ્ત થયેલા દસ્તાવેજોમાંથી બહાર આવી છે. શ્વેતા બચ્ચનને ગિફ્ટમાં અપાયેલા બંગલાની માર્કેટ વેલ્યૂ 50.63 કરોડ રૂપિયા હોવાનું કહેવામાં આવી રહ્યું છે. મુંબઈમાં હાલના નિયમ પ્રમાણે, પિતા તરફથી પુત્ર કે પુત્રીને રેસિડેન્શિયલ પ્રોપર્ટી ભેટ તરીકે આપવામાં આવે તો 200 રૂપિયા જેટલી સામાન્ય સ્ટેમ્પ ડ્યૂટી અને ડીડના 1 ટકા મેટ્રો સેસ ચૂકવવો પડે છે.
આ બંગલો બે પ્લોટ પર બનેલો છે. પહેલો પ્લોટ 9,585 સ્ક્વેર ફૂટનો છે, જેની સંયુક્ત માલિકી અમિતાભ બચ્ચન અને જયા બચ્ચનની છે. જ્યારે બીજો 7,255 સ્ક્વેર ફૂટનો પ્લોટ અમિતાભ બચ્ચનની એકલાની માલિકીનો છે. ઉલ્લેખનીય છે કે, જૂહુમાં આવેલા બગંલાઓ જલસા, પ્રતીક્ષા અને જનક સહિત બચ્ચન પરિવાર મુંબઈમાં કેટલીય સંપત્તિ ધરાવે છે. શ્વેતા બચ્ચનને ગિફ્ટમાં આપેલો બંગલો પ્રતીક્ષા એ જ છે જ્યાં 2007માં અભિષેક બચ્ચન અને ઐશ્વર્યા રાયના લગ્ન થયા હતા.
ક્વીઝ શો 'કૌન બનેગા કરોડપતિ'ના એક એપિસોડમાં અમિતાભ બચ્ચને ખુલાસો કર્યો હતો કે, આ બંગલાને પ્રતીક્ષા નામ તેમના પિતા હરિવંશરાય બચ્ચને આપ્યું હતું. તેમના પિતાની એક કવિતામાં આ બંગલાનો ઉલ્લેખ પણ કરવામાં આવ્યો છે. કવિતાની પંક્તિઓ હતી, 'સ્વાગત સબ કે લિયે યહાં પર નહીં કિસી કે લિયે પ્રતીક્ષા.' આ બંગલો અમિતાભ બચ્ચનના હૃદયમાં ખાસ સ્થાન ધરાવે છે કારણકે જૂહુનું તેમનું પહેલું ઘર હતું જ્યાં તેઓ માતા તેજી અને પિતા હરિવંશરાય બચ્ચન સાથે રહ્યા હતા. કેબીસીના જ એક એપસિોડમાં અમિતાભ બચ્ચને કહ્યું હતું કે, તેમના મૃત્યુ પછી તેમની કરોડોની સંપત્તિ દીકરી અને દીકરામાં સમાન રૂપે વહેંચી દેવાશે.
દરમિયાન, અમિતાભ બચ્ચને અંધેરીના ઓશિવારા વિસ્તારમાં એક કોમર્શિયલ પ્રોજેક્ટમાં 8400 સ્ક્વેર ફૂટમાં ફેલાયેલી ચાર ઓફિસો ખરીદીને રિયલ એસ્ટેટમાં રોકાણ કર્યું છે. આ ઓફિસો તેમને 29 કરોડ રૂપિયામાં પડી હોવાનું કહેવાય છે.
વર્કફ્રંટની વાત કરીએ તો, અમિતાભ બચ્ચન પ્રભાસ અને દીપિકા પાદુકોણ સાથે ફિલ્મ 'કલ્કી 2898 AD'માં જોવા મળશે. રિભુદાસ ગુપ્તાની કોર્ટરૂમ ડ્રામા ફિલ્મ 'સેક્શન 84'માં બિગ બી દેખાશે. લગભગ 32 વર્ષ પછી બે સુપરસ્ટાર અમિતાભ બચ્ચન અને રજનીકાંત 'થલાઈવર 170' નામની ફિલ્મમાં જોવા મળવાના છે.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
