‘મંદિર, પાણી, શ્મશાનમાં કોઈ પણ ભેદ ન હોવો જોઈએ’: RSS પ્રમુખ મોહન ભાગવતનું મોટું નિવેદન

રાષ્ટ્રીય સ્વયંસેવક સંઘ (RSS)ના શતાબ્દી વર્ષ નિમિત્તે દિલ્હીમાં આયોજિત ત્રણ દિવસીય કાર્યક્રમમાં સંઘ પ્રમુખ મોહન ભાગવતે હિન્દુત્વ અને ભારતના વૈશ્વિક લક્ષ્યો પર મહત્ત્વનું નિવેદન આપ્યું. તેમણે કહ્યું કે મંદિર, પાણી અને શ્મશાનમાં કોઈ ભેદભાવ ન હોવો જોઈએ, કારણ કે હિન્દુ રાષ્ટ્રનો મૂળ ઉદ્દેશ વિશ્વ કલ્યાણ છે.

ભાગવતે હિન્દુત્વના સારને બે શબ્દોમાં વ્યાખ્યાયિત કર્યો: સત્ય અને પ્રેમ. તેમણે કહ્યું, "દુનિયા એકતા પર ચાલે છે, સોદાઓ કે કરારોથી નહીં. આપણે આપણી અંદર શોધીએ તો શાશ્વત સુખનો સ્ત્રોત મળે છે, જે ક્યારેય નાશ પામતો નથી." તેમણે ઉમેર્યું કે આ સુખની પ્રાપ્તિ જ માનવ જીવનનું પરમ લક્ષ્ય છે, જેનાથી વિશ્વમાં શાંતિ અને સૌહાર્દ સ્થપાય છે.

વિશ્વ શાંતિ માટે ભારતીય દૃષ્ટિકોણ

મોહન ભાગવતે વૈશ્વિક પરિસ્થિતિ પર ચિંતા વ્યક્ત કરતાં કહ્યું કે પ્રથમ અને બીજા વિશ્વયુદ્ધ બાદ પણ આજે ત્રીજા વિશ્વયુદ્ધ જેવી સ્થિતિ જોવા મળે છે. આંતરરાષ્ટ્રીય સંસ્થાઓ શાંતિ સ્થાપવામાં નિષ્ફળ રહી છે. તેમણે ભારપૂર્વક જણાવ્યું કે આ સમસ્યાનું સમાધાન ફક્ત ધર્મના સંતુલન અને ભારતીય દૃષ્ટિકોણથી જ શક્ય છે. તેમણે સમાજને એક કરવા માટે ચાર માર્ગદર્શક સિદ્ધાંતો - મૈત્રી, ઉપેક્ષા, આનંદ અને કરુણા - પર ભાર મૂક્યો.

ભાગવતે આજના સમયમાં વધતા વ્યક્તિવાદ અને ઉપભોક્તાવાદની ચર્ચા કરી. તેમણે કહ્યું કે લોકો સંવાદને બદલે પોતાની ઇચ્છાઓ લાદવા માગે છે, જેના કારણે અસહિષ્ણુતા વધી રહી છે. તેમણે મહાત્મા ગાંધીના 'સાત સામાજિક પાપો'નો ઉલ્લેખ કરીને નૈતિકતા અને સંયમનું મહત્ત્વ સમજાવ્યું. તેમણે લોકોને પોતાના દેશ અને સમાજ માટે નાનામાં નાનું કામ કરવા પ્રેરણા આપી, જેમ કે વૃક્ષારોપણ કે વંચિત બાળકોને શિક્ષણ આપવું.

ભારતનું યોગદાન

RSS પ્રમુખે ભારપૂર્વક જણાવ્યું કે ધર્મ સાર્વભૌમિક છે અને તેનો હેતુ વિશ્વને શાંતિ આપવાનો છે. તેમણે લોકોને પોતાના દેશ માટે કંઈક કરવા અને સમાજ સાથે જોડાવા અપીલ કરી. "જો આપણે સૌનું ભલું ઇચ્છીશું, તો વિશ્વનો નાશ થવાની નોબત નહીં આવે," એમ તેમણે કહ્યું.

આ પણ વાંચો-Donald Trump on South Africa: ટ્રમ્પના નિર્ણયથી દક્ષિણ આફ્રિકામાં HIV દર્દીઓનું જીવન સંકટમાં