SCO સમિટમાં શી જિનપિંગ પોતે પીએમ મોદીનું કરશે સ્વાગત...ભારત અને ચીન ટ્રમ્પને બતાવશે તાકાત

SCO Summit 2025: ચીનના તિયાનજિન શહેરમાં 31 ઓગસ્ટથી 1 સપ્ટેમ્બર 2025 દરમિયાન શંઘાઈ સહયોગ સંગઠન (SCO)નું શિખર સમ્મેલન યોજાવા જઈ રહ્યું છે. આ સમિટમાં ચીનના રાષ્ટ્રપતિ શી જિનપિંગ ભારતના વડાપ્રધાન નરેન્દ્ર મોદી, રશિયાના રાષ્ટ્રપતિ વ્લાદિમીર પુતિન અને મધ્ય એશિયા, મધ્ય પૂર્વ, દક્ષિણ એશિયા તેમજ દક્ષિણ પૂર્વ એશિયાના અનેક નેતાઓનું સ્વાગત કરશે. આ સમિટનો મુખ્ય ઉદ્દેશ વૈશ્વિક રાજનીતિમાં અમેરિકાના દબદબા સામે એકજૂથ થઈને નવી વિશ્વ વ્યવસ્થા રજૂ કરવાનો છે.

આ સમિટ એવા સમયે યોજાઈ રહી છે જ્યારે વૈશ્વિક સ્તરે ટ્રેડ વોર અને રાજકીય તણાવ ચરમસીમાએ છે. નિષ્ણાતોનું માનવું છે કે આ સમિટ દ્વારા SCO દેશો અમેરિકાના રાષ્ટ્રપતિ ડોનાલ્ડ ટ્રમ્પને એક સ્પષ્ટ સંદેશ આપશે કે વિશ્વ હવે બદલાઈ રહ્યું છે. રોયટર્સના અહેવાલ મુજબ, શી જિનપિંગ આ સમિટનો ઉપયોગ અમેરિકા વિનાની વૈશ્વિક વ્યવસ્થા દર્શાવવા માટે કરશે. તેમણે જણાવ્યું કે, "જાન્યુઆરીથી અમેરિકાએ ચીન, ઈરાન, રશિયા અને હવે ભારત સામે જે પણ પગલાં લીધાં છે, તે નિષ્ફળ ગયા છે."

ભારત માટે શા માટે મહત્વનું?

આ સમિટ ભારત માટે ખાસ મહત્વ ધરાવે છે. એવી અપેક્ષા છે કે ભારત અને ચીન આ સમિટ દરમિયાન કેટલીક મહત્વની જાહેરાતો કરશે. આમાં સરહદી વિવાદોમાં સૈનિકોને પાછા બોલાવવા, વેપાર અને વીઝા નિયમોમાં સરળતા તેમજ જળવાયુ પરિવર્તન જેવા ક્ષેત્રોમાં સહયોગ વધારવાનો સમાવેશ થઈ શકે છે. ચીનના વિદેશ મંત્રાલયના એક અધિકારીએ રોયટર્સને જણાવ્યું કે, "SCO નવા પ્રકારના આંતરરાષ્ટ્રીય સંબંધો બનાવવામાં મહત્વની ભૂમિકા ભજવે છે, જે વિશ્વમાં શાંતિ અને વિકાસને પ્રોત્સાહન આપે છે."

બ્રિક્સ દેશોએ તાજેતરમાં આપસમાં રાજનયિક અને આર્થિક સંબંધો મજબૂત કર્યા છે, જેનાથી અમેરિકી સરકાર ચિંતિત છે. SCO સમિટમાં સભ્ય દેશોની સંખ્યા વધારવા પર પણ ચર્ચા થશે, જે વૈશ્વિક સ્તરે આ સંગઠનની તાકાત વધારશે. આ સમિટ દ્વારા SCO અને બ્રિક્સ દેશો વિશ્વને એક નવી દિશા આપવાનો પ્રયાસ કરશે, જેમાં અમેરિકાને બદલે બહુ-ધ્રુવીય વિશ્વ વ્યવસ્થા પર ભાર મૂકાશે. આ શિખર સમ્મેલન એક મહત્વનું પગલું છે, જે વૈશ્વિક રાજનીતિ અને અર્થતંત્રમાં નવા યુગની શરૂઆત કરી શકે છે.

આ પણ વાંચો-શું ઈસ્ટ ઈન્ડિયા કંપની ફરી પાછી આવશે? Zerodhaના નીતિન કામથે આ ચિંતા વ્યક્ત કરી