બાંગ્લાદેશ ભડકે બળ્યું: શેખ હસીનાને ફાંસી થશે? ઢાકામાં શૂટ એટ સાઈટના ઓર્ડર, ચુકાદો લાઈવ દેખાડાશે

બાંગ્લાદેશ આજે એક એવા ઐતિહાસિક તબક્કા પર ઊભું છે, જ્યાંથી દેશનું ભવિષ્ય નક્કી થશે. પૂર્વ વડાપ્રધાન શેખ હસીના વિરુદ્ધ ચાલી રહેલા કેસમાં આજે આંતરરાષ્ટ્રીય ક્રાઈમ ટ્રિબ્યુનલ પોતાનો ચુકાદો સંભળાવશે. સરકારી વકીલોએ 78 વર્ષીય હસીના માટે મૃત્યુદંડની માંગણી કરતાં સમગ્ર દેશમાં તંગદિલીનો માહોલ છે. પરિસ્થિતિ એટલી ગંભીર છે કે મોહમ્મદ યુનુસની વચગાળાની સરકારે હિંસા અને આગચંપી કરનારાઓને દેખતા જ ગોળી મારવાનો (શૂટ એટ સાઈટ) આદેશ આપ્યો છે.

આજે આવનારા ચુકાદાનું ઢાકામાં મોટી સ્ક્રીન પર જીવંત પ્રસારણ કરવામાં આવશે અને તેને ફેસબુક પર પણ જોઈ શકાશે. આ નિર્ણય પહેલાં જ બાંગ્લાદેશમાં હિંસા ફાટી નીકળી છે. અનેક જગ્યાએ આગચંપી અને બોમ્બમારાની ઘટનાઓ બની છે.

શેખ હસીનાનો ભાવુક સંદેશ અને પુત્રની ચેતવણી

શેખ હસીનાની પાર્ટી 'અવામી લીગ' પર પ્રતિબંધ મૂકી દેવામાં આવ્યો છે, જેના કારણે તે ચૂંટણી લડી શકશે નહીં. ચુકાદા પહેલાં ભારતમાંથી તેમણે એક ભાવુક ઓડિયો સંદેશ જાહેર કર્યો હતો, જેમાં તેમણે કહ્યું હતું કે, "અન્યાય કરનારાઓને એક દિવસ બંગાળની ધરતી પર જનતા સજા આપશે. ડરવાની કોઈ જરૂર નથી. હું જીવિત છું અને દેશની જનતાની સાથે રહીશ. ઇન્શાઅલ્લાહ, આ ગુનેગારોને બંગાળની ધરતી પર સજા આપીશ."

દેશભરમાં હિંસા અને 'શૂટ એટ સાઈટ'નો આદેશ

ચુકાદા પહેલાં જ બાંગ્લાદેશમાં હિંસા વકરી છે. ઢાકામાં મોહમ્મદ યુનુસના સલાહકાર સૈયદ રિઝવાના હસનના ઘરની બહાર ક્રૂડ બોમ્બથી હુમલો કરવામાં આવ્યો છે. કોક્સબજાર સહિત અનેક શહેરોમાં અવામી લીગના કાર્યકરોએ હંગામો મચાવ્યો છે.

રવિવારે રાત્રે અજાણ્યા લોકોએ એક પોલીસ સ્ટેશન પરિસરમાં આગ લગાવી દીધી હતી અને રાજધાનીમાં અનેક જગ્યાએ દેશી બોમ્બ બ્લાસ્ટ કર્યા હતા. પરિસ્થિતિને કાબૂમાં લેવા માટે ઢાકા મેટ્રોપોલિટન પોલીસે હિંસક પ્રદર્શનકારીઓને દેખતા જ ગોળી મારવાનો આદેશ જાહેર કર્યો છે. પોલીસ કમિશનર એસએમ સજાત અલીએ સ્પષ્ટ કહ્યું કે, "બસ સળગાવનાર કે બોમ્બ ફેંકનારને ગોળી મારી દેવામાં આવશે. કાયદાએ અમને આ અધિકાર આપ્યો છે."

શેખ હસીના પર શું આરોપો છે?

આ કેસમાં શેખ હસીના મુખ્ય આરોપી છે, જે હાલ ભારતમાં નિર્વાસિત જીવન જીવી રહ્યા છે. તેમની સાથે અન્ય બે આરોપીઓ પૂર્વ ગૃહ મંત્રી અસદુજ્જમાં ખાન કમાલ અને પૂર્વ પોલીસ પ્રમુખ અબ્દુલ્લા અલ મામૂન છે. અબ્દુલ્લા અલ મામૂન સરકારી સાક્ષી બની ગયા છે.

શેખ હસીના પર માનવતા વિરુદ્ધના પાંચ મુખ્ય આરોપો છે. આ આરોપો 2024ના જુલાઈ-ઓગસ્ટ મહિનામાં વિદ્યાર્થીઓના આંદોલન દરમિયાન થયેલા દમન સાથે જોડાયેલા છે, જેમાં 1,400થી વધુ લોકોના મોત થયા હતા. તેમના પર હત્યા, હત્યાનો પ્રયાસ, અત્યાચાર અને અન્ય અમાનવીય કૃત્યોના આરોપ છે. આરોપ છે કે તેમની સરકારે પ્રદર્શનકારીઓને દબાવવા માટે ઘાતક હથિયારો, હેલિકોપ્ટર અને ડ્રોનનો ઉપયોગ કરવાનો આદેશ આપ્યો હતો. આ કેસની સુનાવણી તેમની ગેરહાજરીમાં હાથ ધરવામાં આવી હતી.

સરકારી વકીલોએ હસીના માટે મહત્તમ સજાની સાથે સાથે દોષિતોની સંપત્તિ જપ્ત કરીને પીડિત પરિવારોને વહેંચવાની પણ માંગ કરી છે. આજનો દિવસ બાંગ્લાદેશના રાજકીય ભવિષ્ય માટે અત્યંત નિર્ણાયક સાબિત થશે.

આ પણ વાંચો - પ્રતિબંધો પહેલાં ભારત-રશિયાની મોટી 'ઓઇલ ગેમ': ઓક્ટોબરમાં 22,000 કરોડનું તેલ ખરીદ્યું, હવે રિલાયન્સ જેવી કંપનીઓએ કેમ મોં ફેરવ્યું?