ભારતના જેમ્સ-જ્વેલરી ઉદ્યોગને મોટો ઝટકો! નિકાસમાં 31%નો ધરખમ ઘટાડો, જાણો શું છે કારણ

Gems and Jewellery Export: ભારતીય અર્થતંત્રમાં મહત્વનો ફાળો આપતા જેમ્સ અને જ્વેલરી ઉદ્યોગ માટે ઓક્ટોબર મહિનો નિરાશાજનક રહ્યો છે. જેમ્સ એન્ડ જ્વેલરી એક્સપોર્ટ પ્રમોશન કાઉન્સિલ (GJEPC) દ્વારા જાહેર કરાયેલા આંકડા મુજબ, આ વર્ષે ઓક્ટોબરમાં જેમ્સ અને જ્વેલરીની કુલ નિકાસમાં ગયા વર્ષના સમાન સમયગાળાની સરખામણીમાં 30.57% નો ઘટાડો થયો છે.

આંકડા મુજબ, ઓક્ટોબરમાં કુલ નિકાસ 2168.05 મિલિયન ડોલર (આશરે 19,172.89 કરોડ રૂપિયા) રહી હતી, જ્યારે ગયા વર્ષે ઓક્ટોબરમાં આ આંકડો 3122.52 મિલિયન ડોલર (આશરે 26,237.1 કરોડ રૂપિયા) હતો.

નિકાસમાં ઘટાડા પાછળના મુખ્ય કારણો

GJEPCના અધ્યક્ષ કિરીટ ભણસાલીએ આ ઘટાડા પાછળના કારણો સમજાવતા જણાવ્યું કે, "ઓક્ટોબરમાં નિકાસ ઘટવાનું મુખ્ય કારણ યુએસ ટેરિફ લાગુ થવાની શક્યતા પહેલાં માંગમાં આવેલો ઉછાળો છે. મોટાભાગના તહેવારો માટેનો સ્ટોક 27 ઓગસ્ટ પહેલાં જ કરી લેવામાં આવ્યો હતો, જેના કારણે ઓક્ટોબરમાં માંગ ઓછી રહી." આ ઉપરાંત, સોના-ચાંદીના ભાવમાં સતત થતા ઉતાર-ચઢાવને કારણે પણ જ્વેલરીની નિકાસ પર અસર પડી છે.

જોકે, ઉદ્યોગ નિષ્ણાતો નવેમ્બર મહિનાને લઈને આશાવાદી છે. કિરીટ ભણસાલીએ ઉમેર્યું કે, "ચીનનું બજાર ધીમે ધીમે પાટા પર પાછું ફરી રહ્યું છે અને પશ્ચિમી દેશોમાં ક્રિસમસની માંગ વધવાને કારણે નવેમ્બરમાં નિકાસમાં ફરીથી તેજી જોવા મળશે તેવી પૂરી સંભાવના છે."

કયા સેક્ટરમાં કેટલો ઘટાડો નોંધાયો?

કટ અને પોલિશ્ડ હીરા: આ સેક્ટરમાં 26.97% નો ઘટાડો નોંધાયો, અને નિકાસ 1025.99 મિલિયન ડોલર રહી.

લેબ-ગ્રોન હીરા: પોલિશ્ડ લેબ-ગ્રોન હીરાની નિકાસમાં 34.90%નો મોટો ઘટાડો જોવા મળ્યો, જે ઘટીને 94.37 મિલિયન ડોલર થઈ ગઈ.

સોનાના દાગીના: સોનાના આભૂષણોની નિકાસ 28.4% ઘટીને 850.15 મિલિયન ડોલર પર પહોંચી.

ચાંદીના દાગીના: ચાંદીના ઘરેણાંની નિકાસમાં પણ 16%નો ઘટાડો થયો અને તે 121.37 મિલિયન ડોલર રહી.

રંગીન રત્નો: એપ્રિલથી ઓક્ટોબરના સમયગાળા દરમિયાન રંગીન રત્નોની નિકાસમાં 3.21% નો ઘટાડો નોંધાયો.

આમ, વૈશ્વિક બજારની સ્થિતિ અને સ્થાનિક કારણોસર જેમ્સ અને જ્વેલરી ઉદ્યોગ હાલમાં પડકારજનક સમયમાંથી પસાર થઈ રહ્યો છે, પરંતુ આગામી મહિનાઓમાં સુધારાની અપેક્ષા રાખવામાં આવી રહી છે.

આ પણ વાંચો- H-1B વિઝાની ફી 1 લાખ ડોલર! છતાં ભારતીયોનો દબદબો રહેશે? CM ચંદ્રબાબુ નાયડુએ જણાવ્યું કારણ