Louvre Museum theft: પેરિસના લૂવ્ર મ્યુઝિયમમાં ચોરીનો સનસનીખેજ કિસ્સો, કિંમતી ઝવેરાત લઈ ચોર ફરાર

Louvre Museum theft: ફ્રાન્સની રાજધાની પેરિસમાં આવેલા વિશ્વ વિખ્યાત લૂવ્ર મ્યુઝિયમમાં ચોરીની મોટી ઘટના સામે આવી છે. આ ઘટનાને કારણે મ્યુઝિયમને અસ્થાયી રૂપે બંધ કરી દેવામાં આવ્યું છે. ફ્રાન્સના સંસ્કૃતિ મંત્રી રાશિદા દાતીએ આ ઘટનાની પુષ્ટિ કરી છે અને જણાવ્યું કે ચોરોએ મ્યુઝિયમની સુરક્ષા વ્યવસ્થાને ચકમો આપીને કિંમતી ઝવેરાત ચોરી લીધા છે. હાલ આ ઘટનાની તપાસ ચાલી રહી છે.

રાશિદા દાતીએ સોશિયલ મીડિયા પ્લેટફોર્મ એક્સ પર એક પોસ્ટ શેર કરીને જણાવ્યું કે, “સવારે લૂવ્ર મ્યુઝિયમ ખુલવાના સમયે ડકેતીની ઘટના બની. આ ઘટનાની તપાસ ચાલુ છે, અને અમે ટૂંક સમયમાં વધુ માહિતી આપીશું.” આ ઘટના બાદ લૂવ્ર મ્યુઝિયમની બહાર મુલાકાતીઓની લાંબી કતારો જોવા મળી, જ્યારે સુરક્ષાકર્મીઓને પણ વધારાની સંખ્યામાં તૈનાત કરવામાં આવ્યા હતા.

ન્યૂઝ એજન્સીના અહેવાલ મુજબ, ચોરોએ મ્યુઝિયમની એક પ્રખ્યાત ગેલેરીમાંથી કિંમતી ઝવેરાત ચોરી લીધા અને ત્યારબાદ ફરાર થઈ ગયા. આ ઘટનાને કારણે લૂવ્ર મ્યુઝિયમને આખા દિવસ માટે બંધ રાખવાનો નિર્ણય લેવામાં આવ્યો. મ્યુઝિયમના સત્તાવાળાઓએ એક અધિકૃત નિવેદનમાં જણાવ્યું કે, “વિશેષ પરિસ્થિતિઓને કારણે આજે મ્યુઝિયમ બંધ રહેશે.” જોકે, ચોરીની ઘટના અંગે વધુ વિગતો આપવામાં આવી નથી.

લૂવ્ર મ્યુઝિયમ, જેને આધિકારિક રીતે ‘મ્યુઝી ડૂ લૂવ્ર’ તરીકે ઓળખવામાં આવે છે, તે વિશ્વના સૌથી મોટા અને સૌથી વધુ મુલાકાત લેવાતા સંગ્રહાલયોમાંનું એક છે. આ મ્યુઝિયમમાં લગભગ 5 લાખ કલાકૃતિઓ છે, જેમાં લિયોનાર્ડો દા વિન્ચીની ‘મોના લિસા’, ‘ધ વેડિંગ ફીસ્ટ એટ કાના’ અને ‘ધ વર્જિન એન્ડ ચાઇલ્ડ વિથ સેન્ટ એની’ જેવી અમૂલ્ય કલાકૃતિઓનો સમાવેશ થાય છે.

આ ઘટના બાદ લૂવ્ર મ્યુઝિયમના ચાહકો અને મુલાકાતીઓમાં ચિંતા વ્યાપી ગઈ છે. સોશિયલ મીડિયા પર લોકો આ ઘટના અંગે ચર્ચા કરી રહ્યા છે અને મ્યુઝિયમની સુરક્ષા વ્યવસ્થા પર સવાલ ઉઠાવી રહ્યા છે. તપાસ પૂર્ણ થયા બાદ આ ઘટનાની વધુ વિગતો સામે આવે તેવી આશા છે.

આ પણ વાંચો- ટ્રમ્પની ત્રીજી ધમકી: રશિયન તેલની ખરીદી ચાલુ રાખી તો ભારતને ભારે ટેરિફનો ભોગ બનવું પડશે!