ચીન-ભારત સંબંધોમાં નવો અધ્યાય: ખાતર પુરવઠો અને ટનલ મશીનની સપ્લાય ફરી શરૂ

China-India relations: ચીન અને ભારત વચ્ચેના સંબંધોમાં હકારાત્મક ફેરફારના સંકેત મળી રહ્યા છે. ચીનના વિદેશ મંત્રી વાંગ યીએ ભારતના વિદેશ મંત્રી એસ જયશંકર સાથેની મુલાકાતમાં ખાતર પુરવઠો, રેર અર્થ મટેરિયલ અને ટનલ બોરિંગ મશીન (TBM)ની સપ્લાય ફરી શરૂ કરવાનો વિશ્વાસ આપ્યો છે. આ મુલાકાત વાંગ યીના 2 દિવસીય ભારત પ્રવાસ દરમિયાન થઈ, જે બંને દેશોના સંબંધોમાં સુધારાની દિશામાં મહત્વનું પગલું ગણાય છે.

ગયા મહિને એસ જયશંકરે ચીનની મુલાકાત દરમિયાન યૂરિયા, એનપીકે, ડીએપી, રેર અર્થ મટેરિયલ અને ટીબીએમની સપ્લાયનો મુદ્દો ઉઠાવ્યો હતો. આ ચર્ચાને આગળ વધારતા વાંગ યીએ આ તમામ ચીજવસ્તુઓની નિયમિત સપ્લાયની ખાતરી આપી.

LAC પર તણાવ ઘટાડવાનો પ્રયાસ

બેઠકમાં જયશંકરે પૂર્વ લદ્દાખમાં વાસ્તવિક નિયંત્રણ રેખા (LAC) પર ચાલી રહેલા ગતિરોધને દૂર કરવા પર ભાર મૂક્યો. ગયા 4 વર્ષથી બંને દેશોની સેનાઓ વચ્ચે આ વિસ્તારમાં તણાવ ચાલી રહ્યો છે. જયશંકરે જણાવ્યું કે બંને દેશોએ પરસ્પર સન્માન, સંવેદનશીલતા અને હિતોને આધારે સંબંધોને આગળ વધારવા જોઈએ.

જયશંકરે સ્પષ્ટ કર્યું કે તાઇવાન અંગે ભારતનું વલણ યથાવત છે. ભારત આર્થિક અને સાંસ્કૃતિક સંબંધો માટે તાઇવાનમાં રાજદ્વારી હાજરી જાળવી રાખશે. બંને પક્ષોએ વૈશ્વિક સ્થિતિઓ, ખાસ કરીને વૉશિંગ્ટનની નીતિઓને ધ્યાનમાં રાખીને નજીક આવવાની જરૂરિયાત પર સહમતિ દર્શાવી.

વાંગ યીનો પ્રવાસ કેમ મહત્વનો?

આ પ્રવાસ વડાપ્રધાન નરેન્દ્ર મોદીની શાંઘાઈ સહયોગ સંગઠન (SCO)ના શિખર સંમેલન માટેની ચીનની આગામી મુલાકાત પહેલાં થઈ રહ્યો છે. 2020ના ગલવાન ખીણ સંઘર્ષ બાદ બંને દેશોના સંબંધોમાં તીવ્ર તણાવ આવ્યો હતો. આ પ્રવાસને બંને દેશોના સંબંધો સુધારવાના પ્રયાસના ભાગરૂપે જોવામાં આવે છે.

આ નવા વિકાસ સાથે ચીન અને ભારત વચ્ચે આર્થિક અને રાજદ્વારી સંબંધોમાં સુધારો થવાની આશા જાગી છે, જે બંને દેશો માટે લાંબા ગાળે ફાયદાકારક સાબિત થઈ શકે છે.

આ પણ વાંચો- રેલવેની ઐતિહાસિક સિદ્ધિ: પાટાઓ વચ્ચે પ્રથમ વખત સોલર પેનલ, જુઓ તસવીરો!