ભારતમાં ટેક ક્રાંતિ: 3 દિગ્ગજ કંપનીઓ 67.5 અબજ ડોલરનું રોકાણ કરશે, લાખો યુવાનોને મળશે નોકરી!

India tech investment: ભારત હવે દુનિયાભરની ટેક કંપનીઓ માટે રોકાણનું સૌથી પસંદગીનું સ્થળ બની ગયું છે. દેશમાં આર્ટિફિશિયલ ઇન્ટેલિજન્સ (AI) અને ક્લાઉડ ટેકનોલોજીના વધતા ઉપયોગને કારણે, વિશ્વની ત્રણ સૌથી મોટી ટેક કંપનીઓએ ભારતમાં કુલ 67.5 અબજ ડોલર (આશરે 5.6 લાખ કરોડ રૂપિયા) ના મેગા ઇન્વેસ્ટમેન્ટની જાહેરાત કરી છે. આ રોકાણ દેશના વિકાસને નવી દિશા આપશે અને આવનારા સમયમાં રોજગારીની લાખો નવી તકો ઊભી કરશે.

ભારત આજે વિશ્વના ટોચના AI હબ બનવાની દિશામાં ઝડપથી આગળ વધી રહ્યું છે. આ કારણે જ એમેઝોન, માઇક્રોસોફ્ટ અને ગૂગલ જેવી દિગ્ગજ કંપનીઓ ભારતમાં માત્ર મોટા બજાર તરીકે જ નહીં, પરંતુ ટેલેન્ટ અને ઇનોવેશનના કેન્દ્ર તરીકે પણ જોઈ રહી છે.

એમેઝોનનો મેગા પ્લાન: 35 અબજ ડોલરનું રોકાણ

ઈ-કોમર્સ જાયન્ટ એમેઝોને જાહેરાત કરી છે કે તે વર્ષ 2030 સુધીમાં ભારતમાં 35 અબજ ડોલર થી વધુનું રોકાણ કરશે. કંપનીનું મુખ્ય ફોકસ ડેટા સેન્ટર, ક્લાઉડ ટેકનોલોજી, ઈ-કોમર્સ ઈન્ફ્રાસ્ટ્રક્ચર અને લોજિસ્ટિક્સ નેટવર્કને વધુ મજબૂત બનાવવાનું રહેશે. આ રોકાણથી માત્ર નાના વેપારીઓને જ ફાયદો નહીં થાય, પરંતુ 'ડિજિટલ ઇન્ડિયા' અભિયાનને પણ મોટી સફળતા મળશે.

માઇક્રોસોફ્ટે પણ ભારતમાં 17.5 અબજ ડોલર ના રોકાણ માટે પોતાનો બ્લુપ્રિન્ટ તૈયાર કરી લીધો છે. કંપની આ રોકાણનો ઉપયોગ ક્લાઉડ અને AI ઈન્ફ્રાસ્ટ્રક્ચરના વિકાસ, સ્કિલિંગ પ્રોગ્રામ્સ અને નવા ડેવલપમેન્ટ સેન્ટર સ્થાપવા માટે કરશે. માઇક્રોસોફ્ટના CEO સત્ય નડેલાએ જણાવ્યું કે, "AI અને નવી ટેકનોલોજી આવનારા દાયકામાં કરોડો લોકોના કામ કરવાની રીત બદલી નાખશે." તેમના મતે, 2030 સુધીમાં ભારતમાં 57.5 મિલિયન ડેવલપર્સ હશે, જે ભારતને વિશ્વની સૌથી મોટી ડેવલપર કોમ્યુનિટી બનાવશે.

ગૂગલ પણ લાવશે લાખો નોકરીઓ

આ યાદીમાં ગૂગલ પણ પાછળ નથી. ગૂગલના AI અને ક્લાઉડ આધારિત પ્રોજેક્ટ્સને કારણે દેશમાં લગભગ 1,88,000 પ્રત્યક્ષ અને પરોક્ષ નોકરીઓનું સર્જન થવાનો અંદાજ છે. આ ઉપરાંત, કંપની ભારતના સ્થાનિક AI મોડલ, સ્ટાર્ટઅપ ઇકોસિસ્ટમ અને ડિજિટલ શિક્ષણને પ્રોત્સાહન આપવા માટે પણ રોકાણ કરી રહી છે.

અદાણી ગ્રુપ પણ રેસમાં સામેલ

વિદેશી કંપનીઓ સાથે ભારતીય ઉદ્યોગપતિઓ પણ દેશના વિકાસમાં મોટો ફાળો આપવા તૈયાર છે. અદાણી ગ્રુપે આગામી છ વર્ષમાં ભારતમાં 12 લાખ કરોડ રૂપિયા નું રોકાણ કરવાની યોજના બનાવી છે. ગ્રુપના ચેરમેન ગૌતમ અદાણીએ સત્ય નડેલા સાથેની મુલાકાતમાં AI ના ભવિષ્ય અને દેશની ટેકનોલોજી ક્ષમતાને વધુ મજબૂત કરવા પર ચર્ચા કરી હતી. આ વિશાળ રોકાણ એ વાતનો પુરાવો છે કે ભારત ટેકનોલોજી અને નવીનતાના ક્ષેત્રે વિશ્વનું નેતૃત્વ કરવા માટે સંપૂર્ણ રીતે તૈયાર છે.

આ પણ વાંચો- સરકારી બેંકોનો મોટો નિર્ણય: 5.5 વર્ષમાં 6.15 લાખ કરોડની લોન માંડી વાળી, જાણો સામાન્ય માણસ પર શું થશે અસર?