ગુજરાતમાં મતદાર સુધારણા કાર્યક્રમ: BLO પર ડિજિટાઈઝેશનનો બોજ, 4 જીવ ગયા અને તણાવ વધ્યો

SIR Voter Revision Program: ગુજરાતમાં ચૂંટણી પંચ દ્વારા હાલ મતદાર યાદી સઘન સુધારણા કાર્યક્રમ (SIR) પૂરજોશમાં ચાલી રહ્યો છે. આ મહત્વપૂર્ણ કાર્યક્રમ અંતર્ગત મતદાર યાદીને અપડેટ કરવાની કામગીરી ચાલી રહી છે, પરંતુ તેની સાથે સંકળાયેલા બૂથ લેવલ ઓફિસર (BLOs) અને શિક્ષકો પર વધતા ભારણ અને દબાણને કારણે ગંભીર પરિણામો સામે આવી રહ્યા છે. આ કામગીરીના તણાવ અને નોટિસોના ભય વચ્ચે ગુજરાતમાં અત્યાર સુધીમાં 4 BLOના દુખદ અવસાન થયા છે, જેમાંથી 2 BLOને હાર્ટ એટેક આવ્યો હોવાનું પણ નોંધાયું છે.

મતદારોના ફોર્મનું વિતરણ, કલેક્શન અને વેરિફિકેશન ઉપરાંત, હવે BLOs અને શિક્ષકોના શીરે ફોર્મને સ્કેન કરવા સહિત ડિજિટાઈઝેશનની વધારાની જવાબદારી પણ નાખવામાં આવી છે. આ કામગીરી નિર્ધારિત સમયમર્યાદામાં પૂરી કરવા માટે તેમના પર સતત દબાણ કરવામાં આવી રહ્યું છે.

અમદાવાદ જિલ્લાની વર્તમાન સ્થિતિ

અમદાવાદ જિલ્લાના 21 વિધાનસભા મતવિસ્તારોમાં કુલ 62,59,620 નોંધાયેલા મતદારો છે. તેમાંથી 62,20,720 મતદારોને ફોર્મનું વિતરણ થઈ ચૂક્યું છે. ભરાયેલા ફોર્મ પરત મેળવવાની કામગીરી BLOs દ્વારા કરવામાં આવ્યા બાદ, ડિજિટાઈઝેશનની પ્રક્રિયા પણ તેમના જ માથે છે. અમદાવાદ જિલ્લામાં આજે સવાર સુધીમાં 25,45,846 ફોર્મનું ડિજિટાઈઝેશન પૂર્ણ થયું છે, જે કુલ કામગીરીના 40.51 ટકા જેટલું છે. જોકે, કેટલાક વિસ્તારોમાં આ આંકડો હજુ 25થી 30 ટકાની આસપાસ જ છે. કુલ 25,32,110 ફોર્મનું BLOs દ્વારા વેરિફિકેશન પણ કરવામાં આવ્યું છે.

- 10,478 મતદારોનું કાયમી રહેઠાણ બદલાઈ ગયું છે.

- 14,012 મતદારો પહોંચની બહાર છે, એટલે કે 'અનટ્રેસેબલ' છે.

- 95,301 મતદારોના મૃત્યુ થઈ ચૂક્યા છે.

આમ, હાલની સ્થિતિએ અમદાવાદ જિલ્લામાં કુલ 44.13 ટકા એટલે કે 27,62,322 ફોર્મનું ડિજિટાઈઝેશન પૂર્ણ થયું છે.

શિક્ષકો અને BLOs પર માનસિક તણાવ

શૈક્ષિક સંઘો અને શિક્ષક મંડળો દ્વારા વારંવાર ફરિયાદ કરવામાં આવી રહી છે કે ડિજિટાઈઝેશનની કામગીરી માટે શિક્ષકોને દિવસ ઉપરાંત રાત્રે પણ હાજર રહેવાના આદેશો આપવામાં આવી રહ્યા છે. કામગીરી પૂર્ણ કરવા માટે સતત દબાણ અને અમદાવાદ જિલ્લામાં 500થી વધુ શિક્ષકોને કામગીરીમાં બેદરકારી બદલ નોટિસો આપવાની ઘટનાઓએ BLOs અને શિક્ષકો પર માનસિક તણાવ વધાર્યો છે. આ તણાવના કારણે ગુજરાતમાં અત્યાર સુધીમાં 4 BLOsના મૃત્યુ થયા છે, જેમાં 2 કેસ હાર્ટ એટેકના નોંધાયા છે, જેને આ કામગીરીના દબાણ સાથે સીધો સંબંધ હોવાનું માનવામાં આવે છે.

મતદારોને ફોર્મ ભરવા માટે માર્ગદર્શન આપવા તેમજ ફોર્મ વિતરણ અને સ્વીકારવા માટે 22 અને 23 નવેમ્બરના રોજ બે દિવસ સુધી તમામ મતવિસ્તારોમાં નિર્ધારિત સ્કૂલોમાં કેમ્પનું આયોજન કરવામાં આવ્યું હતું. આ છેલ્લો કેમ્પ હતો. હવે BLOsએ બાકી રહેલા ફોર્મ ઘરે જઈને એકત્રિત કરવાના રહેશે. ફોર્મ લેવાની અને ડિજિટાઈઝેશનની આ સમગ્ર કામગીરી માટેની અંતિમ તારીખ 4 ડિસેમ્બર નિર્ધારિત કરવામાં આવી છે. આ તારીખ સુધીમાં BLOsને આ જંગી કામગીરી પૂર્ણ કરવાની છે, જે તેમના પર અસાધારણ બોજ અને દબાણ ઊભું કરી રહી છે.

આ પણ વાંચો- Indian Economy: US, ચીન અને રશિયા જોતા જ રહી ગયા, ભારતે આર્થિક ક્ષેત્રે કરી કમાલ, જાણો કેવી રીતે બન્યું નંબર-1