PMAY-Urban 2.0માં મોટો નિર્ણય: કેન્દ્રે 1.41 લાખ નવા ઘરોને આપી મંજૂરી, ગુજરાત સહિત 14 રાજ્યોને ફાયદો

PMAY Urban 2.0: શહેરોમાં રહેતા ગરીબ અને મધ્યમવર્ગીય પરિવારો માટે મોટા સમાચાર આવ્યા છે. કેન્દ્ર સરકારે પ્રધાનમંત્રી આવાસ યોજના-શહેરી 2.0 (PMAY-Urban 2.0) અંતર્ગત વધુ 1.41 લાખ ઘરોના બાંધકામને મંજૂરી આપી દીધી છે. આ નિર્ણય લેવામાં આવ્યા બાદ હવે આ યોજના હેઠળ કુલ મંજૂર થયેલા આવાસોની સંખ્યા 10 લાખને પાર કરી ગઈ છે.

કેન્દ્રીય આવાસ અને શહેરી બાબતો મંત્રાલયે આ મહત્વપૂર્ણ જાહેરાત કરતાં જણાવ્યું કે આ મંજૂરી સેન્ટ્રલ સેન્ક્શનિંગ એન્ડ મોનિટરિંગ કમિટી (CSMC)ની બેઠકમાં આપવામાં આવી છે. આ બેઠકમાં આવાસ અને શહેરી બાબતોના સચિવ શ્રીનિવાસ કટિકિથાલાએ અધ્યક્ષતા સંભાળી હતી. બેઠક દરમિયાન યોજનાની પ્રગતિની વિગતવાર સમીક્ષા કરવામાં આવી અને ઘરોના સમયસર બાંધકામ તથા વિતરણને ખાતરી કરવા માટે અસરકારક વ્યૂહરચનાઓ પર ચર્ચા કરવામાં આવી.

કયા રાજ્યોને મળશે લાભ?

નવી મંજૂરી હેઠળ દેશના 14 રાજ્યો અને કેન્દ્રશાસિત પ્રદેશોને સમાવેશ કરવામાં આવ્યો છે. આમાં આસામ, આંધ્ર પ્રદેશ, છત્તીસગઢ, ગુજરાત, જમ્મુ-કાશ્મીર, પુદુચેરી, રાજસ્થાન, તમિલનાડુ, મધ્ય પ્રદેશ, મેઘાલય, હરિયાણા, ઓડિશા, ઉત્તરાખંડ અને ઉત્તર પ્રદેશનો સમાવેશ થાય છે. મંત્રાલયે તમામ રાજ્યો અને કેન્દ્રશાસિત પ્રદેશોને સૂચના આપી છે કે જ્યાં આવાસોનું બાંધકામ થવાનું છે, ત્યાં યોગ્ય માળખાકીય સુવિધાઓ, સારા રસ્તાઓ, પબ્લિક ટ્રાન્સપોર્ટની સુવિધા અને કનેક્ટિવિટી હોવી આવશ્યક છે. આનાથી લાભાર્થીઓને રહેવા માટે સગવડતા મળી શકે અને તેઓ સામાન્ય જીવન જીવી શકે.

મંત્રાલયે સ્પષ્ટ કર્યું કે PMAY-Urban 2.0નો મુખ્ય હેતુ શહેરોમાં રહેતા ગરીબ અને જરૂરિયાતમંદ પરિવારોને સલામત અને આરામદાયક ઘર પૂરા પાડવાનો છે. આ યોજના સમાજમાં બધા માટે સમાન તકો લાવવાનું કામ કરે છે અને ગરીબ પરિવારોને પક્કા મકાન આપીને તેમના જીવનધોરણમાં સુધારો લાવે છે. આ યોજનાની એક ખાસિયત એ પણ છે કે આમાં મહિલા સશક્તિકરણ પર પણ ખાસ ધ્યાન આપવામાં આવ્યું છે. મોટાભાગના ઘરોની મંજૂરી મહિલા પરિવાર વડાના નામે અથવા સહ-માલિકીમાં આપવામાં આવે છે. આથી મહિલાઓની આર્થિક અને સામાજિક સ્થિતિ મજબૂત બને છે અને તેઓ આત્મનિર્ભર બની શકે છે. સચિવ કટિકિથાલાએ બેઠકમાં ભાર મૂકતાં કહ્યું કે અમે ઈચ્છીએ છીએ કે ઘરોના બાંધકામ માટે એવા સ્થળોની પસંદગી કરવામાં આવે જ્યાં રહેવાની સુવિધાઓ અને કનેક્ટિવિટી બહેતર હોય. આ પગલાથી લાભાર્થીઓનું જીવન સરળ અને સુવિધાજનક બનશે.

યોજનાનો અત્યાર સુધીનો પ્રવાસ

પ્રધાનમંત્રી આવાસ યોજના-શહેરી 2.0 એ કેન્દ્ર સરકારની મહત્વાકાંક્ષી યોજનાઓમાંની એક છે. હવે આ નવી મંજૂરી સાથે કુલ 10 લાખથી વધુ ઘરોને મંજૂરી મળી ચૂકી છે. આ યોજના શહેરી વિસ્તારોમાં રહેતા લાખો પરિવારોને પોતાના ઘરનું સ્વપ્ન સાકાર કરવામાં મદદ કરી રહી છે. મંત્રાલયે જણાવ્યું કે આગામી સમયમાં ઘરોના બાંધકામની ગતિ વધારવા અને ગુણવત્તા જાળવવા પર ધ્યાન કેન્દ્રિત કરવામાં આવશે. રાજ્યો સાથે સતત સંપર્કમાં રહીને પ્રોજેક્ટ દેખરેખ કરવામાં આવશે જેથી કોઈ પણ પ્રકારનો વિલંબ ન થાય.

આ યોજનાથી માત્ર ગરીબ પરિવારોને જ નહીં, પરંતુ બાંધકામ ક્ષેત્રમાં પણ રોજગારીના નવા અવસરો ઊભા થશે. સ્થાનિક કારીગરો, મજૂરો અને નાના વેપારીઓને પણ આનો લાભ મળશે. કેન્દ્ર સરકારનો આ નિર્ણય શહેરી ગરીબો માટે એક મોટી રાહત સમાન છે. હવે ગુજરાત સહિત 14 રાજ્યોના હજારો પરિવારો પોતાના પક્કા મકાનમાં રહેવાના સ્વપ્નને સાકાર કરી શકશે અને સન્માનપૂર્વક જીવન જીવી શકશે.

આ પણ વાંચો - Festival Business India: તહેવારો અને લગ્નમાં 7 લાખ કરોડનો વિશાળ વ્યાપાર! આ વસ્તુઓનું થશે સૌથી વધુ વેચાણ