Ayodhya Airport : 350 કરોડનો ખર્ચ, ત્રણ શહેરોથી સીધી ફ્લાઈટ... વાંચો અયોધ્યામાં તૈયાર નવા એરપોર્ટની ખાસ વિશેષતાઓ

Ayodhya Airport : અયોધ્યામાં ભવ્ય રામ મંદિરના અભિષેકનું કાઉન્ટડાઉન શરૂ થઈ ગયું છે. વડાપ્રધાન નરેન્દ્ર મોદી આવતા વર્ષે 22 જાન્યુઆરીએ આ ભવ્ય મંદિરનું ઉદ્ઘાટન કરશે. પરંતુ આ પહેલા 30 ડિસેમ્બરે વડાપ્રધાન મોદી અયોધ્યામાં મર્યાદા પુરુષોત્તમ શ્રી રામ ઈન્ટરનેશનલ એરપોર્ટ અને રેલવે સ્ટેશનનું ઉદ્ઘાટન કરવા જઈ રહ્યા છે.

રામ મંદિરને સામાન્ય જનતા માટે સત્તાવાર રીતે ખોલવાને કારણે, અયોધ્યા શહેરમાં હિન્દુ તીર્થયાત્રીઓની મોટી ભીડની અપેક્ષા છે. આવી સ્થિતિમાં રામનગરમાં એરપોર્ટ અને રેલવે સ્ટેશનની ખૂબ જ જરૂર હતી.

એરપોર્ટ રામ મંદિરની તર્જ પર બનાવવામાં આવ્યું

અયોધ્યા એરપોર્ટનું ટર્મિનલ પણ ખૂબ જ ભવ્ય રીતે બનાવવામાં આવ્યું છે. રામની નગરીમાં બની રહેલા એરપોર્ટની એક મોટી ખાસિયત એ છે કે તેને મંદિરની તર્જ પર બનાવવામાં આવ્યું છે. એરપોર્ટની દીવાલો પર બ્યુટીફિકેશન માટે રામાયણ સંબંધિત મહત્વની તસવીરો પ્રદર્શિત કરવામાં આવી છે. એરપોર્ટનું આર્કિટેક્ચર અને ડિઝાઇન ખૂબ જ ખાસ છે. તે શ્રી રામના જીવનથી સંપૂર્ણપણે પ્રેરિત છે.

ઈન્ડિગો અને એર ઈન્ડિયા એક્સપ્રેસ 30 ડિસેમ્બરે આ નવા એરપોર્ટની ઉદઘાટન ફ્લાઈટનું સંચાલન કરશે. બંને એરલાઈન્સે દિલ્હી, મુંબઈ અને અમદાવાદથી અયોધ્યા સુધી હવાઈ સેવાની જાહેરાત કરી દીધી છે. આ હવાઈ સેવા જાન્યુઆરી 2024થી શરૂ થશે.

તમને જણાવી દઈએ કે આ એરપોર્ટના પહેલા તબક્કાની કિંમત લગભગ 350 કરોડ રૂપિયા હોવાનું કહેવાય છે. નવી ટર્મિનલ બિલ્ડીંગ કુલ 6500 ચોરસ મીટર વિસ્તારમાં બનેલ છે. આ એરપોર્ટની ક્ષમતા વાર્ષિક 10 લાખ મુસાફરોની છે.

સૂત્રોનું કહેવું છે કે એરપોર્ટના વિકાસના બીજા તબક્કા હેઠળ 5000 ચોરસ મીટરનું નવું ટર્મિનલ બિલ્ડિંગ બનાવવાની યોજના છે, જેમાં વાર્ષિક 60 લાખ મુસાફરોની ક્ષમતા હશે.

ફ્લાઇટનો સમય જાણો

11 જાન્યુઆરી, 2024થી અમદાવાદ અને અયોધ્યા વચ્ચે અઠવાડિયામાં ત્રણ દિવસ ફ્લાઈટ્સ ઓપરેટ થશે. પ્રથમ તબક્કામાં અયોધ્યાથી દિલ્હી અને અમદાવાદ માટે ફ્લાઈટ શરૂ થવા જઈ રહી છે. 6 જાન્યુઆરીએ પહેલી ફ્લાઈટ દિલ્હીથી સવારે 11.55 વાગ્યે ઉપડશે અને બપોરે 1.15 વાગ્યે અયોધ્યા પહોંચશે. આ ફ્લાઈટ અયોધ્યાથી બપોરે 1.45 વાગ્યે ઉપડશે અને બપોરે 3 વાગ્યે દિલ્હી પહોંચશે.

ઈન્ડિગોના ગ્લોબલ સેલ્સ હેડ વિનય મલ્હોત્રાના જણાવ્યા અનુસાર 10 જાન્યુઆરીથી દિલ્હીથી અયોધ્યા અને અયોધ્યાથી દિલ્હી વચ્ચેની દૈનિક ફ્લાઈટ્સ એક જ સમયે ઓપરેટ થશે. અમદાવાદથી અયોધ્યા અને અયોધ્યાથી અમદાવાદની ફ્લાઈટ મંગળવાર, ગુરુવાર અને શનિવારે ઓપરેટ થશે.

11 જાન્યુઆરીએ અમદાવાદથી સવારે 9.10 વાગ્યે ફ્લાઇટ ઉપડશે અને સવારે 11 વાગ્યે અયોધ્યા પહોંચશે. તે 11.30 કલાકે અયોધ્યાથી નીકળશે અને 1.40 કલાકે અમદાવાદ પહોંચશે. કહેવામાં આવી રહ્યું છે કે દિલ્હીથી અયોધ્યાનું અંતર ફ્લાઇટ દ્વારા 1 કલાક 20 મિનિટમાં કાપવામાં આવશે.

આ પણ વાંચો - Ayodhya Ram Mandir: યજ્ઞ પાત્ર, અરણી મંથન, ગદા, શંખ, પદ્મ અને ચક્ર... પ્રાણ પ્રતિષ્ઠા સમારોહ માટે શું-શું તૈયાર કરી રહ્યાં છે કાશીના કારીગર