FASTag એન્યુઅલ પાસને ધૂમ રિસ્પોન્સ: 4 દિવસમાં 5 લાખથી વધુ લોકોએ કર્યું એક્ટિવેટ

સ્વતંત્રતા દિવસે લોન્ચ થયેલા FASTag એન્યુઅલ પાસને યૂઝર્સ તરફથી જબરદસ્ત રિસ્પોન્સ મળી રહ્યો છે. નેશનલ હાઈવે ઓથોરિટી ઓફ ઈન્ડિયા (NHAI)ના જણાવ્યા અનુસાર, 15 ઓગસ્ટ 2025ના રોજ શરૂ થયેલા આ પાસને માત્ર 4 દિવસમાં 5 લાખથી વધુ યૂઝર્સે બુક અથવા એક્ટિવેટ કર્યો છે. પહેલા જ દિવસે સાંજના 7 વાગ્યા સુધીમાં 1.4 લાખ લોકોએ આ પાસ મેળવ્યો હતો.

NHAIનું કહેવું છે કે, FASTag એન્યુઅલ પાસ ટેક્નોલોજી આધારિત મોબિલિટીની દિશામાં એક મહત્ત્વનું પગલું છે. આ પાસ યૂઝર્સને ઝડપી, સરળ અને સુગમ ટોલિંગ અનુભવ પૂરો પાડે છે, જેનાથી મુસાફરી વધુ આરામદાયક બને છે.

રાજમાર્ગયાત્રા એપની રેકોર્ડબ્રેક યાત્રા

FASTag એન્યુઅલ પાસની સફળતા સાથે NHAIનું Rajmargyatra મોબાઈલ એપ પણ ચર્ચામાં છે. આ એપે 15 લાખથી વધુ ડાઉનલોડ સાથે ગૂગલ પ્લે સ્ટોર પર ટોપ રેન્કિંગ મેળવ્યું છે. એપે ઓવરઓલ રેન્કિંગમાં 23મું અને ટ્રાવેલ કેટેગરીમાં બીજું સ્થાન હાંસલ કર્યું છે. 4.5 સ્ટાર રેટિંગ સાથે આ એપ યૂઝર્સમાં ખૂબ લોકપ્રિય બની છે.

કેન્દ્ર સરકારે 15 ઓગસ્ટ 2025ના રોજ NHAI દ્વારા સંચાલિત નેશનલ એક્સપ્રેસવે (NE) અને નેશનલ હાઈવે (NH) પર મુસાફરીને સરળ બનાવવા માટે FASTag એન્યુઅલ પાસ લોન્ચ કર્યો. આ પાસની કિંમત માત્ર 3,000 રૂપિયા છે, જેના દ્વારા યૂઝર્સ 1 વર્ષ અથવા 200 ટ્રિપ્સ (જે પહેલું આવે તે) સુધી ટોલ ફ્રી મુસાફરી કરી શકે છે. આ પાસ ફક્ત પ્રાઈવેટ વાહનો જેવા કે કાર, જીપ અથવા વેન માટે જ લાગુ છે. કોમર્શિયલ વાહનો જેમ કે ટેક્સી, કેબ, બસ કે ટ્રક આમાં સામેલ નથી.

કેવી રીતે એક્ટિવેટ કરવું?

Rajmargyatra મોબાઈલ એપ ખોલો અને ‘એન્યુઅલ ટોલ પાસ’ ટેબ પર ક્લિક કરો.

‘એક્ટિવેટ’ બટન પર ક્લિક કરીને ‘ગેટ સ્ટાર્ટેડ’ પસંદ કરો.

તમારા વાહનનો નંબર દાખલ કરો, જે VAHAN ડેટાબેઝ દ્વારા ચકાસાશે.

યોગ્ય વાહન હોવા પર મોબાઈલ નંબર દાખલ કરો અને OTP દ્વારા ચકાસણી કરો.

UPI અથવા કાર્ડ દ્વારા 3,000 રૂપિયાનું પેમેન્ટ કરો.

2 કલાકની અંદર તમારા વાહનના FASTag પર પાસ એક્ટિવેટ થઈ જશે.

આ પણ વાંચો-એશિયા કપ માટે ટીમ ઈન્ડિયાની જાહેરાત, સૂર્યકુમાર યાદવને મળી કેપ્ટનશીપ, આ ખેલાડી બન્યો વાઈસ કેપ્ટન

આ પાસ ખરીદવા માટે અલગ FASTagની જરૂર નથી, તે હાલના FASTag પર જ એક્ટિવેટ થશે, પરંતુ વાહનનો રજિસ્ટ્રેશન નંબર FASTag સાથે લિંક હોવો જરૂરી છે. FASTag એન્યુઅલ પાસ અને Rajmargyatra એપની આ સફળતા ભારતની ટોલિંગ સિસ્ટમમાં ટેક્નોલોજીના વધતા ઉપયોગનું પ્રતીક છે, જે મુસાફરીને વધુ સરળ અને અનુકૂળ બનાવી રહી છે.