PARIKSHA PE CHARCHA 2024: PM મોદીને માત્ર 30 સેકન્ડમાં કેવી રીતે આવી જાય છે ગાઢ ઊંઘ ? ખુદ વડાપ્રધાને વિદ્યાર્થીઓ સાથે શેર કર્યું આ સિક્રેટ

PARIKSHA PE CHARCHA 2024: પ્રધાનમંત્રી નરેન્દ્ર મોદીએ કહ્યું કે, તેઓ સૂવાની માત્ર 30 સેકન્ડમાં જ ગાઢ નિંદ્રામાં આવી જાય છે. તેમણે 'સ્ક્રીન ટાઈમ' સામે રીલ્સના વ્યસની વિદ્યાર્થીઓને ચેતવણી આપી હતી, જે ઊંઘમાં ખલેલ પહોંચાડે છે. નવી દિલ્હીમાં 'ભારત મંડપમ' ખાતે 'પરીક્ષા પે ચર્ચા'ની સાતમી આવૃત્તિ દરમિયાન વિદ્યાર્થીઓ, વાલીઓ અને શિક્ષકો સાથે વાર્તાલાપ કરતા વડાપ્રધાને કહ્યું કે ઊંઘના સમયને 'સ્ક્રીન ટાઈમ' ખાઈ જાય છે.

પીએમ મોદીએ કહ્યું, "સંતુલિત જીવનશૈલી જાળવવા માટે, વ્યક્તિએ દરેક વસ્તુનો અતિરેક ટાળવો જોઈએ. સ્વસ્થ મન માટે સ્વસ્થ શરીર મહત્વપૂર્ણ છે અને આ માટે થોડી નિયમિતતા, સૂર્યપ્રકાશમાં સમય પસાર કરવો અને નિયમિત અને સંપૂર્ણ ઊંઘ લેવી જરૂરી છે. તેમણે કહ્યું કે, "સ્ક્રીન ટાઈમ જેવી આદતો જરૂરી ઊંઘનો સમય ખાઈ રહી છે, જેને આધુનિક આરોગ્ય વિજ્ઞાન દ્વારા ખૂબ જ મહત્વપૂર્ણ માનવામાં આવે છે.

વિદ્યાર્થીઓના પ્રશ્નોના જવાબો

પરીક્ષાની તૈયારી અને તંદુરસ્ત જીવનશૈલી વચ્ચે સંતુલન જાળવવાનો મુદ્દો ઉઠાવતા, રાજસ્થાનના વરિષ્ઠ માધ્યમિક શાળાના વિદ્યાર્થી ધીરજ સુભાષ, નજમા ખાતૂન, પીએમ શ્રી કેન્દ્રીય વિદ્યાલય, કારગીલના અભિષેક કુમાર તિવારી અને અરુણાચલ પ્રદેશના સરકારી ઉચ્ચતર માધ્યમિક શિક્ષક ટોબી લહમે વડાપ્રધાનને કસરત સાથે અભ્યાસનું સંચાલન કરવા વિશે પૂછ્યું.

સમાચાર એજન્સી પીટીઆઈના જણાવ્યા અનુસાર પીએમ મોદીએ સંતુલિત આહારની જરૂરિયાત પર ભાર મૂક્યો હતો. તંદુરસ્તી માટે નિયમિત કસરત અને શારીરિક પ્રવૃત્તિઓના મહત્વ પર પણ ભાર મૂક્યો હતો. છેલ્લા છ વર્ષથી શિક્ષણ મંત્રાલય દ્વારા આયોજિત 'પરીક્ષા પે ચર્ચા'માં વિદ્યાર્થીઓ, વાલીઓ અને શિક્ષકો ભાગ લઈ રહ્યા છે.

વાલીઓને સલાહ આપી

વડા પ્રધાન મોદીએ જણાવ્યું હતું કે દબાણનો સામનો કરવામાં મદદ કરવા માટે બાળકોમાં નિશ્ચય કેળવવો મહત્વપૂર્ણ છે અને માતાપિતા અને શિક્ષકોએ વિદ્યાર્થીઓ દ્વારા સામનો કરવામાં આવતા પડકારોનો સામૂહિક રીતે સામનો કરવો જોઈએ. 10મા અને 12માની બોર્ડની પરીક્ષા પહેલા વિદ્યાર્થીઓના માનસિક તણાવને ઓછો કરવા માટે પીએમ મોદીએ વાલીઓને સલાહ આપી હતી કે તેઓ તેમના બાળકના રિપોર્ટ કાર્ડને તેમનું વિઝિટિંગ કાર્ડ ન માને. તેમણે એવું પણ સૂચન કર્યું હતું કે વિદ્યાર્થીઓએ પોતાની સાથે સ્પર્ધા કરવી જોઈએ અન્ય સાથે નહીં.

તમને જણાવી દઈએ કે, કોરોના મહામારી (કોવિડ-19)ને કારણે ચોથી આવૃત્તિનું આયોજન ઓનલાઈન કરવામાં આવ્યું હતું, જ્યારે પાંચમી અને છઠ્ઠી આવૃત્તિનું આયોજન ટાઉન-હોલ ફોર્મેટમાં કરવામાં આવ્યું હતું. ગયા વર્ષની આવૃત્તિમાં કુલ 31.24 લાખ વિદ્યાર્થીઓ, 5.60 લાખ શિક્ષકો અને 1.95 લાખ વાલીઓએ ભાગ લીધો હતો. આ વર્ષે, 'માય gov પોર્ટલ' પર લગભગ 2.26 કરોડ નોંધણીઓ થઈ છે.

આ પણ વાંચો-South Korea Fried Toothpicks: ફ્રાઇડ ટૂથપીક્સ લોકોના સ્વાસ્થ્ય માટે છે જોખમી, દક્ષિણ કોરિયાના લોકો માટે ઊભી કરે છે મુશ્કેલી