તમે પણ ચેતજો.. GST નામે કરોડોની થઈ છે છેતરપિંડી, નકલી કંપનીઓ બનાવી થઈ રહી હતી કરોડોની હેરાફેરી

GST Fraud Fake Companies: ઠાણેની સાયબર પોલીસે GST સિસ્ટમમાં મોટી છેતરપિંડીનો ભાંડો ફોડ્યો છે. આ કેસમાં આરોપીઓએ નકલી કંપનીઓ બનાવીને 75.48 કરોડ રૂપિયાના બોગસ ટ્રાન્ઝેક્શન કર્યા હતા. મુખ્ય આરોપી મુંબઈના અંધેરી વિસ્તારમાં રહે છે, જેની સાથે તેના સાથીદારો પણ સંડોવાયેલા છે.

કેવી રીતે થઈ છેતરપિંડી?

પોલીસના જણાવ્યા મુજબ, આ કૌભાંડ નવેમ્બર 2024થી એપ્રિલ 2025 વચ્ચે ચાલ્યું હતું. આરોપીએ એક લેપટોપ વેચાણ કરનાર વ્યક્તિ અને તેના મિત્ર સાથે દોસ્તી કરી. તેમને વિશ્વાસમાં લઈને કહ્યું કે, "હું તમારી GST ફાઈલિંગ ઓનલાઈન કરી આપીશ." આ બહાને તેણે તેમનો યુઝર આઈડી અને પાસવર્ડ મેળવી લીધો.

આ પછી આરોપીએ આ આઈડીનો ઉપયોગ કરીને નકલી કંપનીઓના નામે બોગસ બિલ જમા કરાવ્યા. આ બિલ દ્વારા સિસ્ટમમાં 75,48,42,087 રૂપિયાનું ટ્રાન્ઝેક્શન બતાવવામાં આવ્યું. બધું જ કાગળ પર હતું – વાસ્તવમાં કોઈ વેપાર થયો નહોતો.

33 વર્ષીય ફરિયાદીને 31 ઓક્ટોબરે GST વિભાગ તરફથી નોટિસ આવી. તેમાં તેમના નામે કરોડોના ટ્રાન્ઝેક્શન બતાવવામાં આવ્યા હતા. આ જોઈને તેમને શંકા ગઈ. તપાસ કરતાં ખબર પડી કે કોઈએ તેમની આઈડીનો દુરુપયોગ કર્યો છે. તરત જ તેમણે ઠાણે સાયબર પોલીસમાં ફરિયાદ નોંધાવી.

પોલીસની કાર્યવાહી

પોલીસે આરોપીઓ વિરુદ્ધ IPCની સંબંધિત કલમો હેઠળ કેસ નોંધ્યો છે. મુખ્ય આરોપી અને તેના સાથીદારોની શોધખોળ ચાલુ છે. તપાસમાં આવી નીકળ્યું કે આરોપીએ ઘણી નકલી કંપનીઓ બનાવી હતી, જેના દ્વારા GST ક્રેડિટનો દુરુપયોગ કરવામાં આવ્યો હતો.

આથી, કોઈને પણ તમારો GST લોગિન આઈડી કે પાસવર્ડ ન આપો. ઓનલાઈન ફાઈલિંગ પોતે કરો અથવા વિશ્વાસપાત્ર વ્યક્તિ પાસે કરાવો. આ કેસ ફરી એકવાર દર્શાવે છે કે ડિજિટલ યુગમાં સાયબર છેતરપિંડી કેટલી ઝડપથી ફેલાઈ રહી છે. તમારી માહિતી સુરક્ષિત રાખો, સતર્ક રહો.

આ પણ વાંચો-470 સાંસદ હશે ત્યારે જ દેશ બનશે હિંદુ રાષ્ટ્ર: જગતગુરુ રામભદ્રાચાર્યનો મોટો દાવો, મુસ્લિમ બાળકો કુરાન વાંચે છે પણ...