Nobel Peace Prize: થોડા દિવસોમાં જાહેર થશે નોબેલ શાંતિ પુરસ્કાર, ટ્રમ્પનું સપનું જો અધૂરું રહે તો આ બે કારણે રહેશે જવાબદાર

Nobel Peace Prize: નોબેલ શાંતિ પુરસ્કારની ઘોષણા નજીક છે, અને વિશ્વભરની નજર આ પ્રતિષ્ઠિત સન્માનના વિજેતા પર ટકેલી છે. અમેરિકાના રાષ્ટ્રપતિ ડોનાલ્ડ ટ્રમ્પ લાંબા સમયથી આ પુરસ્કાર મેળવવાનું સપનું જોઈ રહ્યા છે. તેમનો દાવો છે કે તેમણે પોતાના કાર્યકાળ દરમિયાન 7 યુદ્ધો થતા અટકાવ્યા અને તેથી આ સન્માન તેમનું હોવું જોઈએ. જોકે, તેમના સખત પ્રયાસો છતાં, નિષ્ણાતો માને છે કે તેમની જીતની શક્યતા નબળી છે.

ટ્રમ્પ આ પુરસ્કાર માટે ખુલ્લેઆમ ઇચ્છા વ્યક્ત કરી ચૂક્યા છે. તે સતત દાવો કરે છે કે તેમની ટ્રેડ ડિપ્લોમેસી અને દખલગીરીને કારણે પરમાણુ યુદ્ધોને ટાળવામાં આવ્યા છે. ઇઝરાયલના વડાપ્રધાન બેન્જામિન નેતન્યાહૂ, પાકિસ્તાન અને કંબોડિયા સહિત કેટલાક દેશોના નેતાઓએ પણ તેમને નોબેલ માટે સમર્થન આપ્યું છે. જોકે, નોબેલ સમિતિના તટસ્થ નિર્ણયની પ્રક્રિયા જોતા, ટ્રમ્પની દાવેદારી મજબૂત લાગતી નથી.

ટ્રમ્પની જીતની સંભાવના કેમ ઓછી?

ટ્રમ્પની જીતની સંભાવના ઓછી હોવાના મુખ્ય 2 કારણો છે, જે નોબેલ સમિતિના માપદંડો પર આધારિત છે:

ભલે ટ્રમ્પના કાર્યકાળમાં એબ્રાહમ એકોર્ડ્સ જેવા કેટલાક શાંતિ કરારો થયા, જેનાથી ઇઝરાયલ અને કેટલાક આરબ દેશો નજીક આવ્યા. પરંતુ તેમની એકંદર વિદેશ નીતિઓ અસ્થિર અને વિવાદાસ્પદ રહી છે. તેમણે નાટો (NATO) સંગઠન અંગે વારંવાર અણછાજતા નિવેદનો આપ્યા. ઘણા દેશો પર આક્રમક વલણ અપનાવ્યું. તેમની નીતિઓ ઘણીવાર વિશ્વમાં અનિશ્ચિતતા પેદા કરનારી રહી છે, જે શાંતિની ભાવનાથી વિપરીત છે.

2. ઘરેલું સ્તરે વિભાજિત અને વિવાદાસ્પદ છબિ

અમેરિકામાં ટ્રમ્પની છબી ઘણી ધ્રુવીકૃત છે. તેમનો કાર્યકાળ ઘણા વિવાદોથી ઘેરાયેલો રહ્યો છે. હાલમાં ઇમિગ્રેશનને લઈને તેમનું કડક વલણ માનવાધિકાર પ્રત્યે તેમની ઓછી રુચિ દર્શાવે છે, એવું એક મોટો વર્ગ માને છે. નોબેલ સમિતિ હંમેશા રાજકીય વિવાદોથી દૂર રહેવાનો પ્રયાસ કરે છે અને એવા નામોથી બચે છે જે આંતરરાષ્ટ્રીય સ્તરે ચર્ચાનો વિષય હોય. ટ્રમ્પની વિવાદાસ્પદ છબી તેમના માર્ગમાં મોટો અવરોધ બની શકે છે.

કોણ છે અન્ય મજબૂત દાવેદારો?

આ વર્ષે નોબેલ શાંતિ પુરસ્કારની રેસમાં કેટલાક અન્ય શક્તિશાળી નામ પણ ચર્ચામાં છે:

ઇન્ટરનેશનલ ક્રિમિનલ કોર્ટ ઓફ જસ્ટિસ (ICC): વૈશ્વિક ન્યાય માટે સતત કામ કરવા બદલ આ સંસ્થાને મજબૂત ઉમેદવાર માનવામાં આવે છે.

કેમ્પેન ફોર ઉઇગર્સ: ચીનમાં ઉઇગર મુસ્લિમોના હિત માટે કામ કરતી આ સંસ્થાનું યોગદાન આંતરરાષ્ટ્રીય દખલગીરીના અભાવમાં ખૂબ મોટું ગણાય છે.

સૂડાન ઇમર્જન્સી રિસ્પોન્સ રૂમ: સૂડાનમાં નાગરિક યુદ્ધ શરૂ થયા બાદ સરકારની પહોંચ બહારના વિસ્તારોમાં પણ રાહત અને બચાવ કામગીરી કરતું આ સ્વયંસેવી નેટવર્ક પ્રબળ દાવેદાર છે.

કેવી રીતે થાય છે વિજેતાની પસંદગી?

નોબેલ સમિતિ નોર્વેની સંસદ દ્વારા રચાયેલી 5 સભ્યોની ટીમ છે, જે તટસ્થતાથી નિર્ણય લે છે. જાન્યુઆરીમાં નામાંકન બંધ થયા પછી, નિષ્ણાતોની ટીમ ઉમેદવારોની શાંતિમાં યોગદાન અને લાંબા ગાળાની અસરનું ઊંડાણપૂર્વક વિશ્લેષણ કરે છે. આ પ્રક્રિયા અત્યંત ગોપનીય હોય છે; કોને નામાંકિત કરવામાં આવ્યા છે તેની સત્તાવાર યાદી લગભગ 50 વર્ષ સુધી જાહેર કરવામાં આવતી નથી. જોકે, નામાંકન કરનાર વ્યક્તિ અથવા સંસ્થા ઘણીવાર જાહેર સમર્થન મેળવવા માટે પોતાનું નામ જાહેર કરે છે, જેમ ટ્રમ્પના કિસ્સામાં થયું છે. ટ્રમ્પ ભલે ગમે તેટલો દાવો કરે, નોબેલ સમિતિનું અંતિમ ધ્યાન ઉમેદવારના વાસ્તવિક અને અવિવાદાસ્પદ યોગદાન પર રહેશે. આ જ કારણ છે કે ટ્રમ્પનું સપનું આ વખતે પણ અધૂરું રહે તેવી શક્યતા વધુ છે.

આ પણ વાંચો-ભારતમાંથી યુરોપમાં કન્ટેનરમાં શું મોકલવામાં આવી રહ્યું છે? તૂટી ચૂક્યાં છે તમામ રેકોર્ડ, જાણશે તો ટ્રમ્પ પણ માથું કુટશે