ટ્રમ્પનો વિવાદાસ્પદ પ્રસ્તાવ: પેન્ટાગોનનું નામ બદલી 'ડિપાર્ટમેન્ટ ઓફ વોર' કરવાની યોજના

America, military: અમેરિકાના રાષ્ટ્રપતિ ડોનાલ્ડ ટ્રમ્પે પેન્ટાગોનનું નામ બદલીને 'ડિપાર્ટમેન્ટ ઓફ વોર' કરવાનો વિવાદાસ્પદ પ્રસ્તાવ આગળ ધર્યો છે. ટ્રમ્પનું માનવું છે કે આ નામ અમેરિકાની સૈન્ય શક્તિને વધુ સારી રીતે રજૂ કરે છે. આ પ્રસ્તાવની જાહેરાત આગામી એક સપ્તાહમાં થઈ શકે છે, એમ તેમણે દક્ષિણ કોરિયાના રાષ્ટ્રપતિ લી જે મ્યુંગ સાથેની ઓવલ ઓફિસની પ્રેસ મીટમાં જણાવ્યું.

ટ્રમ્પે કહ્યું, "જ્યારે અમે પ્રથમ અને દ્વિતીય વિશ્વ યુદ્ધ જીત્યા, ત્યારે આને 'ડિપાર્ટમેન્ટ ઓફ વોર' કહેવામાં આવતું હતું. આ નામમાં એક અલગ જ શક્તિ હતી." તેમણે ઉમેર્યું, "અમે ફક્ત ડિફેન્સ નથી ઈચ્છતા, અમે જરૂર પડે તો આક્રમણ પણ ઈચ્છીએ છીએ." ટ્રમ્પે દાવો કર્યો કે આ ફેરફાર માટે કોંગ્રેસની મંજૂરીની જરૂર નથી અને તેઓ "આને બસ કરી દેશે."

આ પ્રસ્તાવને રક્ષા સચિવ પીટ હેગસેથનું પણ સમર્થન છે, જેમણે પેન્ટાગોનમાં 'વોરિયર એથોસ' પાછું લાવવાની વાત કરી છે. હેગસેથે આ વર્ષે માર્ચમાં X પર એક પોલ કર્યો હતો, જેમાં બહુમતીએ 'ડિપાર્ટમેન્ટ ઓફ વોર' નામને સમર્થન આપ્યું હતું.

ઐતિહાસિક રીતે 1789થી 1947 સુધી અમેરિકાના સૈન્ય વિભાગને 'ડિપાર્ટમેન્ટ ઓફ વોર' તરીકે ઓળખવામાં આવતું હતું. 1947માં નેશનલ સિક્યુરિટી એક્ટ હેઠળ રાષ્ટ્રપતિ હેરી ટ્રૂમેન દ્વારા તેનું નામ બદલીને 'ડિપાર્ટમેન્ટ ઓફ ડિફેન્સ' કરવામાં આવ્યું હતું, જેનો હેતુ સૈન્યની વિવિધ શાખાઓને એકીકૃત કરવાનો હતો.

આ પ્રસ્તાવે સોશિયલ મીડિયા પર પણ ચર્ચા જગાવી છે. કેટલાક લોકો આ નામને અમેરિકાની સૈન્ય શક્તિનું પ્રતીક માને છે, જ્યારે અન્ય લોકો તેને યુદ્ધને પ્રોત્સાહન આપતું ગણે છે. ટ્રમ્પના આ પગલાથી આંતરરાષ્ટ્રીય સ્તરે અમેરિકાની નીતિઓ અને નેટો સાથેના સંબંધો પર પણ અસર પડી શકે છે, એવું વિશ્લેષકોનું માનવું છે. હવે બધાની નજર આગામી સપ્તાહ પર છે, જ્યારે આ નિર્ણયની સત્તાવાર જાહેરાત થઈ શકે છે.

આ પણ વાંચો-'આત્મનિર્ભરતા એક જરૂરિયાત, ઓપરેશન સિંદૂર એ સાયબર યુદ્ધનું મહત્વ શીખવ્યું', રણ સંવાદમાં સંરક્ષણ પ્રધાન રાજનાથ સિંહે આપ્યું નિવેદન