IIP Growth: દેશના ઉદ્યોગોની રફ્તાર ધીમી પડી, ઓક્ટોબરમાં ગ્રોથ ગગડીને 14 મહિનાના તળિયે, જાણો શું છે કારણ

IIP Growth: ભારતીય અર્થવ્યવસ્થા અને ઔદ્યોગિક જગત માટે થોડા ચિંતાજનક સમાચાર સામે આવ્યા છે. તહેવારોની સીઝન હોવા છતાં, ઓક્ટોબર મહિનામાં દેશના ઔદ્યોગિક ઉત્પાદન એટલે કે IIP (Index of Industrial Production) ગ્રોથમાં મોટો ઘટાડો નોંધાયો છે.

સરકાર દ્વારા જાહેર કરાયેલા તાજા આંકડા મુજબ, ઓક્ટોબરમાં ઇન્ડસ્ટ્રીયલ ગ્રોથ માત્ર 0.4% રહ્યો છે. તમને જાણીને નવાઈ લાગશે કે આ છેલ્લા 14 મહિનાનો સૌથી નીચો આંકડો છે. આ પહેલા સપ્ટેમ્બર મહિનામાં ગ્રોથ 4.6% હતો, જેની સરખામણીએ ઓક્ટોબરમાં જાણે બ્રેક વાગી ગઈ હોય તેવી સ્થિતિ સર્જાઈ છે.

આ ઘટાડા પાછળનું મુખ્ય કારણ કોર સેક્ટર્સની નબળી કામગીરી માનવામાં આવે છે. ખાસ કરીને વીજળી અને કોલસાના ઉત્પાદનમાં થયેલા ઘટાડાએ આખા ઈન્ડેક્સનું સંતુલન બગાડી નાખ્યું છે. કોર સેક્ટરનો ગ્રોથ ઘટીને 0% પર આવી ગયો છે, જે ઉદ્યોગોમાં આવેલી સુસ્તી બતાવે છે.

કયા સેક્ટરમાં સૌથી વધુ નુકસાન?

કોલસા સેક્ટર: સૌથી મોટો ફટકો અહીં પડ્યો છે. ઓક્ટોબરમાં કોલસાના ઉત્પાદનમાં 8.5% નો ઘટાડો જોવા મળ્યો છે. ઓગસ્ટમાં અહીં તેજી હતી, પણ ઓક્ટોબરમાં ચિત્ર ઉલટાઈ ગયું છે.

વીજળી (Electricity): વીજળી ઉત્પાદનમાં પણ 7.6% નો ઘટાડો નોંધાયો છે, જેની સીધી અસર મેન્યુફેક્ચરિંગ પર પડી શકે છે.

શું છે આ કોર સેક્ટર્સ ?

દેશના ઔદ્યોગિક વિકાસને માપવા માટે 8 મુખ્ય સેક્ટર્સને 'કોર સેક્ટર' ગણવામાં આવે છે. આ સેક્ટર્સ IIP માં 40% હિસ્સો ધરાવે છે. તેમાં નીચેના ઉદ્યોગો સામેલ છે:

કોલસો, ક્રૂડ ઓઈલ, નેચરલ ગેસ, રિફાઈનરી પ્રોડક્ટ્સ, ફર્ટિલાઈઝર્સ, સ્ટીલ, સિમેન્ટ, વીજળી

સામાન્ય માણસ માટે આનો અર્થ શું?

સરળ ભાષામાં કહીએ તો, IIP ગ્રોથ એ બતાવે છે કે દેશમાં ફેક્ટરીઓ, ખાણો અને પાવર પ્લાન્ટ્સમાં કામકાજ કેટલી તેજીથી ચાલી રહ્યું છે. જ્યારે આ આંકડો ઘટે, ત્યારે તેનો અર્થ એ થાય કે ઉત્પાદન ધીમું પડ્યું છે. અર્થવ્યવસ્થાની તંદુરસ્તી માટે આ આંકડો વધતો રહેવો જરૂરી છે.

આ પણ વાંચો-50 લાખનું ઘર લેવું કે 1 કરોડનું? આ 5-20-3-40 નિયમ જણાવશે તમારી સેલેરી અને બજેટનો સાચો હિસાબ