બ્લેક ફ્રાઇડે સેલમાં ભારતીયો તૂટી પડ્યા, વેચાણમાં 27%નો જોરદાર ઉછાળો, જાણો લોકોએ શું સૌથી વધુ ખરીદ્યું

અમેરિકાનો શોપિંગ ફેસ્ટિવલ 'બ્લેક ફ્રાઇડે' હવે ભારતમાં પણ એટલો જ લોકપ્રિય બની ગયો છે. આ વર્ષના 'બ્લેક ફ્રાઇડે સેલ' દરમિયાન ભારતીયોએ ઓનલાઈન ખરીદીમાં તમામ રેકોર્ડ તોડી નાખ્યા છે. ઈ-કોમર્સ પ્લેટફોર્મને સોફ્ટવેર સેવા આપતી કંપની યુનિકોમર્સના તાજેતરના અહેવાલ મુજબ, આ સેલ દરમિયાન મળેલા ઓર્ડર્સની સંખ્યામાં ગયા વર્ષની સરખામણીમાં સીધો 27% નો વધારો જોવા મળ્યો છે.

આ આંકડા દર્શાવે છે કે અમેરિકાના 'થેંક્સગિવિંગ ડે' પછી શરૂ થતો આ સેલ હવે ભારતીય બજારનો એક અભિન્ન ભાગ બની ગયો છે. લોકો આકર્ષક ડિસ્કાઉન્ટ અને ઓફર્સનો લાભ લેવા આખું વર્ષ આ સેલની રાહ જોતા હોય છે.

કઈ વસ્તુઓ સૌથી વધુ વેચાઈ?

યુનિકોમર્સના પ્લેટફોર્મ 'યુનિવેર' દ્વારા એકત્ર કરાયેલા ડેટાનું વિશ્લેષણ કરતાં કેટલાક રસપ્રદ તારણો સામે આવ્યા છે. આ વર્ષે લોકોએ પોતાના સ્વાસ્થ્ય પર સૌથી વધુ ધ્યાન આપ્યું હોય તેવું લાગે છે.

બ્યુટી અને પર્સનલ કેર: સૌંદર્ય પ્રસાધનો અને પર્સનલ કેર પ્રોડક્ટ્સના વેચાણમાં 77% નો વધારો થયો.

હોમ ડેકોર: ઘર સજાવટની વસ્તુઓની માંગમાં પણ 63% નો વધારો જોવા મળ્યો.

ફેશન: જોકે, સૌથી મોટા સેગમેન્ટ તરીકે ફેશન અને એસેસરીઝે પોતાનું સ્થાન જાળવી રાખ્યું છે. આ કેટેગરીમાં 34 લાખથી વધુ ઓર્ડર નોંધાયા હતા, જે ઓનલાઈન શોપિંગમાં તેના દબદબાને સાબિત કરે છે.

હવે માત્ર 2-3 દિવસ નહીં, આખા અઠવાડિયાનો ઉત્સવ

આ વર્ષે એક મોટો બદલાવ એ પણ જોવા મળ્યો કે 'બ્લેક ફ્રાઇડે સેલ' હવે માત્ર 2-3 દિવસનો કાર્યક્રમ નથી રહ્યો, પરંતુ તે એક અઠવાડિયા સુધી ચાલનારો શોપિંગ ફેસ્ટિવલ બની ગયો છે. ગ્રાહકોની વધતી માંગને પહોંચી વળવા માટે બ્રાન્ડ્સ અને ઓનલાઈન પ્લેટફોર્મ્સે સમય પહેલાં જ સેલ શરૂ કરી દીધો હતો, જેનાથી ગ્રાહકોને પ્રોડક્ટ્સ શોધવામાં અને કંપનીઓને ડિલિવરીનું આયોજન કરવામાં વધુ સરળતા રહી.

નાના શહેરો પણ ખરીદીમાં પાછળ નથી

આ વર્ષે ગ્રાહકોમાં પણ એક રસપ્રદ ફેરફાર જોવા મળ્યો. કુલ વેચાણમાં માત્ર મોટા શહેરો જ નહીં, પરંતુ નાના શહેરોનો પણ મોટો ફાળો રહ્યો.

ટિયર-1 શહેરો અમદાવાદ, મુંબઈ જેવા: કુલ વેચાણમાં 40% હિસ્સો.

ટિયર-2 શહેરો સુરત, રાજકોટ જેવા: કુલ વેચાણમાં 23% હિસ્સો.

ટિયર-3 શહેરો નાના શહેરો અને ગામડાં: કુલ વેચાણમાં 37% હિસ્સો.

આ આંકડા દર્શાવે છે કે ઓનલાઈન શોપિંગ હવે માત્ર મોટા શહેરો પૂરતું સીમિત નથી રહ્યું.

'સાયબર મંડે' પણ બન્યો લોકપ્રિય

બ્લેક ફ્રાઇડેની સાથે સાથે 'સાયબર મંડે' સેલ પણ ભારતીય ગ્રાહકોમાં ઝડપથી લોકપ્રિય થઈ રહ્યો છે. આ બંને સેલ મળીને ભારતમાં 'સાયબર વીક' નો એક નવો ટ્રેન્ડ સ્થાપિત કરી રહ્યા છે, જે ઈ-કોમર્સ કંપનીઓ માટે એક મોટી તક બની ગયો છે.

આ પણ વાંચો-Private companies shut down: દેશમાં છેલ્લા 5 વર્ષમાં 2 લાખથી વધુ કંપનીઓને તાળા લાગ્યાં! સરકારે લોકસભામાં જણાવ્યું કારણ