Air Indiaએ કર્મચારીઓ માટે VRS લેવાની છેલ્લી તારીખ 31 મે સુધી લંબાવી, જાણો વિગતો

ટાટા ગ્રૂપની માલિકીની Air Indiaએ તેના કર્મચારીઓ માટે સ્વૈચ્છિક નિવૃત્તિ (VRS) માટે અરજી કરવાની છેલ્લી તારીખ 31 મે, 2023 સુધી લંબાવી છે. અગાઉ આ સમયમર્યાદા 30 એપ્રિલ હતી. નોટિફિકેશનમાં એમ પણ કહેવામાં આવ્યું છે કે VRS એપ્લિકેશનની મંજૂરી અને કર્મચારીઓને છૂટા કરવાની તારીખ અંગેનો અંતિમ નિર્ણય મેનેજમેન્ટ પાસે રહેશે. Air Indiaએ કહ્યું કે કર્મચારીઓ સ્વૈચ્છિક નિવૃત્તિ સંબંધિત તમામ પ્રશ્નો અને ચિંતાઓને દૂર કરવા માટે કંપનીના એચઆર પ્રતિનિધિઓનો સંપર્ક કરી શકે છે.

તમને જણાવી દઈએ કે ટાટા સન્સે ગયા વર્ષે ઓક્ટોબરમાં બિડ દ્વારા Air Indiaને ખરીદી હતી. Air Indiaના અધિગ્રહણ પછી, ટાટા સન્સે એક નિવેદનમાં કહ્યું હતું કે તે તેના તમામ જૂના કર્મચારીઓને આગામી એક વર્ષ સુધી જાળવી રાખશે અને તે કર્મચારીઓ માટે સ્વૈચ્છિક નિવૃત્તિ યોજના લાવશે જેઓ નિવૃત્ત થવા માગે છે.

Air Indiaના કર્મચારીઓ માટે પ્રથમ VRS ઓફર જૂન 2022માં આવી હતી. Air India પાસે કુલ કર્મચારીઓની સંખ્યા લગભગ 11,000 છે, જેમાં ફ્લાઈંગ અને નોન-ફ્લાઈંગ કર્મચારીઓનો સમાવેશ થાય છે.

ફ્લાઇટમાં વિંછીએ મહિલાને માર્યો ડંખ

Air India હાલમાં જ તેની ફ્લાઈટમાં વીંછી મળવાના સમાચારને લઈને ચર્ચામાં હતી. Air Indiaની ફ્લાઈટમાં એક મહિલા મુસાફરને વીંછીએ ડંખ માર્યો હતો. વિમાન નાગપુરથી મુંબઈ જઈ રહ્યું હતું. રિપોર્ટની પુષ્ટિ કરતા Air Indiaએ કહ્યું કે આ ઘટના 23 એપ્રિલના રોજ બની હતી અને પેસેન્જરને તાત્કાલિક ઈમરજન્સી મેડિકલ ટ્રીટમેન્ટ આપવામાં આવી હતી. તે હવે ખતરાની બહાર છે.

Air Indiaના પ્રવક્તાએ જણાવ્યું હતું કે, "23 એપ્રિલ, 2023ના રોજ અમારી ફ્લાઈટ AI 630 પર એક મુસાફરને વીંછીએ ડંખ મારવાની અત્યંત દુર્લભ અને દુર્ભાગ્યપૂર્ણ ઘટના બની હતી." પ્રવક્તાએ જણાવ્યું હતું કે, “મુસાફરને ઉતરતા સમયે એરપોર્ટ પર ડૉક્ટરે જોયો હતો અને બાદમાં તેની સારવાર કરીને હોસ્પિટલમાંથી રજા આપવામાં આવી હતી. અમારા અધિકારીઓ મુસાફરની સાથે હોસ્પિટલમાં ગયા અને ડિસ્ચાર્જ સુધી પેસેન્જરને શક્ય તમામ મદદની ઓફર કરી.